საქართველოს ნაკრები 17 ივნისს, გამთენიისას კოლორადოს შტატის ქალაქ დენვერში ივნისის ტესტების პირველ მატჩს ამერიკის შეერთებული შტატების ეროვნულ გუნდთან გამართავს. "ბორჯღალოსნები" დენვერში, რომელიც ზღვის დონიდან საკმაოდ მაღლა, 1600 მეტრზე მდებარეობს, 34-საათიანი, მომქანცველი მგზავრობის შემდეგ ორშაბათს ჩავიდნენ.
ყოველივე ამ პრობლემას და დროში ათსაათიან განსხვავებას, მოთამაშეთა მიკროტრავმებიც დაერთო, თუმცა მთლიანობაში თავს ყველა კარგად გრძნობს და აკლიმატიზაციის რთული პროცესის მიუხედავად, იქაურ პირობებს ნელ-ნელა ეგუებიან.
ამერიკელებთან სათამაშოდ მილტონ ჰეიგმა შემადგენლობაში, რომელმაც უკრაინის ნაკრებთან ითამაშა, შვიდი ცვლილება განახორციელა.
შერკინების პირველხაზელი დავით ზირაქაშვილი (კლერმონი) ძირითადში ითამაშებს, მას
ასევე პირველად შედგება მეორე ხაზში ვახტანგ მაისურაძისა (ალბი) და ბექა ბიწაძის (არმია) დუეტი.
როგორც "ბორჯღალოსანთა" თავკაცის ასისტენტმა ილია ზედგინიძემ აღნიშნა: "ვინაიდან ზღვის დონიდან საკმაოდ მაღლა ვიმყოფებით, შემადგენლობის შერჩევისას უპირატესობა უფრო მოძრავ მოთამაშეებს მივანიჭეთ".
საკმაოდ გამოცდილი მოთამაშეებითაა დაკომპლექტებული მესამე ხაზი. ვეტერანი გია ლაბაძე (ლა სეინი) გუნდს მგზავრობისას დაემატა, მასთან ერთად მარბიელებად გიორგი ჩხაიძე (სენ ჟუნიენი) და გივი ბერიშვილი (ლოკომოტივი) ითამაშებენ. ჩხაიძეს მსოფლიოს თასის სამ გათამაშებაში უასპარეზია, ბერიშვილს კი ამ დონეზე დებიუტი შარშან ახალ ზელანდიაში ჰქონდა.
უკანა ხაზში მგეზავის პოზიციას ისევ მერაბ კვირიკაშვილი (სენ ჟუნიენი) დაიკავებს. ლაშა ხმალაძე (ლელო) კი, რომელიც უკრაინასთან გეზავდა გუნდს, ფულბეკის პოზიციაზე გადაინაცვლებს. ამიტომ, ფულბეკი ირაკლი ყიასაშვილი (ლელო) სათადარიგოთა შორის იქნება.
ჰეიგმა ძირითად შემადეგნლობაში დააბრუნა გარემარბი ალექსანდრე თოდუა (ალბი) და შუამარბი დავით კაჭარავა (ნიცა). ამ უკანასკნელს ახალგაზრდა მერაბ შარიქაძე (ჰართპური) შეუწყვილდება, რომელიც აშშ-თან მატჩის შემდეგ სოლტ ლეიკ სიტიში გაემგზავრება და საქართველოს 20-წლამდელთა ნაკრებს შეუერთდება. იქ "უმცროსი ბორჯღალოსნები" "მსოფლიოს ახალგაზრდულ ალაფზე" პირველ შეხვედრას კანადის ნაკრებთან 18 ივნისს გამართავენ.
საქართველოს ნაკრებს მასპინძლებთან დაპირისპირებაში ცხრა ნომერი ირაკლი აბუსერიძე (ოსერი) უკაპიტნებს, რომელიც ეროვნულ გუნდში უკვე 81-ე კეპს მოიხვეჭს.
ამერიკის შეერთებული შტატების ნაკრების მთავარმა მწვრთნელმა მაიკ ტოლკინმა გუნდის შემადგენლობის დასახელებისას ყურადღება მორკინალებზე გაამახვილა. "არწივების" 22-კაციან განაცხადში ექვსი პირველხაზელია, რაც იმაზე მიუთითებს, რომ მასპინძლები ჩვენს შერკინებას უფრთხიან.
ეს ბუნებრივიცაა, რადგან ძალიან კარგად ახსოვთ, რომ ორი წლის წინათ თბილისში, მატჩის ბოლო წუთებზე სწორედ შერკინებაში დავჩაგრეთ და გამარჯვება ხელიდან გამოვსტაცეთ.
აი, რას ურჩევენ რაგბის ამერიკელი სპეციალისტები თავიანთ მოთამაშეებს:'
"ამერიკის შეერთებული შტატატების ნაკრების მორაგბეებისთვის ყველაზე მნიშვნელოვანია, ძალიან მარტივად შესასრულებელი დავალება - ბურთი ხელიდან არ გაუვარდეთ. ბიჭებო, ის ძირს არ დააგდოთ!
რატომ? ყოველ ჯერზე, როცა ეს მოხდება, მსაჯი შერკინებას დანიშნავს. ქართველების შერკინება კი ძალიან ძლიერია. მართალია, ჩვენმა გუნდმა თამაშის ამ კომპონენტში გარკვეული პროგრესი განიცადა, მაგრამ მეტოქეს ჯერ კიდევ ჩამორჩება. ასე რომ, თუ არ გინდათ პრობლემები შეგექმნათ, კვლავ გეუბნებით, ბურთი ხელიდან არ გაგივარდეთ!
სხვა კომპონენტებში ჩვენი ნაკრები ქართველებისას, თუ არ სჯობია, არც არაფერში ჩამოუვარდება. ვფიქრობთ, დერეფანში, ისევე როგორც კანადელებთან დაპირისპირებისას, ჩვენ უნდა გვქონდეს უპირატესობა.
ერთი სიტყვით, თუ სტატიკაში ვაჯობეთ და ბურთიც ვაკონტროლეთ, ქართველების დამარცხება შესაძლებელია".
ამერიკელთა თავკაცმა მესამე ხაზში დებიუტანტი ტეილორ მოკატე დააყენა. ახალგაზრდა მგეზავი ვილი ჰოლდერი, რომელმაც კანადის ნაკრებთან ძირითად შემადგენლობაში ითამაშა, თადარიგში გაამწესა. მის ნაცვლად კი ბევრად უფრო გამოცდილი როლანდ სუნიულა ითამაშებს. "არწივებს" უწინდებურად მესამეხაზელი ტოდ კლევერი უკაპიტნებს.
ამასობაში, ჩვენი მომდევნო მეტოქე, კანადის ნაკრები ტორონტოში იტალიის ეროვნულ გუნდს უმასპინძლებს. ერთი კვირის თავზე კი "ნეკერჩხლის ფოთლები" ვანკუვერთან ახლოს, ქალაქ ბარნაბიში დაგვიხვდებიან.
საქართველო-აშშ
საქართველო: 15. ლაშა ხმალაძე, 14. ირაკლი მაჩხანელი, 13. დავით კაჭარავა, 12. მერაბ შარიქაძე, 11. ალექსანდრე თოდუა, 10. მერაბ კვირიკაშვილი, 9. ირაკლი აბუსერიძე. 1. მიხეილ ნარიაშვილი, 2. რევაზ ბელქანია, 3. დავით ზირაქაშვილი, 4. ბექა ბიწაძე, 5. ვახტანგ მაისურაძე, 6. გია ლაბაძე, 7. გივი ბერიშვილი, 8. გიორგი ჩხაიძე.
16. შალვა მამუკაშვილი, 17. ირაკლი მირცხულავა, 18. ზვიად მაისურაძე, 19. გიორგი თხილაიშვილი, 20. გიორგი ბეგაძე, 21. ლაშა მალაღურაძე, 22. ირაკლი ყიასაშვილი.
აშშ: 15. კრის ვოლესი, 14. ლუკ ჰუმი, 13. პაულ ემერიკი, 12. ენდრიუ სუნიულა, 11. ჯეიმზ პატერსონი, 10. როლანდ სუნიულა, 9. მაი პეტი. 1. შონ პიტმანი, 2. კრის ბლერი, 3. ერიკ ფრეი, 4. ლუის სტანფილი, 5. ბრაიან დოილი, 6. ტეილორ მოკატე, 7. სკოტ ლავალა. 8. ტოდ კლევერი.
16. დერეკ აბსბუნი, 17. ტოლიფილი ლიუფაუ, 18. მაიკ მაკდონალდი, 19. ენდრიუ დურატოლო, 20. შონ დევისი, 21. ვილი ჰოლდერი, 22. კოლინ ჰოული.
კანადა-იტალია
კანადა: 15. ჯეიმზ პიტჩარდი, 14. კონორ ტრაინორი, 13. დი ტი ეიჩ ფან დერ მერვე, 12. მაიკ სხოლცი, 11. ფილ მაკენზი, 10. მეთ ევანსი, 9. შონ ვაითი. 1. ჰუბერ ბუდენსი, 2. მაიკ პლეტჩი, 3. ჯეისონ მარშალი, 4. ჯო სინკლერი, 5. ტაილერ ჰოტსონი, 6. ტაილერ არდრონი, 7. ჩონსი ოტული, 8. აარონ კარპენტერი.
16. ენდრიუ ტიდმანი, 17. ტომ დოლეზელი, 18. ჯონ ფელანი, 19. ნანიაკ დალა, 20. ედვარდ ფაირჰორსტი, 21. ლიამ ანდერვუდი, 22. კირან ჰირნი.
იტალია: 15. ალბერტო ბენეტი, 14. ჯოვანი ვენდიტი, 13. ანდრეა პრატიკეტი, 12. ალბერტო სგარბი, 11. ტომაზო ბენვენუტი, 10. კრისტოფერ ბარტონი, 9. ტიტო ტებალდი. 1. მიკელე რიზო, 2. ტომაზო დაპიკე, 3. მარტინ კასტროჯოვანი, 4. ჯოშოა ფურნო, 5. ანტონიო პავანელო, 6. ალესანდრო ძანი, 7. სიმონე ფავარო, 8. რობერტო ბარბიერი.
16. კარლო ფესტუჩა, 17. ლორენცო რომანო, 18. მარკო ფუსერი, 19. მაურო ბერგამასკო, 20. ედუარდო გორი, 21. რიკარდო ბოჩინო, 22. გუიდო ტონიოლატი.
ამერიკა ქარველების შერკინებას უფრთხის (იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ
საქართველოს ნაკრებმა IRB-ის რეიტინგში ერთი საფეხურით წაიწია
"ბორჯღალოსნები" - თამაშის სტილი ახალია, ოღონდ უხარისხო! [+VIDEO]
