თორნიკე შენგელიას "ბასკონიამ" ესპანეთის ჩემპიონატის ნახევარფინალში მასპინძელი "ვალენსია" 75:73 დაამარცხა და ფინალში გავიდა.
პირველი ტაიმი "ვალენსიამ" 9 ქულით მოიგო, მესამე მეოთხედი "ბასკონიამ" უკეთ ჩაატარა, დაწინაურდა და საბოლოოდ დრამატულ მატჩში გამარჯვება მოიპოვა.
შენგელიამ, რომელსაც მარჯვენა კოჭ-წვივის ტრავმა აქვს, 26:53 წუთში 17 ქულა (6-დან 4 ორქულიანი, 1-დან 1 სამქულიანი, 8-დან 6 საჯარიმო), 4 მოხსნა, 1 პასი და 1 ჩაჭრა მიითვალა, მისი მარგი ქმედების კოეფიციენტი კი 19 იყო და ამ მაჩვენებლით მხოლოდ თანაგუნდელ ზორან დრაგიჩს (25) ჩამორჩა.
30 ივნისს, ფინალში "ბასკონია" "ბარსელონას" დაუპირისპირდება, რომელმაც საქართველოს ნაკრების ნატურალიზებული კალათბურთელის, ტედ მაკფადენის "ბურგოსს" 98:84 სძლია. მაკფადენმა "ბარსას" 10 ქულა ჩაუგდო.
შეგახსენებთ, "ბასკონია" A ჯგუფში "ბარსელონასთან" 75:81 დამარცხდა, ახლა კი რევანშის აღებისა და ოქროს მედლების მოპოვების შესაძლებლობა აქვს.
![შენგელიას 17 ქულა "პანათინაიკოსთან" "ვირტუსი" ფავორიტთან ბოლო წუთებზე დამარცხდა [VIDEO]](/pictures/image7/4c6d6a1f4963611f07c11dc3d4c1444f.jpg "შენგელიას 17 ქულა \"პანათინაიკოსთან\" \"ვირტუსი\" ფავორიტთან ბოლო წუთებზე დამარცხდა [VIDEO]")
