მაიკლ ჯორდანის "შარლოტ ბობკეტსმა" კონტრაქტი გაწყვიტა 35 წლის ცენტრ ერიკ დამპიესთან. ხელშეკრულების თანახმად, ვეტერანს მომავალ სეზონში 13 მილიონი დოლარი უნდა გამოემუშავებინა.
დამპიემ 2004 წელს გააფორმა "დალას მავერიქსთან" კონტრაქტი "6+1" სქემით, ზაფხულში კი ის "შარლოტში" გაცვალეს, თუმცა ხელშეკრულების გაგრძელების პირობა იყო კალათბურთელის მიერ მიღებული სათამაშო დროის რაოდენობა.
ასე რომ, ახლა მაიკლ ჯორდანმა შეძლო კლუბის სახელფასო ბიუჯეტის მაქსიმალურ ზღვრამდე დაწევა.
ბერძნებმა ბლატი მიიწვიეს
რუსეთის ნაკრების მთავარი მწვრთნელი დევიდ ბლატი, შესაძლოა, საბერძნეთის ეროვნულ გუნდს ჩაუდგეს სათავეში. ქვეყნის კალათბურთის ფედერაციის პრეზიდენტმა გეორგიოს ვასილაკოპულოსმა განაცხადა,
შეგახსენებთ, რომ ბლატს ჯერ არ მიუღია რუსეთის ნაკრების დატოვების გადაწყვეტილება. გარდა ამისა, ამერიკელი სპეციალისტი თელ-ავივის "მაკაბიში" მუშაობს.
NBA ოთხმა მსაჯმა დატოვა
სეზონებს შორის შესვენებისას ეროვნულ საკალათბურთო ასოციაციას ოთხი მსაჯი გამოაკლდა, რომელთა მუშაობის საერთო სტაჟი 72 წელს შეადგენდა. ჯო დეროსა, ჯო ფორტე, შონ კორბინი და ფილ რობინსონი აღარ განსჯიან NBA-ის მატჩებს 2010-11 წლების სეზონში. მათ ადგილს NBDL-დან ხუთი არბიტრი დაიკავებს.
როგორც ლიგის ოფიციალურ ვებგვერდზე წერია, წელს მსაჯებისა და NBA-ის ოფიციალურ პირთა საშუალო ასაკი მკვეთრად მოიკლებს.
ნეტსმა გრემი დაიმატა
"ნიუ ჯერსი ნეტსმა" ერთწლიანი კონტრაქტი გააფორმა ფორვარდ სტივენ გრემთან. 28 წლის კალათბურთელი მომავალ სეზონში 2.1 მილიონ დოლარს მიიღებს. გრემი შარშან "შარლოტ ბობკეტსში" თამაშობდა და საშუალოდ 4.2 ქულასა და 1.9 მოხსნას აგროვებდა.
"შარლოტის" გარდა, კალათბურთელის აქტივშია "ჰიუსტონში", "პორტლენდში", "კლივლენდში", "ჩიკაგოსა" და "ინდიანაში" თამაში.
ბოსტონი სნაიპერს ეძებს
"ბოსტონ სელტიქსი" კვლავაც სნაიპერის ძიებაშია. ამჟამად გუნდთან ერთად ვარჯიშობენ კუტინო მობლი, რაშად მაკენტსი და ტრენტონ ჰასელი. ჯერჯერობით ამ ტრიოდან არც ერთს არ მიუღია საწვრთნელ ბანაკში მიწვევის წინადადება.
35 წლის მობლი "ჰიუსტონში", "საკრამენტოში", "ლოს ანჯელეს კლიპერსსა" და "ორლანდოში" თამაშით არის ცნობილი. 24 წლის მაკენტსი "მინესოტამ" 2005 წლის დრაფტზე მე-14 ნომრად აირჩია, 31 წლის ჰასელმა კი ბოლო სამი სეზონი "ნიუ ჯერსის" შემადგენლობაში ჩაატარა.
ამერიკა პირველზე დაბრუნდა
მსოფლიოს ჩემპიონატის შემდეგ განახლდა კალათბურთის საერთაშორისო ფედერაციის რეიტინგი. პირველ ადგილს დაუბრუნდა ამერიკის ნაკრები, რომელმაც სიის სათავეში არგენტინის ადგილი დაიკავა, თავად სამხრეთამერიკელები მესამე პოზიციამდე ჩამოქვეითდნენ, მეორეზე კი ესპანეთის ნაკრები იმყოფება.
შემდეგ მოდიან: მეოთხე - საბერძნეთი, მეხუთე - ლიტვა, მეექვსე - თურქეთი, მეშვიდე - იტალია, მერვე - სერბეთი, მეცხრე - ავსტრალია და მეათე - ჩინეთი.
იაოს 24 წუთი
"ჰიუსტონ როკეტსის" ფიზმომზადების მწვრთნელმა კეიტ ჯონსმა განაცხადა, რომ გუნდის ჩინელი ცენტრი იაო მინი თითო მატჩში 24 წუთზე მეტს ვერ ითამაშებს. როგორც ცნობილია, მინი შარშან მარცხენა მუხლზე გადატანილი ოპერაციების შემდეგ კვლავაც აღდგენით კურსს გადის.
"ბოლო წამებზე "ჰიუსტონი" ერთ ქულას რომ აგებდეს და გუნდს იაო მინის სამსახური დასჭირდეს, ის მაინც არ გავა მოედანზე. მინდა ვთქვა, რომ ჩინელი 24 წუთზე მეტს არ ითამაშებს, თუნდაც ეს დამღუპველი აღმოჩნდეს გუნდისთვის", - წერს "ჰიუსტონის" ოფიციალურ ვებგვერდზე ჯონსი.
იუტამ ელსონი გაიფორმა
"იუტა ჯაზმა" კონტრაქტი გააფორმა თავისუფალ აგენტ ფრანსისკო ელსონთან. ხელშეკრულების პირობები პრესისთვის უცნობი დარჩა.
როგორც ცნობილია, "ჯაზმენების" ძირითადი ცენტრალური თავდამსხმელი მეჰმეთ ოქური შარშანდელ პლეი ოფში მიღებულ ტრავმას მკურნალობს და ელსონი სწორედ ამის გამო შეიძინეს.
ფრანსისკომ შარშანდელი სეზონი "ფილადელფიაში" დაიწყო, თუმცა შემდეგ "მილუოკიში" გადავიდა. NBA-ში გატარებული შვიდი წლის განმავლობაში მისი სტატისტიკა 3.9 ქულასა და 3.8 მოხსნას ითვლის.
ტომასმა დალასი დატოვა
ვეტერანმა მცველმა ტიმ ტომასმა "დალას მავერიქსთან" ერთწლიანი კონტრაქტი გაწყვიტა, არადა, კალათბურთელმა ეს ხელშეკრულება სულ რაღაც ერთი თვის წინ გააფორმა. ამ მოულოდნელი გადაწყვეტილების მიზეზი ტომასის მეუღლის მძიმე ავადმყოფობა გახდა. შეგასენებთ, რომ ამავე მიზეზით ტიმმა შარშანდელ რეგულარულში დაახლოებით 40 მატჩი გამოტოვა.
"დალასის" ხელმძღვანელობას მომხდარის შესახებ კომენტარი არ გაუკეთებია.
ყოველდღიური სპორტული გაზეთი
"ლელო"
