"ლეიკერსისა" და "ნიუ იორკის" მატჩში საყაიმო ანგარიშით დასრულდა კობი ბრაიანტისა და კარმელო ენტონის დუელი - მათ 34-34 ქულა დააგროვეს და შეტევის ეფექტურობაც თითქმის ერთნაირი ჰქონდათ. ამიტომაც მატჩის ბედი იმაზე იყო დამოკიდებული, როგორ ითამაშებდნენ სხვა კალათბურთელები. ამ მხრივ, პირველ რიგში უნდა გამოვყოთ მეტა უორლდ პისი.
მიუხედავად იმისა, რომ მას ენტონის მეურვეობა ჰქონდა დავალებული, ის შეტევისთვისაც იცლიდა და მარტო მეორე მეოთხედში 16 ქულა დააგროვა!
სამწუხაროა, რომ უორლდ პისმა მატჩის მიყვანა ბოლომდე ვერ შეძლო, რადგან ექვსი პერსონალურის გამო ვადაზე ადრე დატოვა მოედანი.
სირენამდე
გასოლის ზუსტი საჯარიმოს შემდეგ "ნიქსს" აუცილებლად სჭირდებოდა ზუსტი შორეული ტყორცნა, მაგრამ სმიტმა ამჯერად ვერ ჩააგდო.
საპასუხო შეტევაში კი ნიუიორკელებმა განსაკუთრებული ყურადღება ბრაიანტს მიაქციეს და საერთოდ დაავიწყდათ გასოლი.
99:94 და სტუმრებს მხოლოდ 12 წამი რჩებოდათ სიტუაციის გამოსასწორებლად, მაგრამ ტაიმ-აუტის შემდეგ კიდმა ბურთის შემოტანისას შეცდომა დაუშვა და ამით ყველაფერი დამთავრდა.
* * *
კვლავაც შეუჩერებელია "ლოს ანჯელეს კლიპერსი", რომლის მორიგი მსხვერპლი გახდა "დენვერი". ამ უკანასკნელმა მხოლოდ პირველ მეოთხედში შეძლო წინააღმდეგობის გაწევა.
მეორე მეოთხედში კი ბარნსმა 12 და კროუფორდმა ცხრა ქულით, პრაქტიკულად, საბოლოოდ დაასამარეს სტუმრების იმედები.
საბოლოოდ, დიდი შესვენებისთვის დელ ნეგროს შეგირდებს 67 ქულა ჰქონდათ მოგროვებული და სოლიდური უპირატესობით – 19 ქულით იყვნენ წინ. შესაბამისად, კალიფორნიელებს არ გასჭირვებიათ ამ რეგულარულში ზედიზედ მე-14 გამარჯვების მოპოვება.
ლეიკერსი-ნიუ იორკი 100:94
25:23, 26:26, 26:29, 23:16
ლ: ბრაიანტი (34+5 მოხსნა), უორლდ პისი (20+7 მოხსნა), ნეში (16+6 მოხსნა+11 პასი), ჰოვარდი (14+12 მოხსნა), გასოლი (13+8 მოხსნა+6 პასი).
ნ-ი: ენტონი (34+7 მოხსნა), სმიტი (25+5 მოხსნა), ფელტონი (10+6 პასი).
კლიპერსი-დენვერი 112:100
25:26, 42:22, 26:28, 19:24
კ: კროუფორდი (22), ბარნსი (20+8 მოხსნა+3 ჩაჭრა), პოლი (14+8 პასი+3 ჩაჭრა), გრიფინი (13+6 მოხსნა+6 პასი), ბლედსოუ (12), გრინი (11), ოდომი (6+10 მოხსნა)
დ: კუფოსი (16+10 მოხსნა), ჯ. ჰემილტონი (16), ლოუსონი (15+5 პასი), მილერი (12+6 პასი).
ლებრონი: პირველი ჯარიმა 8 დეკემბრის შემდეგ
"ოკლაჰომასთან" მატჩში "მაიამი ჰიტის" ფორვარდმა ლებრონ ჯეიმსმა პირველი პერსონალური მიიღო ბოლო 254 წუთის განმავლობაში. ფლორიდელთა ლიდერი მაშინ დასაჯეს, როცა წარუმატებლად სცადა "ოკლაჰომას" ფორვარდ სერჟ იბაკას დაფარება.
წინა ექვს მატჩში მსაჯებს ერთხელაც არ დაუსჯიათ ჯეიმსი პერსონალურით. "ოკლაჰომასთან" მატჩამდე ბოლოს ლებრონს ჯარიმა 8 დეკემბერს, "ნიუ ორლეანთან" შეხვედრაში დაუფიქსირეს.
მილერი ათიათასიანი გახდა
იმავე "ოკლაჰომასთან" შეხვედრაში "მაიამის" მცველმა მაიკ მილერმა კარიერაში მე-10000 ქულა დააგროვა. შესაბამისად, მილერი გახდა 48-ე მოქმედი კალათბურთელი, ვის აქტივშიც მინიმუმ 10 ათასი ქულაა.
სულ ეროვნული საკალათბურთო ასოციაციის ისტორიაში ეს ზღვარი 313 მოთამაშემ გადალახა. მათგან ექვსი "მაიამის" რიგებში თამაშობს. მილერის გარდა, ესენი არიან: რეი ალენი, ლებრონ ჯეიმსი, დუეინ უეიდი, რაშარდ ლუისი და კრის ბოში.
უეიდი სროლაზე იმუშავებს
"მაიამი ჰიტის" ერთ-ერთმა ლიდერმა დუეინ უეიდმა დაიქირავა პერსონალური მწვრთნელი, რათა ტყორცნის გაუმჯობესებაზე იმუშაოს.
შეგახსენებთ, რომ სროლის ტექნიკაზე მუშაობას უეიდი ჯერ კიდევ სეზონის წინ აპირებდა, მაგრამ მის გეგმებს ხელი შეუშალა მუხლზე ოპერაციამ და ხანგრძლივმა აღდგენითმა კურსმა. ამიტომაც მცველი ცდილობს გამონახოს დრო იმისთვის, რომ ინდივიდუალური ვარჯიშები 2012-13 წლების სეზონის მსვლელობისას
ჩაატაროს.
ყველაზე საინტერესო ის არის, რომ მიმდინარე რეგულარულ ჩემპიონატში უეიდი თავის კარიერაში თამაშიდან ტყორცნის საუკეთესო პროცენტს (51.5) აფიქსირებს.
ბობკეტსმა მალენსი დაკარგა
"შარლოტ ბობკეტსის" ფორვარდი ბაირონ მალენსი მარცხენა ფეხის ტრავმის გამო რამდენიმე კვირით გამოეთიშა რეგულარულ ჩემპიონატს. ბრიტანელმა კალათბურთელმა დაზიანება შაბათს, "დენვერთან" მატჩის დროს მიიღო.
მიმდინარე სეზონში მალენსი "ბობკეტსის" ერთ-ერთი ლიდერია - მის ანგარიშზე 27 მატჩში 11.6 ქულა და 7.8 მოხსნა მოდის.
ყოველდღიური სპორტული გაზეთი "ლელო"
