დღეს უნდა გადაწყდეს ეროვნული საკალათბურთო ასოციაციის 2011-12 წლების სეზონის ბედი. ნიუ იორკში გაიმართება მოთამაშეთა პროფკავშირის სხდომა, სადაც კალათბურთელები იმსჯელებენ კლუბების მფლობელთა ბოლო შეთავაზების შესახებ და ერთიან პოზიციას შეიმუშავებენ. შესაძლოა, გადაწყვეტილება ფარული კენჭისყრით მიიღონ. ახალი კოლექტიური ხელშეკრულების ბოლო ვარიანტზე მოთამაშეთა უარი, სავარაუდოდ, სეზონის საბოლოოდ გაუქმებას გამოიწვევს, ხოლო მათი თანხმობის შემთხვევაში რეგულარული ჩემპიონატი 15 დეკემბერს დაიწყება და თითო გუნდი 72 მატჩს ჩაატარებს.
ამ უმნიშვნელოვანესი სხდომის წინ ამერიკულ პრესაში ბევრი დაიწერა ლოკაუტის დასრულების შანსებზე. მაგალითად, არაოფიციალური ინფორმაციით ცნობილი გახდა, რომ პროფკავშირი არ ეთანხმება
იქვე ერთ-ერთმა აგენტმა განმარტა პროფკავშირების უკმაყოფილება კოლექტიური ხელშეკრულების ახალი ვარიანტის გამო. მან ამ დოკუმენტს "დრაკონული" უწოდა და აღნიშნა, რომ ვერ წარმოუდგენია სცენარი, რომლითაც მოთამაშეთა პროფკავშირი ამ პირობებით ხელშეკრულებაზე ხელის მოწერას დათანხმდება. წყაროს ცნობით, მფლობელთა წინადადებაში არის პუნქტი, რომლის მიხედვითაც კლუბებს შეუძლიათ პირველი ხუთი სეზონის განმავლობაში კალათბურთელი ნებისმიერ მომენტში გაისტუმრონ D-ლიგაში, თანაც გადაუხადონ მას კონტრაქტით გათვალისწინებულ ხელფასზე ექვსჯერ ნაკლები თანხა.
"დალასის" მცველმა ჯეისონ ტერიმ განაცხადა, რომ მოთამაშეებმა უკან არ უნდა დაიხიონ, თუნდაც ეს სეზონის დაკარგვის ფასად დაუჯდეთ.
"ჩვენ კალათბურთის თამაში გვინდა, მაგრამ ამასთან, მოთამაშეები არ უნდა დათანხმდნენ მათთვის მიუღებელ პირობებს. ყველას უნდა ესმოდეს, რომ NBA-ში არსებობს კალათბურთელთა სამი ჯგუფი - უმაღლესი, საშუალო და დაბალი კლასი. ახლა, კლუბების მფლობელები ცდილობენ თავიდან მოიშორონ საშუალო კლასი. ჩვენ არ დავთანხმდებით არასასურველი პირობებით ხელშეკრულების გაფორმებას, თუნდაც ამან სეზონის გაუქმებამდე მიგვიყვანოს", - ამბობს გასული სეზონის საუკეთესო "მეექვსე მოთამაშე".
"მემფის გრიზლისის" მცველი ო ჯეი მაიო კი აცხადებს, რომ ზოგიერთ მოთამაშე მზად არის მიიღოს მფლობელთა ბოლო შეთავაზება, ოღონდ კი სეზონი დაკარგვა აიცილონ თავიდან.
"მფლობელთა ახალი წინადადება იდეალური არ არის და ბევრ პუნქტში ზღუდავს მოთამაშეთა უფლებებს. ვფიქრობ, პროფკავშირი უარს იტყვის მის გაფორმებაზე. თუმცა ლიგაში ბევრი ისეთი კალათბურთელია, რომლებიც იმდენად სასოწარკვეთილნი არიან, რომ ყველაფერზე მოაწერენ ხელს, ოღონდ კი სეზონი გადაარჩინონ. ვფიქრობ, სწორედ ამის იმედი აქვს მფლობელებს", - გვიზიარებს თავის აზრს ახალგაზრდა კალათბურთელი.
მაგრამ ვრცელდება ისეთი განცხადებებიც, რომელიც კალათბურთის მოყვარულებს იმედიანად განაწყობს. ჟურნალისტი შონ პაუელი იტყობინება, რომ მოთამაშეთა პროფკავშირი, სავარაუდოდ, დაეთანხმება კლუბების მფლობელთა ბოლო წინადადებას.
"ყველას ესმის, რომ მფლობელებმა ყველაზე მომგებიანი წინადადება გააკეთეს, - განუცხადა ინკოგნიტო წყარომ ჟურნალისტს. - თუ პროფკავშირი ხმების უმრავლესობით დაეთანხმება ამ წინადადებას, ოთხშაბათს ლოკაუტი დასრულებული იქნება".
კიდევ ერთი საინტერესო ინფორმაცია იმაში მდგომარეობს, რომ, შესაძლოა, შეიცვალოს მოთამაშეთა პროფკავშირების ხელმძღვანელი. ამ ორგანიზაციის წამყვანი პოსტის დაკავებას აპირებს "დეტროიტ პისტონზის" ლეგენდარული კალათბურთელი აიზია ტომასი. შეგახსენებთ, რომ პროფკავშირებს 1996 წლიდან სათავეში უდგას ბილი ჰანტერი.
ყოველდღიური სპორტული გაზეთი "ლელო"
