საფრანგეთის სარაგბო ჩემპიონატის ელიტური, პირველი დივიზიონის რეგულარული გათამაშების დასრულებამდე ხუთი ტური დარჩა და პლეი ოფში გასვლისთვის ბრძოლა უკიდურესად მძაფრდება. მედლებისთვის ასპარეზობის გაგრძელების შანსი ერთბაშად ცხრა გუნდს აქვს, ამათგან ექვსი ქართველ მორაგბეთა გუნდებია. ხუთი მათგანს კი სატურნირო ცხრილის პირველი ხუთი საფეხური უკავია.
გათამაშების ლიდერი აქვსენტი გიორგაძისა და ჯაბა ბრეგვაძის "ტულონი" სტუმრად ეთამაშება პლეი ოფში მოხვედრისთვის მებრძოლ "სტად ფრანსეს". ამ ორი გუნდის დაპირისპირება, როგორი სატურნირო მდგომარეობაც უნდა ეკავოთ, ყოველთვის დიდ ინტერესს იწვევს. ორივე ფრანგული რაგბის ყველაზე ტიტულოვანი და ძველი გუნდია.
შეხვედრა პარიზში
"ტულუზი" მთელი ჩემპიონატის განმავლობაში დამაჯერებლად ლიდერობდა. თუმცა, ბოლო სამ ტურში ქვეყნის მოქმედმა ჩემპიონმა ორი მარცხი განიცადა და დავით ზირაქაშვილის "კლერმონი" წამოეწია. ამ გუნდებს შორის სხვაობა ერთ ქულამდე შემცირდა.
ტულუზელთა თავკაცმა, გი ნოვემ პარიზში შესუსტებული შემადგენლობით გადაწყვიტა თამაში, რადგან ერთი კვირის შემდეგ, "ჰაინეკენის თასის" გათამაშებაში მეოთხედფინალური მატჩი ელის. პარიზელების წინააღმდეგ არ ითამაშებენ ვილიამ სერვა, კლემან პუატრენო და ხუთრო სტენკამპი.
ამასთან ერთად ტრავმირებულნი არიან რუპენი კაუკაუ, ჰარი ბოთა, აქვსენტი გიორგაძე, ვენსან კლერი და მაქსიმ მედარი. თუმცა ისიც აღსანიშნავია, რომ ტრავმები მოიშუშეს და "სტად ფრანსესთან" ითამაშებენ ტიერი დუსოტუარი, იონ მაესტრი და ჟან-ბატისტ პუ.
საქართველოს ნაკრების შერკინების კვაჭი ჯაბა ბრეგვაძე, სავარაუდოდ, ძირითად შემადგენლობაში ითამაშებს. პირველ წრეში "ტულუზმა" შინ 18:15 მოიგო.
დავით ზირაქაშვილის "კლერმონი" სტუმრად ეთამაშება ბასკრ "ბიარიცს", რომელსაც ამ გუნდისთვის უჩვეულო ამოცანა აქვს გადასაჭრელი. ბიარიცელები დივიზიონში დარჩენისთვის იბრძვიან. ბასკებმა ზედიზედ სამი შეხვედრა მოიგეს, რაც ძირითადად გუნდში ქართული წარმოშობის ცხრა ნომერის დიმიტრი იაშვილისა და საფრანგეთის ნაკრების მესამეხაზელის იმანოლ არინორდოკის დაბრუნებას შეიძლება მივაწეროთ.
"კლერმონს" რამდენიმე ტრავმირებული მოთამაშე აკლია. გუნდის განაცხადში არც ზირაქაშვილია. პირველ წრეში "ვულკანებმა" ბასკები მშრალი ანგარიშით 41:0 დაამარცხეს.
მესამე ადგილოსანი დავით ქუბრიაშვილის "ტულონი" სტუმრად ეთამაშება დავით ხინჩაგიშვილის, ვასილ კაკოვინისა და ირაკლი ნატრიაშვილის "ბრივს", რომელსაც დივიზიონიდან გავარდნის საფრთხე ჯერ კიდევ ემუქრება. ჩვენებურთა ამ გუნდს აუცილებლად გამარჯვება სჭირდება, რადგან მომავალ სამ ტურში დივიზიონის საუკეთესო გუნდებთან, "ტულუზთან", "კლერმონთან" და "მეტრო რასინგთან უწევს თამაში.
აღსანიშნავია, რომ "ბრივი" საკუთარ მოედანზე კერკეტი კაკალია და ნებისმიერი გუნდის დამარცხება შეუძლა. ბრიველები ყველაზე გაუვალი დაცვის ხაზით ამაყობენ, თუმცა შეტევაში თამაში უჭირთ. "ტულონს" გამარჯვების მიღწევა, სავარაუდოდ, გაუჭირდება. ყველაფერი ამ გუნდის ინგლისელი მგეზავის ჯონი ვილკინსონის ფეხჩუბინობაზე იქნება დამოკიდებული.
ქუბრიაშვილი ძირითად შემადგენლობაში ითამაშებს, სავარაუდოდ, ასევე ძირითადში დაიწყებს თამაშს კაკოვინიც. პირველი წრეში "ტულონმა" შინ მოიგო - 18:3.
ანტონ ფეიქრიშვილის "კასტრი", რომელიც მეოთხე ადგილზეა და "ტულონს" შვიდი ქულით ჩამორჩება, სტუმრად ეთამაშება პარიზულ "მეტრო რასინგს", რომელიც ჩვენებურის გუნდის კონკურენტია პლი ოფში მოხვედრისთვის ბრძოლაში.
თამაში უშეღავათო, ძალიან საინტერესო იქნება, მით უფრო, რომ კასტრელები სტუმრად შესანიშნავად თამაშობენ. პარიზელებმა სამმატჩიანი მოგეგბების სერია ერთი კვირის წინ ტულონში მარცხით შეწყვიტეს და ახლა დანაკარგის ანაზღაურებას ეცდებიან.
ფეიქრიშვილი სათადარიგოთა შორის იქნება. პირველ წრეში "კასტრმა" შინ 23:19 წააგო.
"კასტრს" სამი ქულით ჩამორჩება და მე-5 ადგილზეა მამუკა გორგოძის, გიორგი ჟღენტის, მიხეილ ნარიაშვილისა და გოდერძი შველიძის "მონპელიე", რომელიც 22-ე ტურში შინ ეთამაშება ბექა შეყლაშვილის "აჟენს", რომელიც პლეი ოფში მოხვედრის შანსს ჯერ კიდევ ინარჩუნებს.
მონპელეილებმა ერთი კვირის წინ "კასტრთან" წააგეს და წინსვლა დაამუხრუჭეს, თუმცა ეჭვი არავის ეპარება, რომ საკუთარ მოედნიდან გორგოძე და კომპანია აჟენელებს გახარებულს არ გაუშვებს.
გორგოძე, ჟღენტი და შეყლაშვილი ძირითად შემადგენლობაში არიან, ნარიაშვილი და შველიძე განაცხადში ვერ მოხვდნენ. პირველ წრეში "აჟენმა" შინ 18:12 გაიმარჯვა.
გურამ კავთიძისა და ტარიელ რატიანიძის "ლიონი", რომელიც უიმედო აუტსაიდერია, შინ ეთამაშება "ბორდოს", რომელმაც წინატურში შინ გათმაშების ლიდერი "ტულუზი" დასცა. ქართველი მორაგბეები განაცხადში არ არიან. პირველ წრეში "ბორდომ" შინ 31:10 მოიგო.
I დივიზიონი
XXII ტური
მეტრო რასინგი-კასტრი, ბიარიცი-კლერმონი, მონპელიე-აჟენი, პერპინიანი-ბაიონი, ლიონი-ბორდო, ბრივი-ტულონი, სტად ფრანსე-ტულუზი.
სატურნირო მდგომარეობა
1. ტულუზი - 74 ქულა, 2. კლერმონი - 73, 3. ტულონი - 62, 4. კასტრი - 55, 5. მონპელიე - 52, 6. სტად ფრანსე - 52, 7. მეტრო რასინგი - 49, 8. აჟენი - 44, 9. ბორდო - 41, 10. ბრივი - 38, 11. ბიარიცი - 38, 12. პერპინიანი - 35, 13. ბაიონი - 34, 14. ლიონი - 26.
ყოველდღიური სპორტული გაზეთი "ლელო"
