ოთხი ერი: სიურეალისტური "ოლ ბლექსი"

ოთხი ერის გათამაშება, როგორც მოსალოდნელი იყო, ახალი ზელანდიის ნაკრებმა შესანიშნავად დაიწყო. თუმცა იმას, რაც სიდნეიში ავსტრალიის წინააღმდეგ მატჩის პირველ ტაიმში მოხდა, ძნელია, რამე დაარქვა...

გამოსავალი ისევ "ოლ ბლექსის" კაპიტანმა კირან რიდმა მოძებნა. მან შეხვედრის პირველ ტაიმს "სიურეალისტური" უწოდა. ახალზელანდიელებს იმ დღეს ყველაფერი გამოსდიოდათ და პირველი ნახევარი 40:6 მოიგეს. ეს რეკორდული ანგარიშია, რომელიც ამ გუნდებს შორის მატჩებში პირველ ტაიმში დაფიქსირებულა.

შესვენების შემდეგ ავსტრალია გამოცოცხლდა. უფრო სწორი იქნებოდა გვეთქვა, რომ "ოლ ბლექსმა" ოდნავ ჩათვლიმა. მიუხედავად ამისა, სტუმრებმა მაინც დამაჯერებლად გაიმარჯვეს - 54:34. ორ-ორი ლელო 20 წლის გარემარბმა რიკო იოანმა და შუამარბმა რაიან კროტმა მიითვალეს. ერთ-ერთი საუკეთესო იყო დებიუტანტი, ფულბეკი დამიენ მაკენზი, რომელსაც ლელოს გარეშე მოედანი არ დაუტოვებია.

"ის, რაც პირველ ტაიმში მოხდა, არარეალური იყო. ჩვენ საკუთარი თამაშის ჩვენება გვინდოდა. ყველაფერი გამოგვივიდა. ეს გამაოგნებელი იყო" - თქვა ნამატჩევს კირან რიდმა.

ავსტრალიის ნაკრებმა მეორე ნახევარში უკეთ ითამაშა. გამორჩეულები კარტლი ბილი და ტევიტა კურიდრანი იყვნენ. საპასუხო შეხვედრა ერთი კვირის თავზე ახალ ზელანდიაში გაიმართება.

დაგეგმილი გამარჯვება მიითვალა სამხრეთ აფრიკის ნაკრებმა. "ბოკემ" პორტ ელიზაბეტში, "ნელსონ მანდელა ბეი სთედიუმზე" არგენტინის ეროვნული ნაკრები 37:15 დაამარცხა.

სამხრეთაფრიკელთა თავკაცი ალისტერ კუცია შედეგით კმაყოფილია, თამაშის ხარისხით - არა.

"ვერ ვიტყვი, რომ იდეალურად გავისარჯეთ. ბევრი ხარვეზი გამოჩნდა. შერკინებამ ბრწყინვალედ იმუშავა. გამოსასწორებელი გვაქვს ფეხით ტაქტიკური დარტყმები და უკანა ხაზის თამაში. არგენტინა მებრძოლი გუნდია. ძნელია მისი გატეხვა. ვფიქრობ, ეს შევძელით, რადგან დროული და ზუსტი ცვლილებები გავაკეთეთ. ისევე, როგორც აქამდე გამართულ მატჩებში, სათადარიგოები უკეთესად გაისარჯნენ", - თქვა მან ნამატჩევს.

პირველ ტაიმში "ბოკეს" ძალიან გაუჭირდა. 37-ე წუთისთვის მასპინძლები მინიმალური სხვაობით იგებდნენ (6:5). შესვენებამდე მათ მაინც შეძლეს ერთი ლელოს გატანა და რვა ქულით დაწინაურდნენ - 13:5.

მეორე ტაიმში "ბოკე" კიდევ უფრო მრისხანედ გამოიყურებოდა და საბოლოოდ ოთხი ლელოს გატანა და საპრემიო ქულის მოპოვებაც მოახერხა. ბრწყინვალე იყო მგეზავი ელტონ იაინკისი, რომელმაც ოთხი გარდასახვა და სამი საჯარიმო მიითვალა (17 ქულა).

"ჩვენ დიდხანს ვიცავდით თავს და ცოტას ვუტევდით. დაცვა კარგად გამოგვდიოდა, მაგრამ ეს შეუძლებელია, მთელი თამაშის განმავლობაში ერთ დონეზე აკეთო ასეთ გუნდთან. ბურთს იოლად ვკარგავდით. ბევრ შეცდომას ვუშვებდით და ბოკემ ამით შესანიშნავად ისარგებლა" - თქვა ჟურნალისტებთან საუბრისას არგენტინის ნაკრების თავკაცმა დანიელ ურკადმა.

ოთხი ერი
I ტური
ავსტრალია-ახ.ზელანდია 35:54
ავსტრალია: 4ლ - რონა, კურიდრანი, ბილი, ფოლაუ. 4გ,2ს - ფოლი.
ახ.ზელანდია: 8ლ - სქუაირი, რ.იოანე (2), კროტი (2), უილიამსი, მაკენზი, სმითი. 7გ - ბარეტი

სამ.აფრიკა-არგენტინა 37:15
სამ.აფრიკა: 4ლ - სკოსანი, რუე, კოლიზი, დუ ტუა. 4გ,3ს - იაინკისი.
არგენტინა: 2ლ - ლანდახო, ბოფელი. ს - სანჩესი. გ - ერნანდესი.

II ტური
ახ.ზელანდია-ავსტრალია
არგენტინა-სამ.აფრიკა

(იბეჭდება მცირე ცვლილებით)
ყოველდღიური სპორტული გაზეთი "ლელო"