ლებრონის 33 ქულა და 400 ათასი ერთი მატჩისთვის

საბერძნეთის ნაკრების მცველი ვასილის სპანულისი მონაწილეობას ვერ მიიღებს ლიტვაში გასამართ ევრობასკეტში. კუნთის არეში ქრონიკული ტკივილების გამო კალათბურთელი იძულებული გახდა დაეტოვებინა ნაკრების საწვრთნელი შეკრება. როგორც ბერძნული პრესა წერს, სპანულისს, სავარაუდოდ, ოპერაციის გადატანა მოუწევს.

ახლა ბერძნებს სერიოზული პრობლემები შეექმნათ უკანა ხაზზე, რადგან სპანულისს შეეძლო გამთამაშებლის პოზიციაზე თამაში. ეს ამპლუა პრობლემატური გახდა ნაკრებისთვის მას შემდეგ, რაც საერთაშორისო კარიერა დაასრულეს დიმიტრიოს დიამანტიდისმა და ტეო პაპალუკასმა.

* * *
ესპანეთში დასრულდა 20-წლამდელთა ევროპის ჩემპიონატი. კონტინენტის პირველობა მასპინძელთა ტრიუმფით აღინიშნა - ესპანეთის ნაკრებმა მიროტიჩის 29 ქულის წყალობით ფინალში იტალია დაამარცხა - 82:70.

ესპანეთი: მიროტიჩი (29+11 მოხსნა), ფრენჩი (19+7 პასი+5 მოხსნა), ბარერა (10).
იტალია: მორასკინი (17), ჯენტილე (14), დე ნიკოლაო (11+9 მოხსნა).

თუმცა იტალიელებისთვის ფინალში გასვლაც დიდი მიღწევა იყო, რადგან ამ გუნდს 20 წელია ევროპის ჩემპიონატზე ასეთი შედეგი არ ჰქონია. ბოლოს იტალიამ 1992 წელს, სადებიუტო ჩემპიონატში ითამაშა გადამწყვეტი მატჩი და ტიტული მოიპოვა.

ბრინჯაოს მედალი საფრანგეთის ნაკრებმა მოიპოვა, რომელმაც მესამე ადგილისთვის მატჩში რუსეთი დაამარცხა.

* * *
ნახევრადპროფესიულ Drew League-ში თამაშით გაერთო NBA-ის ერთ-ერთი უმთავრესი ვარსკვლავი ლებრონ ჯეიმსი. "მაიამის" ლიდერმა "ჩიტერსის" შემადგენლობაში ითამაშა და ამ გუნდს გამარჯვებაში დაეხმარა, თავად კი 33 ქულა მოათავსა კალათში.

"ბიჭებისთვის ნამდვილი საოცრება იყო მისი მოედანზე გამოჩენა. რთულია იმ ეფექტისა და ემოციების აღწერა, რაც იმ საათნახევრის განმავლობაში ვიხილეთ. ეს იყო Drew League-ის ისტორიაში საუკეთესო დღე", - განაცხადა ლიგის დირექტორმა დინო სმაილიმ.

* * *
გუშინდელ ნომერში ვწერდით იმის შესახებ, რომ NBA-ის წამყვანი კალათბურთელები ფილიპინების ჩემპიონატში მონაწილე მოთამაშეებისგან შემდგარ ნაკრებს ამხანაგური მატჩში გაეჯიბრნენ. თამაში ამერიკელებმა 131:105 მოიგეს. ერთ-ერთი წყაროს ცნობით, მოედანზე გასვლისთვის კობი ბრაიანტმა, კევინ დურანტმა და დერიკ როუზმა 400 ათასი დოლარი (თითოეულმა) მიიღო.

თანაც ისინი ამ თანხიდან გადასახადს არ გადაიხდიან, რადგან მატჩი აშშ-ის ფარგლებს გარეთ გაიმართა.

ყოველდღიური სპორტული გაზეთი "ლელო"