ამერიკული პრესის ინფორმაციით, 38 წლის მცველი მაიკლ ფინლი ეროვნულ საკალათბურთო ასოციაციაში დაბრუნებას გეგმავს. ვეტერანმა განაცხადა, რომ მთლიანად მოირჩინა ტრავმები, დაისვენა და მზად არის სათამაშოდ. ასევე ფინლიმ შეატყობინა ჟურნალისტებს, რომ მუდმივი კონტრაქტი აქვს "დალასის" მფლობელთან მარკ ქიუბანთან.
ფინლიმ NBA-ში ბოლო სეზონი 2009-10 წელს "ბოსტონის" შემადგენლობაში ჩაატარა. მანამდე ის "ფინიქსში", "დალასსა" და "სან ანტონიოში" თამაშობდა და საშუალოდ 15.7 ქულას, 4.4 მოხსნასა და 2.9 შედეგიან გადაცემას აგროვებდა.
* * *
ESPN-თვის ცნობილი გახდა, რომ ჩინელმა ფორვარდმა იი იანლიანმა ერთწლიანი კონტრაქტი გააფორმა "დალასთან". კალათბურთელი,
გასული სეზონი იანლიანმა "ვაშინგტონში" ჩაატარა. მისი საშუალო მონაცემები იყო - 5.6 ქულა და 4.0 მოხსნა.
* * *
ირანელმა ცენტრმა, 26 წლის ჰამედ ჰადადიმ "მემფის გრიზლისთან" გააფორმა კონტრაქტი. სამი წლის წინ, ის პირველი ირანელი გახდა, ვინც პლანეტის საუკეთესო ლიგაში დაიდო ადგილი. ეს სამი სეზონი მან სწორედ "მემფისის" რიგებში გაატარა, ჯამში 86 მატჩში მიიღო მონაწილეობა და საშუალო 6 წუთის განმავლობაში 2.2 ქულა და 2.2 მოხსნა დააგროვა.
გასულ სეზონში ჰადადი ირანის ნაკრების ლიდერი იყო - აზიის ჩემპიონატზე მისი სტატისტიკა 15.4 ქულასა და 11.4 მოხსნას შეადგენდა.
* * *
სავარაუდოდ, ძალიან მალე დატოვებს "საკრამენტო კინგზის" რიგებს ცენტრი დემარკუს კაზინსი. ამ კალათბურთელს გუშინ, "ნიუ ორლეანთან" მატჩში არ უთამაშია. "მეფეების" მთავარმა მწვრთნელმა პოლ უესტფოლმა ამ საკითხთან დაკავშირებით განცხადება გააკეთა.
"გუნდში მომხდარი ამბები გარეთ არ უნდა გადიოდეს. პუბლიკისთვის ამის ცოდნა არ არის აუცილებელი. მაგრამ კაზინსთან მიმართებაში ეს წესი არ მოქმედებს. დემარკუსი აგრძელებს თავისი მძიმე ხასიათის დემონსტრირებას და არ სურს კლუბთან ერთად ერთი მიმართულებით სვლა.
ამიტომაც ვაცხადებ, რომ დემარკუს კაზინსს მალე სხვა კლუბში გაცვლიან. ეს გაკეთდება გუნდის ინტერესებიდან გამომდინარე. რაც მთავარია, კლუბის ხელმძღვანელობა იზიარებს ამ პოზიციას", - განაცხადა პოლ უესტფოლმა.
ყოველდღიური სპორტული გაზეთი "ლელო"
