ახალ ზელანდიაში გასამართ მსოფლიოს თასის გათამაშებაში საქართველოს ნაკრების მეტოქემ, რუმინეთის ეროვნულმა გუნდმა მზადება რამდენიმე დღის წინ დაიწყო. "მუხის ფოთლებმა" ეს პროცესი ოთხ ეტაპად დაჰყო. პირველი ეტაპი, რომელიც კარპატების საკურორტო ქალაქ პრედალში 24 ივლისამდე გასტანს, ფიზიკური კონდიციების ამაღლებას დაეთმობა. მერე გუნდი ბრაშოვში გადაბარგდება, სადაც ერთი კვირის განმავლობაში ტექნიკურ-ტაქტიკურ მონახაზებზე იმუშავებს. მომდევნო ორ კვირას "სტეჟარი" იგივე ფუნქციების დახვეწას კონსტანცაში განაგრძობს.
რუმინელები 15 აგვისტოდან 27 აგვისტომდე ბუქარესტში დასკვნით ეტაპს გაივლიან. 20 აგვისტოს კი, ერთა თასის წლევანდელი გათამაშების გამოტოვებულ შეხვედრას უკრაინის ნაკრებთან ლვოვში გამართავენ.
სოკოლმა ერთ-ერთ რუმინულ გაზეთთან მიცემულ ინტერვიუში განაცხადა, რომ ნაკრების მწვრთნელთა შტაბი სასწრაფოდ შესაცვლელია.
"ამ მწვრთნელების ხელმძღვანელობით ნაკრებში არავითარ შემთხვევაში არ ვითამაშებ. ძალიანაც რომ მინდოდეს, მსოფლიოს თასზე თამაში, ახალ ზელანდიაში მხოლოდ ტურისტად წასვლას არ ვაპირებ. არადა, ჩვენი ნაკრები თუ მდგომარეობა რადიკალურად არ შეიცვალა, იქ ასეთად მოგვევლინება.
ყველაზე მეტად ის მაწუხებს, რომ მწვრთნელები გადაწყვეტილებას ისე იღებენ, რომ სხვების აზრზს არად დაგიდევენ. რომეო გონტინიაკი, ისევე როგორც ფრანგი მწვრთნელები, არ გვეკონტაქტება. გააკეთეთ ისე, როგორც მე გეუბნებითო, ამბობს და მორჩა!
გონტინიაკისთვის არასდროს მითხოვია გინდა თუ არა, მე უნდა ვიყო კაპიტანი-მეთქი, როგორც ეს მან განაცხადა ერთ-ერთ ინტერვიუში. ყველაფერი იქედან დაიწყო, რომ ერთა თასზე ესპანეთთან მატჩის წინ მან გუნდის ბანაკი სამი დღით დატოვა და ვარჯიშებს ტელეფონით ხელმძღვანელობდა. ცხადია, ამის გამო მეგობრულად ვუსაყვედურე. სად გაგონილა მწვრთნელი ვარჯიშს ვირტუალურად ატარებდეს. რომეოს ეს ეწყინა და მას შემდეგ ჩვენს შორის ურთიერთობა სულ უფრო გაფუჭდა.
მთელი სულითა და გულით მინდა, რომ ჩვენმა ნაკრებმა ახალ ზელანდიაში საქართველოს ეროვნულ გუნდს მოუგოს, რათა იქიდან დამარცხებულები არ დავბრუნდეთ.
გარწმუნებთ, მსოფლიოს თასზე უმძიმესი მატჩები გველის, მათ შორის საქართველოს ნაკრებთან. ქართველებმა ბოლო დროს საგრძნობი პროგრესი განიცადეს და მათი ძლევა იოლი არ იქნება, მით უფრო იმ ვითარებაში, რაც ამჟამად ჩვენს ნაკრებშია. თუმცა, მჯერა, რომ ბიჭები ყველაფერს იღონებენ მიზნის მისაღწევად", - იმედოვნებს სორინ სოკოლი.
ყოველდღიური სპორტული გაზეთი "ლელო"
