"შავი ლომი" | შეცვლილი შემადგენლობით "სელკნამთან"

სამხრეთამერიკულ ტურნეზე მყოფი "შავი ლომი" 14 აპრილს, საქართველოს დროით 22 საათზე, მეორე ამხანაგურ თამაშს გამართავს. მონტევიდეოში, "ჩარუას" სტადიონზე, ამჯერად მისი მეტოქე ჩილეს "სელკნამი" იქნება, რომლის 90% პრაქტიკულად ქვეყნის ეროვნულ ნაკრებს წარმოადგენს.

"სელკნამი" სამხრეთ ამერიკის სუპერლიგაში პირველივე გათამაშებიდან ჩაერთო, 2021 წელს რეგულარული ჩემპიონატი მესამე ადგილზე დაასრულა და ნახევარფინალში ურუგვაის "პენიაროლთან" 14:17 დამარცხდა.

შარშან ჩილელებმა მეორე ადგილი დაიკავეს, ნახევარფინალში კი არგენტინის "ხაგუარესს" 16:10 მოუგეს და ფინალში გავიდნენ, იქ კი კვლავ "პენიაროლთან" დამარცხდნენ – 13:24.

მიმდინარე გათამაშებაში "სელკნამმა" 6-იდან 2 თამაში მოიგო და 11 ქულით მე-5 ადგილზეა. მან გაიტანა 148 ქულა და 19 ლელო, თავად კი 140 ქულა და 18 ლელო მიიღო. ჩილელებმა პირველ ტურში 45:10 მოუგეს აშშ-ის "რეპტორსს", ხოლო მეორე ტურში არგენტინულ "პამპასს" 34:20 სძლიეს.

"სელკნამმა" მომდევნო 4 თამაში დათმო – არგენტინულ "დოგოსთან" 10:24, ბრაზილიურ "კობრასთან" 24:30, "პენიაროლთან" 24:35 და პარაგვაის "იაკარესთან" 11:21.

ტურნეს პირველ მატჩში არგენტინის "დოგოსის" გადახალისებულმა შემადგენლობამ "შავ ლომს" ვერაფერი დაუპირისპირა და ქართველებმა 75:19 მოიგეს. რადგან ტურნეს მიზანი ნაკრების კანდიდატებისთვის საკმარისი სათამაშო დროის მიცემაა, წინა მატჩის შემდეგ შემადგენლობაში 9 მოთამაშე შეიცვალა.

ხაზში ადგილი მხოლოდ 9 ნომერმა თენგიზ პერანიძემ შეინარჩუნა, რომელსაც მგეზავი გიორგი ბაბუნაშვილი შეუწყვილდება. ცენტრში ბრუნდებიან კაპიტანი მერაბ შარიქაძე და დემე თაფლაძე, ფრთებზე კი - სანდრო თოდუა და აკა ტაბუცაძე. ფულბეკის პოზიციაზე ვიხილავთ სოსო მათიაშვილს, რომელმაც ტრავმა მოიშუშა და ერთი კვირის წინ თამაშში მარქაფიდან ჩაერთო.

შერკინების პირველ ხაზში, მარცხენა ბურჯი კვლავ დავით აბდუშელიშვილი იქნება. კვაჭის პოზიციაზე შალვა მამუკაშვილი გამოჩნდა, ხოლო მარჯვენა ბურჯი ნიკა ხატიაშვილია. მეორე ხაზში ბრუნდება ნოდარ ჭეიშვილი და მისი მეწყვილე მიხეილ ბაბუნაშვილი იქნება. უცვლელია მესამე ხაზი – მიხეილ გაჩეჩილაძე, სანდრო მამამთავრიშვილი და ლუკა ივანიშვილი.