არასტაბილურ თამაშს აგრძელებს "დალას მავერიქსი". ორი დღის წინ საკუთარ მოედანზე "ლეიკერსის" დამარცხების შემდეგ "კოვბოებმა" აღმოსავლური ტურნე დაიწყეს და სტუმრად "ჩიკაგოს" ეწვივნენ. "დალასმა" გუშინ არა "ხარებთან", არამედ უშუალოდ დერიკ როუზთან წააგეს. კარლოს ბუზერის არყოფნაში "ჩიკაგოს" შეტევა ერთი მსახიობის თეატრს დაემსგავსა, სადაც მთავარი როლი "ბულზის" გამთამაშებელს ეკუთვნოდა. საკმარისია იმის თქმა, რომ როუზი თავის გუნდში ერთადერთი იყო, ვინც ათქულიანი ზღვარი გადალახა.
"დალასი" ბოლომდე იბრძოდა. ამ გუნდის ლიდერ დირკ ნოვიცკის პარტნიორებისგან უფრო მეტი დახმარება ჰქონდა, ვიდრე როუზს, მაგრამ ეს საკმარისი არ აღმოჩნდა წარმატების მისაღწევად.
ასევე სულ მცირედი არ ეყო "ფილადელფიას". "სიქსერზმა" გუშინ "შარლოტის" შეტევებს ვერ გაუძლო. თითქმის მთელი დრო მოედანზე თანაბარი თამაში მიდიოდა, მაგრამ ამასთან, "ბობკეტსი" მუდმივად ინარჩუნებდა ანგარიშში მცირე უპირატესობას.
"შარლოტის" რიგებში მოულოდნელად მთავარი დამრტყმელი ძალა გახდა დი ჯეი ოგუსტინი - 31 ქულით ის ორივე გუნდში ყველაზე შედეგიანი კალათბურთელი იყო. მიმდინარე სეზონში "შარლოტის" დაცემის ერთ-ერთ მიზეზად რეიმონდ ფელტონის "ნიუ იორკში" გაშვებასა და აქცენტის ოგუსტინზე გადატანას მიიჩნევდნენ, მაგრამ ბოლო პერიოდში დი ჯეი ამტკიცებს თავის კლასს. სხვა საქმეა, რომ ამ კალათბურთელს ჯერ სტაბილურობა აკლია.
რაც შეეხება "ფილადელფიას", მატჩის ბოლოს მან მინიმუმ ოვერტაიმის შანსი გაუშვა ხელიდან და ამაში დამნაშავე ანდრე იგუოდალა იყო. საფინალო სირენამდე 40 წამით ადრე, 91:94-ზე "სიქსერზის" ლიდერმა სამი ჯარიმის უფლება მიიღო, პირველი ორი ჩააგდო, მესამე ააცილა და ამის შემდეგ სტუმრები მეტოქეს ვეღარ დაეწივნენ.
დღის ყველაზე შედეგიანი კალათბურთელი კი ერიკ გორდონი გახდა. "კლიპერსის" მცველმა "პორტლენდთან" მატჩში ზუსტი სამქულიანების რაოდენობით პირადი რეკორდი დაამყარა - მან 11-დან 7 შორეული ტყორცნა გამოიყენა, სულ თამაშიდან 13-ჯერ (26-დან) ჩააგდო და 35 ქულა დააგროვა. თუმცა ვერც მისმა შედეგიანობამ და ვერც ბლეიკ გრიფინის მორიგმა ფანტასტიკურმა ორმაგმა დუბლმა ვერ უშველა "კლიპერსს". საფინალო სირენამდე 4 წუთითა და 39 წამით ადრე კალიფორნიელებმა 9:2 გაქცევა მოაწყვეს და სამ ქულამდე შეამცირეს სხვაობა (89:92), მაგრამ შემდეგ "პორტლენდის" საფინიშო სპურტი გამოეპარათ (16:4). ასე შეწყდა "კლიპერსის" სამმატჩიანი მოგებათა სერია, "ბლეიზერსმა" კი ზედიზედ მეოთხედ მოიგო.
შარლოტი-ფილადელფია 100:97
30:27, 26:23, 18:18, 26:29
შ: ოგუსტინი (31+8 პასი), მუჰამედი (15+7 მოხსნა), ჯექსონი (14), ჰენდერსონი (11).
ფ: იანგი (21+6 მოხსნა), იგუოდალა (19+5 მოხსნა+5 პასი), ჰოლიდეი (13+7 პასი), ბრენდი (12+10 მოხსნა), უილიამსი (11+6 პასი).
ჩიკაგო-დალასი 82:77
19:20, 25:15, 12:25, 26:17
ჩ: როუზი (26+9 პასი+7 მოხსნა), ტომასი (9+11 მოხსნა), დენგი (7+12 მოხსნა).
დ: ნოვიცკი (19), ჩენდლერი (12+12 მოხსნა), სტივენსონი (12), ტერი (12).
პორტლენდი-კლიპერსი 108:93
23:27, 32:23, 29:21, 24:22
პ: ოლდრიჯი (28+8 მოხსნა), მეტიუზი (28+5 პასი), ფერნანდესი (17), მილერი (15+8 მოხსნა+7 პასი), ბატუმი (10).
კ: გორდონი (35+5 მოხსნა), გრიფინი (20+18 მოხსნა), დევისი (16+6 პასი).
.
