“ა” ლიგის პირველი წრის ბოლო, მე-5 ტური დღეს კასპში დაიწყო. ეს გახლდათ მიმდინარე გათამაშების მთავარი მატჩი, რადგან ერთმანეთს დაუმარცხებელი გუნდები – “გრიფინი” და “რუსთავი 1991” შეხვდნენ. ქვემო და შიდა ქართლის ამ გუნდებმა დაუმარცხებლად განვლეს აქამდე 4 ტური და წრის ბოლოს ერთმანეთს შეერკინნენ.აქამდე არაერთხელ დავწერეთ და ახლა 2 სიტყვით ვიტყვით: “რუსთავი” დამოუკიდებელი საქართველოს ერთ-ერთი ყველაზე ტიტულოვანი და წარმატებული გუნდია, რომელიც გასულ სეზონში სუპერლიგაში წაფორხილდა და “ა” ლიგაში დაქვეითდა. კასპის “გრიფინი” კი გასულ შემოდგომაზე შეიქმნა, საკვალიფიკაციო მოიგო და “ა” ლიგაში ასპარეზობის
ალბათ იოლი მისახვედრია, რომ გრიფინმა რუსთავს მოუგო. დიახ, კასპის სავსე არენაზე ადგილობრივმა გუნდმა მორიგი მეტოქე დაამარცხა. გრიფინმა უმთავრეს კონკურენტ რუსთავს 104:93 (სტატისტიკა) მოუგო. ყველაფერი ბოლო პერიოდში გადაწყდა, რომელიც მასპინძლებმა 40:25 მოიგეს და ეს მონტეს მატისის დიდი დამსახურებაა. მატისმა ბოლო ათწუთეულში 3 სამქულიანი და ჯამში 15 ქულა ჩააგდო, თუმცა მარტო ის ვერას გახდებოდა, რომ არა ელაია ბიუქენენი, გიორგი რუხაძე, ვასილ ბერუაშვილი, აკაკი ლომოური და გრიფინის მოედანზე გასული ყველა დანარჩენი მოთამაშე.
რუსთავმა გააბათილა ის 13-ქულიანი ჩამორჩენა, რომელიც პირველ პერიოდში დაფიქსირდა. გოგა ცეკვავას გაწვრთნილმა ქვემოქართლელებმა მესამე პერიოდში დაწინაურებაც მოახერხეს და გადამწყვეტ ათწუთეულს 4-ქულიანი უპირატესობით შეხვდნენ. მასპინძლებს ბოლოს მეორე სუნთქვა გაეხსნათ და გუნდური თამაშით გამარჯვება გაინაღდეს. კასპელებს აკლდათ ერთ-ერთი ლიდერი – ზებედე გრეჰემი, რომელსაც ჯანმრთელობის პრობლემები შეექმნა და საქართველო დატოვა. დანაკლისი ჰქონდა რუსთავსაც, რომელსაც ასევე ამერიკელი უკანახაზელი გამოაკლდა.
გრიფინს ელაია ბიუქენენმა ულიდერა, რომელმაც 24 ქულა, 6 მოხსნა, 6 პასი, 3 ჩაჭრა და 2 დაფარება მიითვალა. მატისმა 28 ქულა მოაგროვა, ხოლო გიორგი რუხაძემ სეზონის საუკეთესო მატჩი ჩაატარა – 19 ქულა, 8 მოხსნა. 11-11 ქულა დააგროვეს აკაკი ლომოურმა და მერაბ მირზიაშვილმა. რუსთავში 29 ქულით საუკეთესო იყო გუგა პატაშური. 20 ქულა კამდინ კარფმანმა მიითვალა, ხოლო კევინ ვოილსის ანგარიშზე 18 ქულა, 6 პასი და 6 მოხსნა დაგროვდა.
მე-5 ტურის მომდევნო შეხვედრა 15 და 16 თებერვალს გაიმართება. ვერა თავისუფალი-აგრარული უნივერსიტეტების გაერთიანებულ გუნდს უმასპინძლებს, ხოლო თელავში სათამაშოდ სოხუმი-საქართველო ჩავა.
GBF
