U18. საქართველოს ნაკრები მსოფლიოს 3×3 ჩემპიონატზე ლატვიასთან ბოლო წამებზე დამარცხდა

AutoSharing Option
საქართველოს 3×3 კალათბურთში 18-წლამდელთა ნაკრებმა მსოფლიოს ჩემპიონატი დაასრულა. ქართველებმა კვლავ ბოლო წამებზე, დასანანი მარცხი განიცადეს. მართალია, ჩვენს გუნდს და მეტოქე ლატვიასაც ჯგუფიდან გასვლის შანსი დაკარგული ჰქონდათ, თუმცა მსოფლიო პირველობის დასკვნით მატჩში ორივე გუნდი პრესტიჟისთვის თამაშობდა და ბრძოლაც უშეღავათო, საკმაოდ დაძაბული გამოვიდა.

საქართველოს ნაკრები ძირითადად მდევრის როლში იყო, თუმცა მეტოქეს უთანაბრდებოდა და რამდენჯერმე წინაც გავიდა. ფრე იყო მატჩის ბოლო წუთზეც, როცა საფინალო სირენამდე რამდენიმე წამით ადრე ლატვიელებმა ორქულიანი ჩააგდეს და შეხვედრას სათავისო წერტილი დაუსვეს - 21:19. თამაში შეწყდა, რადგან ბალტიისპირელებმა 21
ქულას მიაღწიეს.

საქართველოს ნაკრებმა, რომლის ღირსებასაც ლაშა მიქელაძე, ირაკლი სულხანიშვილი, ვოვა თავაქარაშვილი და ნიკა ნიკოლაიშვილი იცავდნენ, ულან ბატორში მიმდინარე მსოფლიოს 18-წლამდელთა ჩემპიონატზე ჯგუფში 4 მატჩი გამართა, რომელთაგანაც ბელორუსს სძლია (21:16), ხოლო აშშ-სთან (19:21), მონღოლეთთან (16:18) და ლატვიასთან (19:21) დამარცხდა. ჯგუფიდან პლეი-ოფში 2 საუკეთესო გადიოდა და ეს ადგილები 4-დან 4 მოგების მომპოვებელმა აშშ-მა და მონღოლეთმა (3-1) დაიკავეს.

საქართველოსა და ჯგუფიდან ვერგასული კიდევ 11 ნაკრებისთვის მსოფლიოს ჩემპიონატი დასრულდა. მეოთხედფინალში გასული გუნდები კი შემდეგნაირად დაწყვილდნენ:

თურქეთი - მონღოლეთი
არგენტინა - უკრაინა
რუსეთი - რუმინეთი
აშშ - იტალია

მომზადებულია Gbf.ge-ს მიხედვით
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული