18 თებერვალს რაგბის პაბში, რომელიც პუშკინის ქუჩაზე მდებარეობს, რაგბის კავშირის პრეზიდენტის გიორგი ნიჟარაძისა და რაგბის ქომაგების ტრადიციული შეხვედრა გაიმართა. აქვე იყვნენ საქართველოს ნაკრების ახალზელანდიელი მწვრთნელები მილტონ ჰეიგი და კრის გიბსი. შეხვედრა ორ საათზე მეტხანს გაგრძელდა და ყველა საინტერესო კითხვას გაეცა პასუხი.
საქართველოს რაგბის კავშირს ახლახან დაწყებულ ოთხწლიან ციკლში ახალი სტრატეგია აქვს არჩეული, რაც ჩვენს ქვეყანაში რაგბის თვისობრივად განსხვავებული მიმართულებით განვითარებას გულისხმობს.
რაგბის კავშირსაც და ნაკრების მწვრთნელებსაც მიაჩნიათ, რომ სტრატეგია სწორადაა შერჩეული და, თუ რაგბის განვითარების ამ ეტაპს წლეულს არ გავივლით,
ამიტომ, არჩეული გეზი ყველა შემთხვევაში შენარჩუნებული იქნება.
როგორც გიორგი ნიჟარაძემ განაცხადა, რაგბის კავშირის მიზანია ქართულ კლუბებში სპონსორების მოზიდვა, რაც საქართველოს ჩემპიონატის დონეს აამაღლებს. ნაკრების მწვრთნელებს მიაჩნიათ, რომ საფრანგეთის ჩემპიონატის ფედერალ 1 და ფედერალ 2 დივიზიონებში ქართველი მორაგბეების ოსტატობა არ იზრდება და ნაკრებისთვის ნაკლებად სასარგებლონი არიან.
ამიტომ საჭიროა საქართველოს ჩემპიონატის დაფინანსების გაზრდა, რათა მოთამშეები აქ, ნაკრების მწვრთნელების მეთვალყურეობითა და რეკომენდაციებით იზრდებოდნენ.
უახლოეს დღეებში თბილისში ჩამოვა ფიზმომზადების ახალზელანდიელი მწვრთნელი, რომელთანაც რაგბის კავშირი ოთხწლიან კონტრაქტს გააფორმებს. ის ეროვნული ნაკრების გარდა იმუშავებს ასევე საქართველოს A და ყველა ასკობრივ ნაკრებებთან, ასევე კლუბებთან და სარაგბო აკადემიაში. ამასთან ერთად, მოამზადებს ქართველ სპეციალისტებს.
საქართველოს ნაკრების მწვრთნელები დაესწრებიან საქართველოს ჩემპიონატის მატჩებს. ისინი უკვე ეხმარებიან ასაკობრივ ნაკრებებს.
საქართველოს A ნაკრებს გაჰყვებიან უელსშიც, სადაც ჩვენი გუნდი სამ მატჩს გამართავს, ინგლისურ "ეიშერთან", უელსის კლუბებისა და ჩრდილოეთ უელსის ნაკრებებთან.
აღსანიშნავია, რომ ევროპის საკლუბო ტურნირებში, ანუ "ჩელენჯ კაპის" გათამაშებაში მონაწილეობა საქართველოს რაგბის კავშირს უაღრესად სასარგებლოდ მიაჩნია. ეს გათამაშება კომერციული პროექტია და ამჟამად მიმდინარეობს მის ახალ ფრომატზე მუშაობა.
ახალი ფორმატი დადგინდება 2013 წლიდან. ტურნირის ორგანიზატორებს აქვთ მოთხოვნები:
ა) სტადიონი - რაც რაგბის კავშირისთვის პრობლემად იქცა, რადგან ეროვნული სტადიონი თბილისის "დინამოს" გადასცეს კერძო მფლობელობაში, მიხეილ მესხის სახელობის სტადიონი კი ფეხბურთის ფედერაციისაა. ამ სტადიონებზე თამაში სამომავლოდ საიჯარო ქირის გადახდის შემთხვევაში იქნება შესაძლებელი.
ბ) მონაწილე კლუბს დასჭირდება 350 ათასი ევრო. ამდენი ჯდება ქვეჯგუფის ექვსი თამაში.
გ) გარანტია, რომ კლუბი მინუმიმ ხუთი წლის განმავლობაში მიიღებს მონაწილეობას ამ თასის გათამაშებაში.
საკმაოდ საინტერესო გამოდგა ნაკრების მწვრთნელების მონათხრობიც. მათ მიაჩნიათ, რომ არა მხოლოდ უკანახაზელებს, არამედ მორკინალებსაც ბევრი რამ აქვთ სასწავლი და გამოსასწორებელი.
"უნდა შეიცვალოს ქართველი მორაგბეების სათამაშო აზროვნება, თამაშის ფილოსოფია, სათამაშო აზროვნების თვალსაწიერი უნდა გაფართოვდეს. ამის გარეშე შეუძლებელი იქნება რაიმე წინსვლაზე ლაპარაკი. ეს არის ის ფუნდამენტი, რომელზედაც უნდა დაშენდეს სხვა დანარჩენი კომპონენტები.
ესაა ყველაზე მნიშვნელოვანი ეტაპი, რომელიც სწორად უნდა გავიაროთ, რადგან თუ ფუნდამენტი ახლა სწორად არ ჩავყარეთ, მომავალში ცხოვრება გვაიძულებს ისევ უკან დავბრუნდეთ. უნდა მოვახერხოთ ახალზელანდიური სარაგბო აზროვნებისა და ქართული გულის, ხასიათისა და სხვა დადებითი ქართული სარაგბო უნარ-ჩვევების სინთეზი, რომლის ნაყოფი იქნება თვისობრივად სხვა დონის ქართული რაგბი.
ეს იქნება ქართული რაგბის განვითარების ყველაზე რთული ეტაპი, რადგან ცნობიერების შეცვლა ყველაზე მძიმე პროცესია, მგრამ ამის გარეშე წარმატებები არ იქნება. ამიტომ ყველას გვმართებს მოთმინება და ყველაფრის შეფასება ამ სტრატეგიული ხედვით", - თქვა მილტონ ჰეიგმა.
ყოველდღიური სპორტული გაზეთი "ლელო"
