NBA. რეგულარული ჩემპიონატი: კარის 40-მა ლებრონის 25 გადაფარა

ეროვნული საკალათბურთო ასოციაციის ჩემპიონმა და გასული სეზონის MVP-მ რიხით დაიწყეს ახალი რეგულარული ჩემპიონატი.

"გოლდენ სტეიტმა" არანაირი შანსი არ დაუტოვა "ნიუ ორლეანსა" და მის ლიდერს ენტონი დევისს, მიუხედავად იმისა, რომ 20 შეცდომა დაუშვა და 29-ჯერ დაჯარიმდა. ეს ნაკლი გადაფარა მეტოქის ფარზე 21-მა მოხსნამ და, რა თქმა უნდა, სტივენ კარის გენიალურმა თამაშმა.

კარიმ პირველივე მეოთხედში შეახსენა ყველას - ვინ არის მოქმედი MVP. მან 17-დან 9 ტყორცნა მოათავსა კალათში და 12 წუთში 24 ქულა მიითვალა.

მატჩის ბოლოს, მისი მონაგარი 40 ქულა იყო, თან ეს მაჩვენებელი უკვე მესამე მეოთხედში დააფიქსირა. როგორც გაირკვა, ეს არის ლიგის ისტორიაში მეათე შემთხვევა, როცა სეზონის პირველ მატჩში კალათბურთელმა მინიმუმ 40 ქულა აიღო.

კარი აგრეთვე შეადარეს ლეგენდარულ უილტ ჩემბერლენსაც, რომელმაც ასევე MVP-ის რანგში, 1960-61 წლების სეზონის გახსნის მატჩში 42 ქულა მიითვალა.

კარისგან განსხვავებით, ჩააგდო შეხვედრა "ნიუ ორლეანის" ლიდერმა ენტონი დევისმა. მან ოცჯერ ისროლა მეტოქის ფარის მიმართულებით და მხოლოდ ოთხი ტყორცნა იყო ზუსტი.

ამ მატჩის წინ, გაიმართა "გოლდენ სტეიტის" მოთამაშეებისთვის საჩემპიონო ბეჭდების გადაცემის ცერემონია. "მე ბეჭედი შუა თითზე გავიკეთე. ვისაც სურს, შეუძლია ეამბოროს მას", - თქვა "უორიორზის" ავსტრალიელმა ცენტრმა ენდრიუ ბოგუტმა.

სავარაუდოდ, მისი სიტყვები მიმართული იყო "კლიპერსის" მთავარი მწვრთნელის დოკ რივერსის მისამართით, რომელმაც გამოთქვა აზრი იმის შესახებ, რომ "გოლდენ სტეიტს" გამართლების ხარჯზე გახდა ჩემპიონი.

* * *
წარმატებული გამოდგა ფრედ ჰოიბერგის დებიუტი "ჩიკაგო ბულზის" მთავარი მწვრთნელის რანგში. მისი წინამორბედი ტომ ტიბოდო იმის გამო დაითხოვეს, რომ ვერ გატეხა პლეი ოფში "კლივლენდის" წინააღმდეგობა. ჰოიბერგმა კი პირველ მატჩში სწორედ ლებრონ ჯეიმსის გუნდს მოუგო.

ახალ მწვრთნელს აქტივში უნდა ჩავუწეროთ სასტარტოში ნიკოლა მიროტიჩის დაწინაურება. ჩერნოგორიელი 19 ქულით ყველაზე შედეგიანი იყო თავის გუნდში. სათადარიგოთა სკამზე გადაინაცვლა ჟოაკიმ ნოამ, რომელსაც თამაშიდან არ უსვრია და მთელი ენერგია ფარქვეშ ბრძოლასა და პასების დარიგებას შეალია.

"კლივლენდი" ბოლო წამებამდე ინარჩუნებდა ინტრიგას, მაგრამ სეზონის ერთ-ერთ მთავარ ფავორიტს შემადგენლობის სიღრმე არ ეყო - სათადარიგოებმა მხოლოდ 20 ქულა დააგროვეს, გარდა ამისა, შორს არის ოპტიმალური კონდიციებისგან კევინ ლავი, რომელმაც 17-დან 11 ტყორცნა ააცილა.

სტუმრებს არ ეყოთ ლებრონის ბრწყინვალე თამაში. "მეფემ" 25 ქულა, 10 მოხსნა და 5 შედეგიანი პასი დააგროვა, თუმცა პირადად წააგო მატჩი, როცა სირენამდე სამი წამით ადრე, ფარქვეშ შესულმა პაუ გასოლისგან ბლოკი მიიღო.

* * *
დღის მოულოდნელობა იყო ატლანტაში "დეტროიტის" გამარჯვება. არადა, სტუმრებმა თამაშიდან 38 პროცენტის სიზუსტით ისროლეს (მასპინძლებმა - 45 პროცენტით), ხოლო ბოლო რვა წუთში 20-დან 18 ტყორცნა ააცილეს. მოგება შესაძლებელი გახდა შეტევაში 23 მოხსნისა და ზუსტი სამქულიანების წყალობით.

ასევე უნდა გამოვყოთ "პისტონზის" სასტარტო ხუთეულის წევრთა შედეგიანი თამაში. თითოეულმა მინიმუმ 15 ქულა მიითვალა და ერთად "+103" ჰქონდათ სარგებლიანობის კონფიციენტი. შთამბეჭდავი იყო ფარქვეშ ანდრე დრამონდი - მან 19 მოხსნა დააგროვა.

ატლანტა-დეტროიტი 94:106
25:25, 18:23, 23:34, 28:24
ა: შრიოდერი (20), მილსეპი (19+8 მოხსნა), ტიგი (18), ჰორფორდი (15).
დ: კოლდუელ-პოუპი (21), მორისი (18+10 მოხსნა), დრამონდი (18+19 მოხსნა), ილიასოვა (16+7 მოხსნა), ჯექსონი (15+8 მოხსნა).

ჩიკაგო-კლივლენდი 97:95
26:17, 20:23, 25:28, 26:27
ჩ: მიროტიჩი (19+9 მოხსნა), როუზი (18), ბატლერი (17), სნელი (11), მური (11), გიბსონი (5+10 მოხსნა), პ. გასოლი (2+6 დაფარება), ნოა (0+9 მოხსნა).
კ: ჯეიმსი (25+10 მოხსნა), მო უილიამსი (19+7 პასი), ლავი (18+8 მოხსნა), ჯეფერსონი (10), ტომპსონი (2+12 მოხსნა).

გ. სტეიტი-ნიუ ორლეანი 111:95
39:35, 20:14, 35:26, 17:20
გ-ს: კარი (40+7 პასი), ეზელი (13), ბოგუტი (12), გრინი (10+8 მოხსნა), ბარნსი (8+9 მოხსნა).
ნ-ო: დევისი (18), სმიტი (17+9 პასი), გორდონი (14), კანინგემი (13), პერკინსი (10).

ყოველდღიური სპორტული გაზეთი "ლელო"