პრინცი და პრემიერი მოაღორეს

ინგლისური გაზეთი „სანი“ ამტკიცებს, რომ ციურიხში, სადაც ხუთშაბათს ფიფამ მსოფლიოს 2018 წლის ჩემპიონი ქვეყანა დაასახელა, ყველაფერი ჩაწყობილი იყო. „დეილი მეილი“ კატეგორიულად აცხადებს, რომ მსოფლიო ფეხბურთის მმართველი ორგანიზაციის აღმასკომის წევრებმა ინგლისის დელეგაციის ხელმძღვანელებს აღუთქვეს, რომ ხმას მათ პროექტს მისცემდნენ და მოატყუეს.

წარსულში ცნობილი ფეხბურთელი იან რაიტი თავის სვეტში BBC-ს ასწორებს მიწასთან - ნეტავ ამ ხალხის სახეები დამანახა, თუ ამაყობენ, კენჭისყრამდე რამდენიმე დღით ადრე გადაცემა „პანორამაში“ ფიფას ჩინოვნიკებს მექრთამეობაში ბრალი რომ დასდეს და ქვეყანას ასეთი რამ გაუკეთესო - რაიტს ჰგონია, რომ ფიფა

გადაცემა „პანორამაზე“ გაბრაზდა და ამიტომ მისცა მსოფლიოს ჩემპიონატის მასპინძლობის უფლება რუსეთს.  „სანის“ კიდევ წერილს ჰქვია: „მსოფლიოს ჩემპიონატი მაფიის ქვეყანაში მიდის“. არის ასეთი სტატიაც: „რუსეთი: მაფიიდან რასიზმამდე ანბანის მიხედვით“. „გარდიანმა“ სხვა მხრიდან შემოუარა და ესპანეთის დელეგაციის წევრთა რისხვა გამოაქვეყნა... თუმცა, ყველაფერს, რასაც ბრიტანული პრესა წერს ჩვენ ვერ გავწვდებით და, ამიტომ ჯობს ერთი-ორ სტატიას ჩავხედოთ.

რუსეთის დელეგაციის ერთ-ერთ ხელმძღვანელს ალექსეი სოროკინს ინგლისელი კოლეგებისთვის კენჭისყრამდე საოცარი დარწმუნებით უთქვამს, ტყუილად ცდილობთ, მსოფლიოს ჩამპიონატი ჯიბეში გვიდევსო და ისე ყველაფერი აგიხდეთ - ვაშინგტონში ნამუშევარმა ყოფილმა დიპლომატმა, იცოდა რას ამბობდა. ადამიანმა, რომელიც ამ ყველაფერს ახლოდან ადევნებდა თვალს, თქვა: „ეჭვი არ მეპარება, რომ სოროკინმა კენჭისყრის შედეგები უკვე იცოდა“.

კენჭისყრის პირველ ეტაპზე ინგლისმა ორი ხმა მიიღო. ერთი, რასაკვირველია აღმასკომის ინგლისელი წევრისა იქნებოდა, მეორე კი, როგორც „სანი“ ვარაუდობს, იაპონელის. ბრიტანეთში მტკივნეულად განიცდიან იმას, რომ დამარცხდა პროექტი, რომელიც შვეიცარიაში დევიდ ბექჰემის გარდა თვით პრინცმა უილიამმა და ქვეყნის პრემიერ მინისტრმა დევიდ ქემერონმა წარადგინეს - დელეგაციას სწორედ ეს პატივცემული ადამიანები ედგნენ სათავეში. ბრიტანეთის პრინცისა და პრემიერისთვის ასეთი დამარცხება კი ერის ნამდვილი შეურაცხყოფაა. ამას დაემატა ისიც, რომ კენჭისყრის წინა დღეებში რუსეთის პრემიერი ვლადიმირ პუტინი ციურიხში საერთოდ არ ჩავიდა. რატომ? რაღაც მიზეზი კი დაასახელა, მაგრამ მაგრამ ეს ეფრო ყასიდად ჩაბუტბუტებას ჰგავდა. სამაგიეროდ, როგორც კი გაირკვა, რომ მსოფლიოს ჩემპიონატი რუსეთს მისცეს, პუტინს ფიფაში „შესარბენი“ დრო საიდანღაც აღმოაჩნდა.

BBC-ს „პანორამა“ იან რაიტის გარდა სხვებმაც ახსენეს... „არსენალის“ ლეგენდასთან ბოდიში და ვფიქრობთ, გულუბრყვილობაა იმის დაჯერება, რომ ფიფამ ინგლისელთა მართლა ძალიან მაღალი დონის პროექტი უსიამოვნო ტელეგადაცემის გამო უკუაგდო, თუმცა ესპანეთის დელეგაციის ერთ-ერთმა შეფმა ანხელ მარია ვილიარ ლონამ ამით მაინც ისარგებლა. ეს გრძელსახელიანი ადამიანი ჯერ ციურიხის სასტუმროს კულუარებში გაიძახოდა ფიფას ერთსულოვნება სამაგალითოა, ეს ორგანიზაცია თავისი რომელიმე წევრის გაშავებას არავის შეარჩენსო, შემდეგ კი ოფიციალური გამოსვლის დროსაც უთქვამს საფეხბურთო ჩინივნიკებისთვის - ხომ გახსოვთ, როგორ მოგცხეს პრესაში ჩირქი? ამ საქმეში ყველაფერი ნათელიაო.

მაგრამ, ვაგლახ, ესპანეთის დელეგაციამ ვერაფერი მოიგო. მსოფლიოს ჩემპიონატი ფიფამ რუსეთს მისცა და, რასაკვირველია, BBჩ-ს „პანორამა“ არაფერ შუაში იყო. აქვე შეგახსენებთ, რომ ადრე რუსეთი სწორედ ესპანეთს სდებდა კულუარულ გარიგებებში ბრალს: ესპანეთმა ყატარს ხმების გაცვლა შესთავაზა,  2018-ში მხარდაჭერას 2022-ის მხარდაჭერაში უცვლიდაო.

ენდი ენსონი, ინგლისელთა პროექტის აღმასრულებელი შეფი: „დევიდ დინი, დევიდ ქემერონი, დევიდ ბექჰემი, პრინცი ულილიამი და მე კენჭისყრის შემდეგ ხალხს თვალებში ვუყურებდით და ვეკითხებოდით სად წავიდა მათი ხმა, რომელსაც დაპირებულები იყვნენ. პასუხად ამოოხვრას ვიღებდით. ახლა არავის დავასახელებ, რადგან პიროვნებებისკენ თითის გაშვერა არ მინდა, მაგრამ პირდაპირ გეტყვით, ბევრმა ჩვენ მოგვატყუა. ჩვენ ექვს ხმაზე მეტს, შვიდს ან რვას ველოდით, სინამდვილეში კი ორი მივიღეთ. საბოლოოდ გაიმარჯვა ტექნიკური თვალსაზრისით ორმა ყველაზე ცუდმა პროექტმა. საუკეთესო, კი როგორც ტექნიკურად ასევე ეკონომიკური თვალსაზრისით და საყოველთაოდ ამოწონებული პრეზენტაციით, რასაკვირველია ჩვენი იყო“.  

და აი, კიდევ ერთი საინტერესო, უფრო ზუსტად კი ინგლისელთათვის გულისმომკვლელი ფაქტი: შემდეგი განაცხადის შეტანა ფეხბურთის სამშობლოს 2030 წლამდე არ შეუძლია - ფიფას როტაცია აქვს დაწესებული. და, რასაკვირველია, არანაირი გარანტია, რომ რაგინდა რა პროექტით „იმ“ ჩემპიონატის მასპინძლობის უფლებას მოიპოვებენ, არ არსებობს.