ქართველი ფარქვეშ ნამდვილი მხეცი იყო! - კომენტატორი ზაზა ფაჩულიაზე

ზაზა ფაჩულიას "დალას მავერიქსმა" დასავლეთის კონფერენციაში უშუალო კონკურენტ "მემფის გრიზლისს" უმასპინძლა და 97:88 ისე დაამარცხა, მეოთხე პერიოდში მეტოქისთვის თამაშის შემოტრიალების შანსი არ მიუცია.

ნოვიცკიმ 20 ქულა ჩააგდო, პარსონსმა - 16, უილიამსმა - 14... გამარჯვება ყველა კალათბურთელზე გადანაწილდა, თუმცა ჩვენ ჩვენი ვთქვათ: ზაზა ფაჩულია ერთადერთი კალათბურთელი იყო, რომელმაც ორმაგი დუბლი მიითვალა. არ დაგვავიწყდეს, რომ მეტოქის რიგებში ესპანელი მარკ გასოლი თამაშობდა, რომელმაც 16 ქულა და 8 მოხსნა მოაგროვა.

მატჩის პირველი პერიოდის შემდეგ ამერიკელმა კომენტატორმა ფაჩულიას გარჯა მოკლედ ასე შეაფასა: ქართველი ცენტრი ფარქვეშ ნამდვილი მხეცი იყოო...

როცა ზაზა იდგა, მემფისელებს ფარქვეშიდან ქულების მოგროვება ძალიან უჭირდათ. მარკ გასოლმა ქულების უმეტესობა მაშინ ჩააგდო, როცა მას ქართველი არ მეურვეობდა.

აი, მეორე საინტერესო ფრაზა, რაც კომენტატორმა წარმოთქვა: "ეს იყო "მემფისის" კალათბურთელთა საშობაო საჩუქარი დალასელთათვის".

საქმე ისაა, რომ დიდი შესვენების დაწყებას წამი უკლდა, როცა დერონ უილიამსმა ბურთიანად მოედნის ნახევარი გადაკვეთა და ტყორცნისას მასზე მეტოქე დაჯარიმდა. არადა, ასეთ ფოლებს ბავშვებიც აღარ იღებენ. სწორედ ეს ჯარიმა მონათლა კომენტატორმა საშობაო საჩუქრად. დერონმა სამივე საჯარიმო გამოიყენა...

"დალასს" 15 მოგება, 12 მარცხი აქვს და დასავლეთის კონფერენციაში მეხუთე პოზიციაზეა.

(იბეჭდება მცირე ცვლილებით)
ყოველდღიური სპორტული გაზეთი "ლელო"