NBA-მ მატჩების განრიგი გამოაქვეყნა

NBA-ს ოფიციალურ ვებ-გვერდზე 2011-12 წლების სეზონის მატჩების განრიგი გამოქვეყნდა. როგორც ცნობილი იყო, NBA-ს რეგულარული სეზონი 25 დეკემბერს დაიწყება და 2012 წლის 26 აპრილამდე გაგრძელდება. პლეი ოფის შეხვედრები სტარტს 28 აპრილს აიღებს, ხოლო ფინალური სერია არაუგვიანეს 26 ივნისს გაიმართება.

აღსანიშნავია ის ფაქტი, რომ NBA-ს მოთამაშეების პროფკავშირთან კოლექტიური ხელშეკრულება ოფიციალურად ჯერ არ გაუფორმებია. მიუხედავად ამისა, მატჩების განრიგი მაინც გამოქვეყნდა. როგორც გაირკვა, დოკუმენტები ოფიციალურად ახლო მომავალში გაფორმდება.

შეგახსნებთ, რომ ზეპირი თანხმობა მხარეებს შორის 26 ნოემბერს იქნა მიღწეული.

იმ შემთხვევაში, თუ NBA-ს ოფიციალურ ვებ-გვერდზე გამოქვეყნებული განრიგი საბოლოო იქნა, 2011-12 წლის რეგულაურ სეზონში თითოეული გუნდი 66 მატჩს ჩაატარებს (16-ით ნაკლებს, ვიდრე ჩვეულებრივ იყო). 48 შეხვედრას გუნდები საკუთარი კონფერენციის მეტოქეებთან ჩაატარებენ, ხოლო 18 მატჩს სხვა კონფერენციის მეტოქეებთან გამართავენ.

პირველი სათამაშო დღის მთავარი მატჩი "დალას მავერიქსსა" და "მაიამი ჰიტს" შორის დაპირისპირება იქნება - ერთმანეთს NBA-ს ბოლო ჩემპიონატის ფინალისტები შეხვდებიან.

გარდა ამისა, 25 დეკემბერს კიდევ 4 შეხვედრა ჩატარდება: "ნიუ-იორკ ნიქსი"-"ბოსტონ სელტიქსი", "ლოს-ანჯელეს ლეიკერსი"-"ჩიკაგო ბულსი", "ოკლაჰომა-სიტი ტანდერი"-"ორლანდო მეჯიქი", "გოლდენ სთეიტი უორიორსი"-"ლოს-ანჯელეს კლიპერსი".