საბერძნეთი VS რუმინეთი - შემართება გამოცდილების წინააღმდეგ

15 ნოემბერს მსოფლიოს 2014 წლის ჩემპიონატის ევროპის ზონაში პლეი ოფის პირველი მატჩები გაიმართება.

საყოველთაო მოსაზრებით, საბერძნეთი-რუმინეთი ყველაზე უფერული წყვილია. თუმცა ერთ რამეს ვერ გავექცევით - ძალიან დაძაბული ორთაბრძოლა გველის, საინტერესო იქნება ტაქტიკური დუელიც.

ბოლო წლებში დიდ ფორუმებზე თამაშის გამოცდილება უფრო 2004 წლის ევროპის ჩემპიონ ბერძნებს აქვთ, ხოლო რუმინეთი უშუალოდ მსოფლიოს ჩემპიონატის ფინალურ ეტაპზე 1998 წლის მერე არ ყოფილა.

ზოგადად, რუმინელები ჯერჯერობით ვერაფრით გამოდიან იმ "ოქროს თაობის" ჩრდილიდან და ზუსტად ახლა აქვთ ამისი კარგი შანსი - საკლუბო ფეხბურთის დონე გაუმჯობესდა; ნაკრები ისეთი მოთამაშეებით არის დაკომპლექტებული, რომელთა უმეტესობაც საკმაოდ მაღალ დონეზე თამაშობს; იგრძნობა სერიოზული შემართება...

აბსოლუტურად განსხვავებული სურათია საბერძნეთის ბანაკში. იქ ფონს გასვლას დინჯად, აკადემიურად, გამოცდილების ხარჯზე შეეცდებიან. ვის მოსწონს და ვის არა, ცალკე თემაა, მაგრამ ფაქტი ჯიუტია - ბოლო წლებში ბერძნები სტაბილურად აღწევენ თავისას და დიდ ტურნირებს არ აკლდებიან.

ამჯერად საბერძნეთმა ჯგუფში პირველ ადგილზე ბოსნია გაუშვა. სამაგიეროდ, ფერნანდო სანტოსის ნაკრები ამ მატჩამდე ზედიზედ 6 მოგებით მოვიდა და თან ერთი გოლიც კი არ გაუშვია.

რუმინელებს ცოტა გაუმართლათ კიდეც, მაგრამ თავადაც იყოჩაღეს, მათ უფრო, ბევრი სერიოზული კონკურენტი ჰყავდათ უნგრეთის და თურქეთის სახით, ჯგუფში პირველ ადგილზე გასულ ჰოლანდიაზე რომ აღარაფერი ვთქვათ. რუმინელებს უკანასკნელი 6 მატჩიდან 4 მოგებული აქვთ და ასევე გოლგაუშვებლად.

"რამდენიმე ჩვენგანისთვის ეს ბოლო შანსია" - განაცხადა მათმა 32 წლის თავდამსხმელმა მარიუს ნიკულაემ.

ახლა კი "ბასტიას" 26 წლის ფორვარდს, კლაუდიუ კეშერუს მოვუსმინოთ, რომელსაც რუმინეთის ნაკრებში დებიუტი წელს ჰქონდა:

"მე ვჭამ, ვსუნთქავ, ვიძინებ და ვიღვიძებ მსოფლიოს ჩემპიონატზე ოცნებითა და ფიქრით. ფული და ბონუსები არაფერ შუაშია; სიმართლე გითხრათ, უბრალოდ, ბრაზილიაში მოხვედრა მინდა".

როგორც ხედავთ, ვიქტორ პიცურკას შეგირდები ძალიან მოტივირებულნი ჰყავს, თუმცა 57 წლის სპეციალისტს სხვა საფიქრალი ნამდვილად აქვს. ნაკრებს ცოტა ხნის წინ გამოაკლდა ნახევარმცველი მიჰაი პინტილიი. ამას კაპიტან ვლად კირიკეშის დაშავება დაემატა - "ტოტენჰემში" გადასული მცველი მინიმუმ პირველ მატჩს გამოტოვებს.

საეჭვოა "სტიაუას" კარის დარაჯის, ჩიპრიან ტატარუშანუს თამაშიც და თუ იგი მინდორზე ვერ გავა, პიცურკამ უნდა აირჩიოს - ნდობა გამოცდილ ბოგდან ლობონტს გამოუცხადოს თუ ჯო ჰარტის ნაცვლად "სიტის" კარში დაყენებულ კოსტილ პანტილიმონს. ადრიან მუტუ არ იქნება, რადგან მან ჰოლანდიასთან მატჩში სათადარიგოთა სკამზე დატოვება გააპროტესტა და მწვრთნელმა იგი ნაკრებიდან მოკვეთა.

ტრავმების პრობლემა არ აწუხებს პორტუგალიელ ფერნანდო სანტოსს. ბერძნები საბრძოლო შემადგენლობით არიან და პირველ რიგში, კოსტას მიტროღლუს იმედი აქვთ, რომელიც პირეოსში, თავისი "ოლიმპიაკოსის" არენაზე ორმაგი შემართებით ითამაშებს. მიტროღლუს საშინაო ჩემპიონატში 8 მატჩში 11 გოლი აქვს გატანილი. მას არანაკლებ ქარიზმატული გეორგიოს სამარასი და მუდამ სასარგებლო დიმიტრიოს სალპინგიდისი დაეხმარებიან.

საინტერესოა, რომ 15 ნოემბერი რუმინეთისთვის იღბლიანი თარიღია - 1989 წელს ნაკრებმა დანიას მოუგო (3:1) და 1990 წლის მუნდიალის საგზური გაიფორმა, ხოლო 2011 წელს სწორედ საბერძნეთი დაჯაბნა ამხანაგურში (3:1).

ვიქტორ პიცურკა:

"ის, რომ ჩვენ მათ არც ისე დიდი ხნის წინ მოვუგეთ, სასიამოვნო გასახსენებელია, მაგრამ ეს აბსოლუტურად სხვა მატჩებია.

ბერძნებს ძალიან კარგად ორგანიზებული, პრაგმატული გუნდი ჰყავთ, რომელმაც იცის შედეგის მიღწევა. თუმცა ჩვენ საკუთარი პლუსების გამოყენება უნდა ვცადოთ და საგარეო შეხვედრაში ერთი გოლი მაინც გავიტანოთ".

მუნდიალი 2014. შესარჩევი ციკლი. ევროპის ზონა. პლეი ოფი. I მატჩი
საბერძნეთი-რუმინეთი 23:45
სავარაუდო შემადგენლობები
საბერძნეთი (4-5-1): კარნეზისი - ვინტრა, სიოვასი, კაცურანისი, ჰოლებასი - სალპინგიდისი, კონე, ციოლისი, კარაგუნისი, სამარასი - მიტროღლუ.
რუმინეთი (4-4-2): ტატარუშანუ - მატელი, გარდოში, გოიანი, რაცი - ბუკური, ლაზარი, ბურჩეანუ, ტანასე - სტანჩუ, მარიკა.
არბიტრი: პედრო პროენსა (პორტუგალია)

საპასუხო მატჩი:
19 ნოემბერი
რუმინეთი-საბერძნეთი 23:00

ყოველდღიური სპორტული გაზეთი "ლელო"