გუშინ, ნიუ იორკში NBA-ის ხელმძღვანელობისა და მოთამაშეთა პროფკავშირის მოლაპარაკებათა მორიგი რაუნდი გაიმართა. მხარეებმა ისევ ვერ შეძლეს კომპრომისის გამონახვა ახალ კოლექტიურ ხელშეკრულებაზე. წინასასეზონო მატჩები ოფიციალურად გაუქმებულია, ამიტომაც მინიმალურია იმის შანსი, რომ 2011-12 წლების სეზონში რეგულარული ჩემპიონატი გაიმართოს.
ბოლო შეხვედრა ოთხ საათზე მეტხანს გაგრძელდა. მას ესწრებოდა ათი კლუბის მფლობელი და რამდენიმე კალათბურთელი, მათ შორის კობი ბრაიანტი, პოლ პირსი და ამარე სტაუდმაიერი.
როგორც მოსალოდნელი იყო, შეხვედრა უშედეგოდ დასრულდა. როგორც ლიგის კომისარმა დევიდ სტერნმა განაცხადა, მთავარი განსახილველი საკითხი იყო შემოსავლის თანაბრად გაყოფა, მაგრამ მოთამაშეებმა
"ჩვენ ვერ მივაღწიეთ პროგრესს, რომლის იმედიც ნამდვილად გვქონდა. ამიტომაც მოლაპარაკებების გაგრძელება არ შეგვიძლია. პირადად მე ძალიან იმედგაცრუებული ვარ. ვფიქრობდი, რომ ჩვენ გავაგრძელებდით შეხვედრებს და მოვნახავდით ამ და სხვა საკითხებში საერთო ენას. ვფიქრობ, შემოსავლების 50/50-ზე გაყოფის ვარიანტს აქვს არსებობის უფლება. ამას შეიძლება ვუწოდოთ პარტნიორობა", - განაცხადა სტერნმა.
ასე რომ, გუნდების საწვრთნელი ბანაკები და წინასასეზონო მატჩები გაუქმებულია. თუ ორშაბათისთვის მხარეები კომპრომისს ვერ მიაღწევენ, გაუქმებულად გამოცხადდება რეგულარული ჩემპიონატის პირველი ორი კვირა.
"თუ ორშაბათისთვის ვერ მოვასწრებთ მოლაპარაკებას, რეგულარული ჩემპიონატის პირველ ორ კვირას ოფიციალურად გავაუქმებთ", - ამბობს დევიდ სტერნი.
პროფკავშირების თავმჯდომარემ დერეკ ფიშერმა განაცხადა, რომ სეზონის გაუქმების მუქარით კალათბურთელები დათმობაზე არ წავლენ.
"კლუბების მფლობელებს ჰგონიათ, რომ თუ მომავალი სეზონის რამდენიმე მატჩი გაუქმდება, მოთამაშეები მაშინვე დასხდებიან და კოლექტიური ხელშეკრულების ნებისმიერ ვარიანტს დაუჭერენ მხარს. ეს ასე არ არის. კალათბურთელები მზად არიან გამოტოვონ ახალი სეზონი", - ამბობს ფიშერი Yahoo! Sports-თან კომენტარში.
ამ მომენტისთვის ლიგისა და პროფკავშირის გეგმებში არ შედის ახალი მოლაპარაკების გამართვა. ასე რომ, ამ ეტაპისთვის ყველაზე ოპტიმისტური პროგნოზი ასეთია - საუკეთესო შემთხვევაში სეზონი დაგვიანებით დაიწყება, როგორც ეს 1998-99 წლებში იყო. თუმცა ამ ეტაპზე ესეც გაურკვეველია.
კობის საკითხიც ჩიხშია
ლიგის და მოთამაშეთა პროფკავშირებით გუშინდელი უშედეგო მოლაპარაკებების შემდეგ კიდევ უფრო აქტუალური გახდა "ლოს ანჯელეს ლეიკერსის" ვარსკვლავის კობი ბრაიანტის იტალიაში გადაბარგების საკითხი. თუმცა კობისა და ბოლონიას "ვირტუსს" შორის მოლაპარაკებების პროცესიც ჩიხში არის მოქცეული. ამერიკელმა ჟურნალისტებმა სწორედ ამის შესახებ ჰკითხეს კალიფორნიელ კალათბურთელს.
"ყველაფერი ჩვეულებრივადაა. ჩემი ტრანსფერის საკითხი ჰაერში დაეკიდა", - მოკლედ უპასუხა მცველმა.
"ეს ნორმალურია. თუ კობი იტალიაში გადავა, მე მას ყველაფერს საუკეთესოს ვუსურვებ. და, რა თქმა უნდა, დაბრუნებას", - კომენტარი გაუკეთა იტალიაში ბრაიანტის სავარაუდო გამგზავრებას ლიგის კომისარმა დევიდ სტერნმა.
ყოველდღიური სპორტული გაზეთი "ლელო"
