ოფიციალურად დადასტურდა, რომ NBA-ის ოთხგზის ჩემპიონი, 38 წლის ცენტრი შაკილ ო'ნილი "ბოსტონ სელტიქსში" გააგრძელება კარიერას. მხარეებმა ორწლიანი კონტრაქტი გააფორმეს, რომლის მიხედვითაც ლეგენდარული კალათბურთელის წლიური ხელფასი დაახლოებით 1.5 მილიონი დოლარი იქნება.
შაკმა ბოლო სამ წელიწადში მესამე კლუბი გამოიცვალა. "ორლანდოში" (1992-96), "ლეიკერსში" (1996-2004) და "მაიამიში" (2004-08) გამოსვლის შემდეგ, ო'ნილმა თითო სეზონი ითამაშა "ფინიქსსა" და "კლივლენდში", ახლა კი, როგორც ჩანს, კარიერის დასრულებას "ბოსტონში" აპირებს.
შაკილი ამ ზაფხულს თავისუფალი აგენტი გახდა და კარიერის გაგრძელების ერთ-ერთ ვარიანტად ევროპაში გამგზავრება ჰქონდა, ოღონდ ხელფასის სახით 10 მილიონს
საინტერესოა, რომ შაკილი არ გახლავთ ერთადერთი ო'ნილი, რომელიც ამ ზაფხულს "სელტიქსში" ჩაირიცხა. გუნდის ახალწვეული გახდა მისი მოგვარე - მძიმე ფორვარდი ჯერმეინ ო'ნილი.
გუშინდელი გარიგების შემდეგ, "ბოსტონის" "დიდ სამეულს" შაკი შეუერთდა და ახლა ამ გუნდს შეიძლება "დიდი ოთხეული" დავუძახოთ. ცნობილმა "დიდმა ტრიომ" (პოლ პირსი, კევინ გარნეტი, რეი ალენი) "ბოსტონს" 2008 წელს ჩემპიონის ტიტული მოუტანა.
"ჩემთვის დიდი პატივია "სელტიქსში" თამაში, - წერია კალათბურთელის ოფიციალურ განცხადებაში. - მრავალი წლის განმავლობაში ვთამაშობდი პირსის, გარნეტის, ალენის, რონდოსა და ჯერმეინის წინააღმდეგ და კარგია, რომ ახლა ისინი ჩემი პარტნიორები იქნებიან. ერთი სული მაქვს როდის შევუდგები ახალ კლუბთან ერთად მორიგი ტიტულისთვის ბრძოლას".
ამ გარიგებით ცნობილი გახდა მომავალი რამდენიმე წლის განმავლობაში "ბოსტონის" პოლიტიკა. კლუბის მენეჯმენტს ორი გზა ჰქონდა: შეენარჩუნებინა ამჟამინდელი შემადგენლობა ან ახალი, უფრო ახალგაზრდა გუნდის მშენებლობა დაეწყო. იმის გათვალისწინებით, რომ პირსმა ოთხწლიანი კონტრაქტი გააფორმა, ალენმა - ორწლიანი, გარნეტს კი კიდევ ორი წელი დარჩა ამ გუნდში, კლუბის გენერალური მენეჯერი დენი ეინჯი ძველი მოთამაშეების დახმარებით შეეცდება ორი წლის წინანდელი ტრიუმფის გამეორებას. ვნახოთ, რამდენად დაეხმარებიან ამ ოცნების ასრულებაში "სელტიქსს" შაკილ და ჯერმეინ ო'ნილები.
ლელო
