ბოლოს რამდენიმე წლის განმავლობაში, "ლოს ანჯელეს ლეიკერსის" ლიდერი კობი ბრაიანტი საბოლოოდ ჩამოყალიბდა თანამედროვე კალათბურთის ყველაზე წინააღმდეგობრივ ფიგურად. სასწორის ერთ მხარესაა - ხუთი საჩემპიონო ბეჭედი, ოლიმპიური ოქრო, სეზონის საუკეთესო კალათბურთელისა და ლიგის საუკეთესო სნაიპერის ტიტული. ამის წყალობით "შავი მამბას" გულშემატკივართა არმია ყოველწლიურად იზრდება. მაგრამ მეორეს მხრივ, არ მცირდება კობის არაკეთილისმსურველთა რიცხვი. Bleacherreport-ის მიმომხილველი მარიო გონსალესი ცდილობს გაერკვეს ამ პარადოქსში. მან შეადგინა იმ მიზეზთა რეიტინგი, რის გამოც არ უყვარს კალათბურთის ბევრ გულშემატკივარს თანამედროვეობის ერთ-ერთი უდიადესი მოთამაშე.
1. NBA-ში მეგობრები არ ჰყავს
ერთი-ორი გამონაკლისის
ქედმაღლობა
ბრაიანტს ბევრი აკრიტიკებს არაემოციურობისა და სიტყვაძუნწობის გამო. ჟურნალისტებისთვის ეს არ არის ახალი ამბავი. მისგან ორი-სამი სიტყვის ამოქაჩვა - ეს ის მაქსიმუმია, რისი იმედიც პრესის წარმომადგენლებს უნდა ჰქონდეთ. ურთიერთობა, ინტერვიუ ან უბრალოდ აზრთა გაცვლა-გამოცვლა ცნობილ გულშემატკივრებთან - მისთვის უინტერესო საქმიანობაა. ამას ადასტურებს ჰოლივუდის ვარსკვლავი კრის როკი, რომელიც მშვიდი სახით მოიშორა კობიმ 2010 წლის ფინალის შედეგ. არავის ეპარება ეჭვი იმაში, რომ ბრაიანტი გამორჩეული ინდივიდუალისტია და ინტელექტიც საკმარისი აქვს. მაგრამ ნუ ელოდებით, რომ ის ხშირად მოგხიბლავთ ამ თვისებებით. მას თქვენთვის არ სცალია.
ჭირვეული მარტოხელა მგელი
მას შემდეგ, რაც კობიმ გუნდიდან მოიშორა მეორე სუპერვარსკვლავი - შაკილ ო'ნილი, მას ზედმეტ ინდივიდუალიზმსა და ეგოიზმში დასდეს ბრალი. შაკის წასვლიდან ორი წლის შემდეგ, კობის მოწინააღმდეგეები კიდევ ერთხელ დარწმუნდნენ ამაში. ბრაიანტი ბევრს ესროდა, პასებს იშვიათად არიგებდა, "ლეიკერსი" კი ხშირად ვერ იგებდა. "ის ბურთს დახარბებული მოთამაშეა", - ამბობდნენ კალიფორნიელი ლიდერის შესახებ. გარკვეულწილად ეს მართალია, მაგრამ მოდით დავფიქრდეთ: ჰქონდა თუ არა მას არჩევანი? გამარჯვების სურვილი არსად გამქრალა, თუმცა პარტნიორები იყვნენ დაბალი კლასის. წარმოიდგინეთ გუნდი, რომელსაც ჰყავს მაიკლ ჯორდანი, ხოლო მის გარშემო შეკრებილნი არიან კვამე ბრაუნი, სმეშ პარკერი და კრის მიმი. შეძლებდა ასეთი გუნდი მოგებას? საოცარია, მაგრამ, როცა "ლეიკერსი" პაუ გასოლით, ენდრიუ ბინუმითა და დერეკ ფიშერით გაძლიერდა, ბრაიანტის მისამართით მაშინვე გავრცელდა საპირისპირო ბრალდება - ნაკლებ ქულას აგროვებს, რადგან უნდა შედეგზე პასუხისმგებლობა თანაგუნდელებს დააკისროს.
კობი თქვენი გუნდის წინააღმდეგ
იმ ყველა მიზეზიდან, რის გამოც ხალხს ბრაიანტი არ უყვარს - ეს ყველაზე სუბიექტურია. თუ თქვენ სხვა ძლიერი კლუბის გულშემატკივარი ხართ, ეს გრძნობა აუცილებლად გაგიჩნდებოდათ. მაგალითად, "ბოსტონის" ფანებმა შესანიშნავად იციან, რას ნიშნავს კობის მიერ წართმეული ტიტული. ჯერ კიდევ რამდენიმე წლის წინ, "ლეიკერსის" გულშემატკივრებისთვის ასეთივე გამაღიზიანებელი იყო ტიმ დანკანი, რომელიც "სან ანტონიოს" გამარჯვებების გარანტი გახლდათ. ახლა ლებრონის, დუეინისა და კარმელოს გულშემატკივრების ოცნებები იმსხვრევა კობის გამო.
უმართავი
შაკთან გაყრის შემდეგ "ლეიკერსის" რთული პერიოდი დაუდგა. წავიდა ფილ ჯექსონი და სწორედ დიადმა მწვრთნელმა მისცა ხალხს კობი ბრაიანტის კრიტიკის ახალი საბაბი. თავის ავტობიოგრაფიულ წიგნში - "ბოლო სეზონი", ჯექსონმა ყოფილ შეგირდს "უმართავი" უწოდა და ისეთ კალათბურთელად მოიხსენია, რომლის გაწვრთნა შეუძლებელია. ფილის თქმით, ბრაიანტი ძალიან ჯიუტია და ხშირად მიდის გუნდის ინტერესების წინააღმდეგ. მართალია, მოგვიანებით ჯექსონმა კორექტირება გაუკეთა თავის სიტყვებს, მაგრამ საზოგადოებრივი აზრის შეცვლა უკვე შეუძლებელი იყო.
ო'ნილის საქმე
შაკის თავიდან მოცილების შემდეგ, კობიმ დაანგრია გუნდი, რომელსაც ბევრი დიადი გამარჯვების მოპოვება შეეძლო - ეს ერთ-ერთი ყველაზე პოპულარული მოსაზრებაა ამ სკანდალურ ისტორიაში, განსაკუთრებით ო'ნილის ფანებს შორის. სინამდვილეში, არასწორია იმის ვარაუდი, რომ შაკის "ლეიკერსიდან" წასვლა სწორედ ბრაიანტთან ჩხუბით იყო გამოწვეული. კონფლიქტი მართლაც არსებობდა, მაგრამ იყო აგრეთვე "ლეიკერსის" მფლობელის ჯერი ბასის სურვილი - მას არ უნდოდა უკვე მობერებული შაკისთვის მაქსიმალური კონტრაქტის გაფორმება. ბასი მომავლისკენ იყურებოდა და დარწმუნებული იყო, რომ უფრო ჭკვიანური იქნებოდა ახალგაზრდა ბრაიანტის გარშემო ახალი გუნდის შექმნა. ორ სუპერვარსკვლავს შორის პრესის მიერ გაბუქული კონტრაქტი ის საშუალება აღმოჩნდა, რომლის დახმარებითაც გუნდის ხელმძღვანელობამ შაკი მოიშორა.
ვინ არის ბინუმი?
აი, სად დაუშვა ბრაიანტმა ყველაზე დიდი შეცდომა. სრულიად უდანაშაულო თანაგუნდელის მიმართ შეურაცხმყოფელი გამოხდომა ნამდვილად ვერ იმოქმედებდა დადებითად კობის რეპუტაციაზე. შეგახსენებთ რაზეა ლაპარაკი: ორი წლის წინ "ლეიკერსს" შეეძლო ახალგაზრდა ცენტრი ენდრიუ ბინუმი ლიგის ცოცხალ ლეგენდაზე - ჯეისონ კიდზე გაეცვალა. კლუბის ხელმძღვანელობამ ეს იდეა უარყო, რამაც ბრაიანტი გააცოფა. "ვერ ვიჯერებ, რომ მათ უარი თქვეს ასეთ ტრეიდზე! ვის გამო? ბინუმის გამო? ვინ არის ის საერთოდ?!" - ამბობდა განრისხებული კობი ტელეკამერების წინ. რბილად რომ ვთქვათ, ამ განცხადებით მისი თაყვანისმცემელთა რიცხვი ვერ გაიზრდებოდა. სამაგიეროდ, მოგვიანებით ბინუმთან კარგად შეთამაშდა და მათ ორჯერ ერთად მოიგეს ჩემპიონობა.
ტრეიდის თხოვნა
ოთხი წლის წინ კობიმ არასასიამოვნოდ გააოცა "ლეიკერსის" გულშემატკივრები, როცა გუნდის დატოვების სურვილი გამოთქვა. დილის რადიოშოუს პირდაპირ ეთერში ბრაინტმა განაცხადა, რომ უკმაყოფილოა კლუბის ხელმძღვანელთა სასელექციო მუშაობით და ამიტომაც ტრეიდს ითხოვს. რამდენიმე საათის შემდეგ მან სიტუაციის გამოსწორება სცადა - გუნდიდან წასვლა არ მინდა და ჩემი სიტყვები არასწორად გაიგესო. მაგრამ აგორებული ჭორების შეჩერება უკვე შეუძლებელი იყო. მაშინვე გავრცელდა "ახალი ამბები": კობი "კლიპერსთან" ერთად ვარჯიშობს, თითქმის მიაღწია შეთანხმებას "ჩიკაგოსთან" და ა. შ. ეს ყველაფერი სიმართლეს არ შეესაბამებოდა, მაგრამ ერთმა დაუფიქრებელმა ფრაზამ ბევრ გულშემატკივარს ცუდი მოგონება დაუტოვა.
ცუდად ისვრის გადამწყვეტ მატჩებში
ამის შესახებ ლაპარაკი წლევანდელი ფინალური სერიის მეშვიდე მატჩის შემდეგ დაიწყეს. იმ შეხვედრაში კობის მართლაც არ ჰქონდა რეალიზაციის მაღალი პროცენტი. "შავი მამბას" კრიტიკოსებმა მაშინვე გაიხსენეს ძველი მოსაზრება იმის შესახებ, რომ კობი ჯორდანთან ახლოსაც ვერ მივა. მათ ავიწყდებოდათ, რომ ლეგენდარულ მაიკლსაც ჰქონდა ასეთი მატჩები. მათ შორის ფინალურ სერიებში. ბრაიანტი კი გააკრიტიკეს იმ მატჩის გამო, სადაც ის ბრწყინვალედ იცავდა თავს - 15 მოხსნა მიითვალა და რამდენიმე უმნიშვნელოვანესი ბურთი ჩააგდო. და მთავარი: ის მატჩი "ლეიკერსმა" მაინც მოიგო.
სკანდალი კოლორადოში
და მივედით კობის ბიოგრაფიის ყველაზე დიდ "შავ ლაქასთან". 2003 წელს კალათბურთელი კოლორადოს ერთ-ერთი სასტუმროს თანამშრომლის გაუპატიურებაში დაადანაშაულეს. ამან მის იმიჯზე ძალიან უარყოფითად იმოქმედა. საქმე სასამართლომდე არ მისულა - სავარაუდო მსხვერპლმა უარი თქვა კალათბურთელის წინააღმდეგ ჩვენების მიცემაზე. სასამართლო დარბაზის მიღმა კომპრომისული გადაწყვეტილება პუბლიკისთვის ერთს ნიშნავდა: ბრაიანტმა უბრალოდ მოისყიდა 19 წლის გოგონა. ასეა თუ ისე, იმ მომენტიდან კობი ბევრი ამერიკელისთვის საძულველი პიროვნება გახდა, მთელი მსოფლიოს ქალებისთვის კი ნომერ პირველი მტერი. ამ ისტორიამ სამუდამოდ შეცვალა "ლეიკერსის" ლიდერის ცხოვრება: კარიერის ბოლომდე ეცდება დაავიწყოს ხალხს მასზე მიწებებული მოძალადის იარლიყი.
ყოველდღიური სპორტული გაზეთი
"ლელო"
