როგორც მოსალოდნელი იყო, "ბოსტონ სელტიქსის" კაპიტანმა პოლ პირსმა მშობლიურ კლუბში დარჩენა გადაწყვიტა. ვეტერანმა ოთხწლიანი კონტრაქტი გააფორმა "კელტებთან". ხელშეკრულების ფინანსური პირობები არ გახმაურებულა, მაგრამ The Boston Herald-ის ცნობით, პირსი დაახლოებით 61 მილიონ დოლარს მიიღებს. კალათბურთელმა აღიარა, რომ სხვაგან გადასვლა არც უფიქრია, თუმცა ისიც აღნიშნა, რომ კლუბს მძიმე მუშაობა მოუწევს თამაშის ხარისხის გასაუმჯობესებლად.
"ვფიქრობ, ჯერმეინ ო'ნილის გაფორმება სწორი ნაბიჯი იყო. თუ რაშიდ უოლასი კარიერის დასრულებას გადაწყვეტს, მას სწორედ ჯერმეინი შეცვლის.
ძალიან ბევრი მუშაობა დაგვჭირდება ახალი გუნდის ასაწყობად. დავკარგეთ ტონი ალენი, ჩვენთან არ
შეგახსენებთ, რომ "ბოსტონმა" უფრო ადრე რეი ალენი შეინარჩუნა, ხოლო ამ გუნდის ერთადერთი ახალი კალათბურთელი ჯერმეინ ო'ნილი გახლავთ.
კიდევ ერთი ახალწვეული ჰყავს "მაიამი ჰიტს". ლებრონ ჯეიმსისა და კრის ბოშის შემდეგ, ფლორიდელთა რიგებში ჩაირიცხა "ვაშინგტონ უიზარდსის" ყოფილი მოთამაშე მაიკ მილერი. კალათბურთელმა განაცხადა, რომ მოლაპარაკებები დასრულდა და "ჰიტთან" ხუთწლიანი კონტრაქტს მოეწერა ხელი. ხელშეკრულების ფინანსურ მხარეზე არაფერი თქმულა.
გასულ სეზონში მილერმა რეგულარულ ჩემპიონატში 54 მატჩი ჩაატარა და საშუალოდ 10.8 ქულითა და 6.2 მოხსნით დაეხმარა დედაქალაქურ კლუბს.
ამასობაში, "მაიამის" გრანდიოზულმა ტრანსფერებმა კალათბურთში დაბრუნების სურვილი გაუღვიძა საყოველთაოდ ცნობილ ანფერნი ჰარდუეის. 39 წლის მცველმა ადგილობრივი რადიოსთვის მიცემულ ინტერვიუში ბოშთან, უეიდთან და ლებრონთან თამაშის სურვილი გამოთქვა.
"ფსიქოლოგიურად და ფიზიკურად კარიერა დავასრულე, მაგრამ, როცა "მაიამიში" ბოშისა და ჯეიმსის მისვლის შესახებ შევიტყვე, ვიგრძენი, რომ შემიძლია ამ გუნდის შემადგენლობის შევსება", - აცხადებს ანფერნი.
ჰარდუეიმ ხაზი გაუსვა იმას, რომ მუხლებთან დაკავშირებული პრობლემები აღარ აწუხებს (სწორედ ამ მიზეზით დაასრულა მან კარიერა), ფიზიკური მომზადების მხრივ კი შესანიშნავად არის საქმე - ვეტერანი კვირაში ოთხჯერ ინდივიდუალურ ვარჯიშებს ატარებს.
ანფერნი კალათბურთიდან 2007 წელს სწორედ "მაიამის" მოთამაშის რანგში წავიდა.
არ დადასტურდა ჭორი ლუის სკოლას ევროპაში დაბრუნების შესახებ. მართალია, ოფიციალურად არ დადასტურებულა, მაგრამ უკვე თამამად შეიძლება იმის თქმა, რომ არგენტინელი ცენტრი "ჰიუსტონ როკეტსში" დარჩება. როგორც გაზეთი Houston Chronicle ამტკიცებს, ლაპარაკია ხუთწლიან კონტრაქტზე, რომლის ღირებულება 47 მილიონ დოლარს შეადგენს.
გასულ სეზონში ლუისმა რეგულარული ჩემპიონატის ყველა მატჩში ითამაშა და საშუალოდ 16.2 ქულა და 8.6 მოხსნა დააგროვა.
ეროვნული საკალათბურთო ასოციაციის კლუბი "გოლდენ სტეიტ უორიორზი" სარეკორდო თანხად გაიყიდა. გუნდის ახალი მფლობელები გახდნენ ჯო ლეიკობი და პიტერ გუბერი. როგორც სააგენტო AP წერს, მათ ეს გარიგება 450 მილიონი დოლარი დაუჯდათ, რაც ლიგის ისტორიაში სარეკორდო მაჩვენებელია.
მანამდე ყველაზე ძვირადღირებულ გარიგებად 2004 წელს "ფინიქს სანზის" 401 მილიონ დოლარად შეძენა მიიჩნეოდა.
