"ლოს ანჯელეს ლეიკერსმა" ორი მოკრძალებული ტრანსფერი განახორციელა. კალიფორნიულმა გრანდმა კონტრაქტი გააფორმა მცველ ჯერალდ გრინთან. ხელშეკრულების დეტალები არ ხმაურდება.ეროვნულ საკალათბურთო ასოციაციაში გრინი "ბოსტონის", "მინესოტას", "ჰიუსტონისა" და "დალასის" ღირსებას იცავდა. სულ მის ანგარიშზე 181 მატჩი, 7.2 ქულა და 2.0 მოხსნა მოდის.
2011-12 წლების სეზონი გრინმა ჩინურ კლუბ "ფოშან დალიონში" დაიწყო.
მეორე კალათბურთელი, რომელიც გუშინ "ლეიკერსმა" გაიფორმა, ფორვარდი ჯოშ მაკრობერტსია. ხელშეკრულება ორწლიანია. 24 წლის კალათბურთელით "მემფისიც" გამოთქვამდა დაინტერესებას.
გასულ სეზონში მაკრობერტსმა "ინდიანა პეისერსის" შემადგენლობაში 72 მატჩი ჩაატარა და საშუალოდ 7.4 ქულა და
* * *
ამასობაში, "ლოს ანჯელეს ლეიკერსის" სისტემაში კიდევ ერთი ევროპელი სპეციალისტი გამოჩნდა. ესპანური პრესის ცნობით, მადრიდის "რეალის" ყოფილი სპორტული და გენერალური მენეჯერი ანტონიო მასეირასი ევროპაში "ლეიკერსის" სკაუტი გახდება.
შეგახსენებთ, რომ ზაფხულში კალიფორნიული კლუბის მთავარი მწვრთნელის ასისტენტად იტალიელი ეტორე მესინა დაინიშნა. სწორედ მის სახელს უკავშირებენ მასეირასის მიწვევას, რადგან ესპანელი და იტალიელი ერთად მუშაობდნენ "რეალში".
სხვათა შორის მასეირასს უკვე აქვს ანალოგიური მუშაობის გამოცდილება - 2008-09 წლების სეზონში ის "სან ანტონიო სპურსს" ეხმარებოდა ტალანტების მოძიებაში.
* * *
ასე რომ, "ლეიკერსში" გარკვეული ცვლილებები ხდება, მაგრამ, როგორც ჩანს, ეს არ აკმაყოფილებს გუნდის ლიდერ კობი ბრაიანტს, რომელიც ახალ სეზონში ლოსანჯელესელთა კრახს წინასწარმეტყველებს.
"სავარაუდოდ, ახალ სეზონში ჩვენგან დიდ წარმატებებს არ უნდა ელოდოთ. შემადგენლობასთან დაკავშირებით სიტუაცია უბრალოდ საშინელია, და ეს მხოლოდ დასაწყისია. სულაც არ ვაბუქებ არსებულ მდგომარეობას. მხოლოდ სიმართლეს ვლაპარაკობ, რადგან აქ არაფერია დასამალი", - განაცხადა თავის ბოლო ინტერვიუში კობიმ.
შეგახსენებთ, რომ სულ ცოტა ხნის წინ "ლეიკერსმა" ლამარ ოდომი გაუშვა, გარდა ამისა, ზაფხულში წავიდა შენონ ბრაუნი. სანაცვლოდ გუნდს ჯერ მაღალი დონის მოთამაშე არ აუყვანია, არადა, სატრანსფერო ბაზრის დახურვამდე დიდი დრო აღარ დარჩა.
დენვერმა ნენე შეინარჩუნა და რუდი დაიმატა
სეზონის წინ მთავარი ამოცანა შეასრულა "დენვერ ნაგეტსმა" - მან შეინარჩუნა თავისუფალი აგენტი ნენე ილარიო. ბრაზილიელ ცენტრთან, რომელზეც NBA-ის ბევრი კლუბი ნადირობდა, 67 მილიონ დოლარად შეფასებული ხუთწლიანი კონტრაქტი გაფორმდა.
გასულ სეზონში ნენემ "ნაგეტსის" რიგებში 75 მატჩი ჩაატარა და საშუალოდ 14.6 ქულა და 7.7 მოხსნა დააგროვა.
გარდა ამისა, "დენვერმა" ორი კალათბურთელით შეავსო შემადგენლობა. მან ტრეიდი განახორციელა "დალასთან", რომლის მიხედვითაც 2012 წლის დრაფტის მეორე რაუნდში სასურველი მოთამაშის არჩევის სანაცვლოდ მცველები - რუდი ფერნანდესი და კორი ბრიუერი მიიღო.
ინფორმაცია დაადასტურა "დენვერის" ვიცე-პრეზიდენტმა მასაი უჯირიმ.
კიდევ ერთი ვეტერანი ატლანტაში
37 წლის შემტევმა მცველმა, ჯერი სტეკჰაუზმა თავისუფალი აგენტის სტატუსით ხელი მოაწერა ერთწლიან კონრაქტს "ატლანტა ჰოქსთან".
სავარაუდოდ, ის და კლუბის მეორე ვეტერანი დებიუტანტი ტრეისი მაკგრეიდი სათადარიგო სკამიდან შევლენ თამაშში.
გასულ სეზონში სტეკჰაუზმა 7 მატჩი ჩაატარა "მაიამის" შემადგენლობაში. მისი საშუალო სტატისტიკა 1.7 ქულას და 1.0 მოხსნას უდრიდა.
პოლი NBA-ს უჩივის
"ნიუ ორლეანის" გამთამაშებელი კრის პოლი უახლოეს დღეებში სასამართლოში უჩივლებს ეროვნულ საკალათბურთო ასოციაციას, რომელიც "ნიუ ორლეანის" მფლობელი გახლავთ. პოლი NBA-ს ახალი კოლექტიური ხელშეკრულების დარღვევაში ადანაშაულებს. მცველი უკმაყოფილოა მის სატრანსფერო საქმეებში ლიგის ჩარევით.
ჟურნალისტებს მიაჩნიათ, რომ პოლი ამ ნაბიჯით მატერიალური კომპენსაციის მიღებასა და "ლეიკერსში" ან "კლიპერსში" გადასვლას ვარაუდობს.
დიდი ბენი ციხეს გადაურჩა
"დეტროიტ პისტონზის" ვეტერანმა მცველმა ბენ უოლასმა ერთწლიანი პირობითი სასჯელი მიიღო მანქანის არაფხიზელ მდგომარეობაში მართვისა და იარაღის უკანონო შენახვისთვის. გარდა ამისა, კალათბურთელს 30-დღიანი იძულებითი საზოგადოებრივი სამუშაო მიუსაჯეს.
აღსანიშნავია, რომ უოლასს სერიოზულად ემუქრებოდა სამთვიანი პატიმრობა, მაგრამ სასამართლოში გაითვალისწინეს გამოძიებასთან თანამშრომლობა.
ბენი 24 სექტემბერს დეტროიტის გარეუბანში დააკავეს. ის არაფხიზელ მდგომარეობაში მართავდა მანქანას, თან ჩხრეკის შემდეგ პისტოლეტი უპოვნეს.
ყოველდღიური სპორტული გაზეთი "ლელო"
