მანუჩარ მარკოიშვილი საქართველოს საკალათბურთო ნაკრებისთვის დიდი ძალაა. 31 წლის კალათბურთელს ქართველი გულშემატკივარი არაერთხელ გაუხარებია. მარკოიშვილმა, მსოფლიოს ჩემპიონატის შესარჩევის ორივე შეხვედრაში მიიღო მონაწილეობა. Sportall.ge მას დაუკავშირდა და სხვადასხვა საკითხებზე ინტერვიუ ჩაწერა.
- როგორ შეაფასებდით დღევანდელ მდგომარეობას ქართულ კალათბურთში?
- მე როგორც კალათბურთელს, რა თქმა უნდა, მინდა, რომ უკეთესი მდგომარეობა იყოს! ვისურვებდი, რაც შეიძლება პოპულარულს და მთელი საქართველოს მასშტაბით გავრცელებულ სპორტის ამ სახეობას, თუმცა, ეს ნამდვილად არაა ადვილი საქმე და ამის მისაღწევად დიდი ფინანსები და მეტი ჩართულობაა საჭირო.
- რას ფიქრობთ კალათბურთის
- როგორც აქტიური სპორტსმენი, ვცდილობ თავი შევიკავო კომენტარებისგან. გარკვეული პერიოდი ძალიან სკანდალურად მიდიოდა, რაც არ იყო სასიამოვნო. ჯერ გაუკრვეველია ვინ გაიმარჯვებს, თუმცა რამდენადაც ჩემთვის ცნობილია ამ ეტაპზე მხოლოდ ორ კანდიდატს აქვს წარდგენილი განაცხადი, რადგან ბატონმა მიხეილ გაბრიჭიძემ უარი განაცხადა არჩევნებში მონაწილეობაზე.
როგორც ჩანს, ახალი გუნდი აპირებს კალათბურთის სათავეში მოსვლას, მიუხედავად იმისა, რომ დიდ პატივს ვცემ ბატონ პაატა გურასპაულს, მიმაჩნია, რომ შიო ხეცურიანს განვითარების უკეთესი პროგრამა აქვს და იმ შემთხვევაში თუ გაიმარჯვებს, მჯერა, რომ შეძლებს დასახული მიზნების მიღწევას. თუმცა, ადვილი არ იქნება.
- რას იტყოდით ახალი ფორმაციის საქართველოს ნაკრებზე? როგორი შთაბეჭდილება დატოვეს ახალწვეულებმა?
- ძალიან დასანანი დანაკლისი გვქონდა გიორგი ცინცაძის და დუდა სანაძის სახით. ასევე არ გვაყვდა ევროლიგის მოთამაშეები თორნიკე შენგელია და გიორგი შერმადინი. რა თქმა უნდა, ეს შედეგზეც აისახა, თუმცა მაინც კარგი თამაშები ჩავატარეთ და გამოჩნდა, რომ ნაკრებს პოტენციალი აშკარად გააჩნია.
ძალიან მოტივირებული და ბრძოლისუნარიანი გუნდი გვყავს, მჯერა, რომ თებერვლის თამაშებს უფრო კარგად ჩავატარებთ.
- მაიკლ დიქსონზეც გკითხავთ, არის თუ არა იგი საუკეთესო ნატურალიზებული კალათბურთელი?
- მართლაც ძალიან კარგი პიროვნებაა. შეიძლება, მონაცემებით ყოფილ ნატურალიზებული მოთამაშეებს ვერ ჯობდეს, თუმცა ყველაზე მეტად იხარჯება და ნაკრების შეკრების პირველივე დღიდან ჩვენთან ერთად იყო.
ჩვენი გუნდისთვის ძალიან დიდი ძალაა, მე ძალიან მსიამოვნებს მასთან ერთად თამაში.
- ილიას ზუროსის შესახებ რას იტყოდით, უნდა დარჩენილიყო თუ არა იგი ნაკრებში?
- ძალიან მაღალი დონის და დიდი გამოცდილების მქონე მწვრთნელი გვყავს. პირადად მე, ძალიან მომწონს მისი ხედვა და სტრაგეტია. რა თქმა უნდა, ნაკრების წარმატებაში ყველაზე დიდი წვლილი მას მიუძღვის. ჩემი პირადი შეხედულებით, ზუროსი მწვრთნელად აუცილებლად უნდა დარჩენილიყო.
- თქვენი აზრით ევროპის ჩემპიონატის შემდეგ უნდა წასულიყვნენ თუ არა ნაკრების ლიდერები?
- ყველას მაგივრად პასუხს მე ვერ გაგცემთ, თუმცა საქართველოს ნაკრებს არ აქვს ფუფუნება ყველა მოთამაშე ერთად ჩაანაცვლოს. მე პირადად ვფიქრობ, რომ შემიძლია ნაკრებს კიდევ დავეხმარო და ასეც ვიქცევი.
- თქვენს ამჟამინდელ კლუბს "რეჯიო ემილიას" ძალიან ცუდი მდგომარეობა უდგას... რას იტყოდით ამის შესახებ?
- ნამდვილად ცუდი სეზონი გვაქვს და რა თქმა უნდა, ასეთ სტარტს არავინ ელოდა. თუმცა, სეზონი ჯერ კიდევ წინაა და ბევრი რამის შეცვლა და გამოსწორება შეიძლება. გუნდი გარკვეული ცვლილებები განხორციელდა იმედი მაქვს, რომ მომავალში დადებითად აისახება.
- როგორი პირობებია შექმნილი საქართველოში ახალგაზრდა კალათბურთელებისთვის? გვყავს კალათბურთელები, რომლებსაც მომავალში NBA-ში თამაში შეუძლიათ?
- წინა წლებით თუ ვიმსჯელებთ, ასეთი კარგი პირობები არასდროს არ ყოფილა ახალგაზრდებისთვის შექმნილი. თუმცა, მეტი გაფართოება და განვითარებაა საჭირო მთელი საქართველოს მასშტაბით. ნამდვილად კარგი ახალგაზრდები გვყავს და სულ მცირე ბითაძის მჯერა, რომ მალე ვიხილავთ NBA-ში.
