ფლორიდელები პირველივე წუთებიდან წავიდნენ წინ. შესანიშნავად გამოიყურებოდა "ჰიტის" დაცვა პერიმეტრზე. ასე მაგალითად, მასპინძლების ერთ-ერთმა ლიდერმა დევინ ჰარისმა პირველი ქულები მხოლოდ მეორე მეოთხედის მეხუთე წუთზე დააგროვა. "ნიუ ჯერსიდან" ერთადერთი ბრუკ ლოპესის გამოყოფა შეიძლება,
"ნიუ ჯერსისთვის" სამწუხაროდ, "მაიამის" "დიდ ტრიოს" პრაქტიკულად ყველაფერი გამოსდიოდა. კრის ბოში საშუალო მანძილიდან ისროდა უშეცდომოდ, დუეინ უეიდი ყველგან ასწრებდა, ლებრონ ჯეიმსი კი საფირმო გარღვევებს ასრულებდა. ლებრონს პერსონალურების რაოდენობის მხრივ შეექმნა პრობლემები, მაგრამ მაინც ყველაზე შედეგიანი იყო თავის გუნდში. გუნდის მთავარი მწვრთნელი ერიკ სპოელსტრა ასრულებს სეზონისწინა დანაპირებს და მოედანზე ყოველთვის ჰყავს ვარსკვლავური ტრიოს მინიმუმ ერთი წევრი, რაც მეტოქეებს მუდმივ დაძაბულობაში ამყოფებს.
დიდი შესვენების შემდეგ მოედანზე არაფერი შეცვლილა და სხვაობა მხოლოდ იზრდებოდა. "მაიამიმ" მაღალ დონეზე ითამაშა და პრეტენზიები განაცხადა ლიგის ყველაზე კარგი დაცვითი გუნდის სტატუსზე.
* * *
"მემფისთან" სენსაციური საშინაო მარცხის გამო "გაბრაზებული" "დალასი" კალიფორნიაში სტუმრობდა "კლიპერსს", რომელიც კვლავაც მოუგებლად თამაშობს სეზონის სტარტზე. მართალია, ბატლერისა და კიდის მონდომებით "მავერიქსი" დებიუტშივე გაიქცა, მაგრამ მასპინძლებმა მალე გაანათანაბრეს თამაში და პრაქტიკულად მთელი პირველი ტაიმი ქულა ქულაში თამაში მიდიოდა. ვინი დელ ნეგროს გუნდში ჩინებული "სოლო" ჰქონდა დეანდრე ჯორდანს, რომლის წყალობითაც გაბათილდა 10-ქულიანი ჩამორჩენა.
შესვენების შემდეგ განმეორდა მატჩის სადებიუტო სცენარი. "კოვბოები" ისევ გაიქცნენ, მაგრამ ამჯერად "კლიპერსმა" ვეღარ შეძლო ფავორიტის დაწევა. კარგად იმოქმედა პერიმეტრზე სტუმართა დაცვამ და ამის შედეგია მასპინძლების დაბალი პროცენტი სამქულიანებში - 20. "კლიპერსის" მაღლები ასე თუ ისე იბრძოდნენ სამწამიანში და მოხსნებიც ბლომად დააგროვეს, მაგრამ დაცვაში დირკ ნოვიცკისა და ბრენდან ჰეივუდის კარგმა თამაშმა ეს მოხსნები ქულებად ვერ აქცია. როგორც კი კალიფორნიელები გაქცევას დააპირებდნენ, მაშინვე "მავერიქსის" სნაიპერები მორიგ დარტყმას აყენებდნენ მასპინძლებს.
* * *
"ოკლაჰომა" ცუდ დროს გადაეყარა "იუტას". "ჯაზმენებმა" ორი წაგებით დაიწყეს ჩემპიონატი და განსაკუთრებულად მოტივირებულნი შეხვდნენ "თანდერთან" გასვლით მატჩს. "იუტამ" იდეალური გუნდური თამაში აჩვენა. მართალია, მასპინძლები თავიდან ღირსეულ წინააღმდეგობას უწევდნენ მეტოქეს, მაგრამ "ჯაზი" ტემპის დაგდებას არ ფიქრობდა. დერონ უილიამსმა, როგორც იქნა, ჩვეულ დონეზე უხელმძღვანელა თავისიანების შეტევებს, მილსეპმა და ჯეფერსონმა კი გადათელეს "ოკლაჰომას" მაღლები. გადამწყვეტი აღმოჩნდა მეორე მეოთხედის შუა ნაწილი, როცა სტუმრების სასტარტო ხუთეულმა 23:7 გაქცევა მოაწყო და "იუტა" დიდი შესვენებისთვის 56:40 დაწინაურდა.
მეორე ტაიმში მატჩის სურათი არ შეცვლილა. რასელ უესტბრუკის და კევინ დურანტის წინააღმდეგ კარგად მოქმედებდა ჯერი სლოუნის საათივით აწყობილი მექანიზმი. გარკვეულ პერიოდებში "თანდერი" ჩვეულ ლამაზ კალათბურთს აჩვენებდა, მაგრამ ჯეფერსონი და მაილზი არანაკლებ ეფექტურად პასუხობდნენ მასპინძლებს და კევინ დურანტის მონდომება წყალში იყრებოდა. ორი მაჩვენებელი კარგად ასახავს "იუტას" უპირატესობას - ამ გუნდის მოთამაშეებმა 32 შედეგიანი პასი შეასრულეს, "ოკლაჰომამ" - 10. გარდა ამისა, "ჯაზმენებმა" 66 პროცენტის სიზუსტით ისროლეს სამქულიანები, "თანდერმა" - 25 პროცენტით.
* * *
"გოლდენ სტეიტი" ასპროცენტიანი მაჩვენებლით შეხვდა "ლეიკერსთან" შეხვედრას, თუმცა ისიც გასათვალისწინებელია, რომ აქამდე "მეომრებმა" სუსტი "კლიპერსი" და უფორმო "ჰიუსტონი" დაამარცხეს და როგორც კი ჩემპიონების კარგ დაცვას წააწყდნენ, მაშინვე ყველაფერი მოიშალა. პაუ გასოლმა და ლამარ ოდომმა ფართან მისასვლელი გზები გადაკეტეს და ვინც ამ დაცვის გარღვევას ახერხებდა, ბოლო მომენტში სიზუსტე ღალატობდა.
"ლეიკერსმა" მთლიანად გამოთიშა ბრძოლას დევიდ ლი - ყოფილმა ნიუიორკელმა ერთი ქულაც ვერ აიღო. ამას დაემეტა სტივენ კარის არყოფნა, რომელიც თამაშს ტრავმის გამო ტოვებდა. თითქმის მთელი მატჩი 20-ქულიანი სხვაობა იყო შენარჩუნებული. მხოლოდ ერთხელ მიუახლოვდა "გოლდენ სტეიტი" მეტოქეს 12 ქულამდე, ოღონდ ამ დროს მოედანზე არ იყო "ლეიკერსის" სასტარტო ხუთეული. მათი დაბრუნების შემდეგ ყველაფერი თავის ადგილას დადგა.
ფილ ჯექსონის გუნდს "ნიუ ორლეანთან" ერთად სამიდან სამი მოგება აქვს და ჯერჯერობით უდანაკარგოდ თამაშობს.
ნიუ ჯერსი-მაიამი 78:101
18:29, 24:29, 19:27, 17:16
ნ-ჯ: ლოპესი (20+5 მოხსნა), ჰარისი (13+6 პასი), ფეივორსი (13+13 მოხსნა), უილიამსი (11).
მ: ჯეიმსი (20+7 მოხსნა+7 პასი), ბოში (18), უეიდი (17+7 მოხსნა+ 6 პასი), აროიო (12+5 მოხსნა), ჰაუსი (11), ილგაუსკასი (10).
კლიპერსი-დალასი 83:99
23:27, 24:22, 19:29, 17:21
კ: გრიფინი (16+9 მოხსნა), კამანი (13+13 მოხსნა), ჯორდანი (10+5 მოხსნა).
დ: ბატლერი (17), ნოვიცკი (16+7 მოხსნა+3 დაფარება), ტერი (15+5 პასი), კიდი (13+9 მოხსნა+7 პასი), მერიონი (12), ჰეივუდი (10+6 მოხსნა+3 დაფარება).
ოკლაჰომა-იუტა 99:120
23:27, 17:29, 34:35, 25:29
ო: დურანტი (28), უესტბრუკი (22+5 პასი+4 ჩაჭრა), გრინი (17+9 მოხსნა).
ი: მილსეპი (30+6 პასი), ჯეფერსონი (23), მაილზი (21), კირილენკო (19), უილიამსი (16+6 მოხსნა+16 პასი).
ლეიკერსი-გ. სტეიტი 107:83
34:14, 22:24, 25:26, 26:19
ლ: პ. გასოლი (26+12 მოხსნა), ბრაიანტი (20+7 მოხსნა), ოდომი (16+14 მოხსნა+6 პასი).
გ-ს: ელისი (20), დ. რაიტი (18+5 მოხსნა), ბ. რაიტი (11).
ყოველდღიური სპორტული გაზეთი
"ლელო"
