საქართველოს ნაკრების შერკინების ბურჯი ვასილ კაკოვინი წლეულს, სეზონებს შორის შესვენებისას, საფრანგეთის გრანდში და ევროპის ერთ-ერთ საუკეთესო გუნდში, "ტულუზში" ჩაირიცხა. ცნობისთვის, ეს კლუბი საფრანგეთის ოცგზის ჩემპიონია და ოთხჯერ აქვს მოგებული ევროპის ყველაზე პრესტიჟული საკლუბო ტურნირი, "ჰაინეკენის თასის" გათამაშება.
სამწუხაროდ, ტრავმის გამო ჩვენებურს სეზონის დასაწყისი გაუცდა. მან საზარდულის ოპერაცია გაიკეთა და დებიუტი "ტულუზის" შემადგენლობაში განვლილ ტურში "აჟენთან" მატჩში ჰქონდა. საერთო აღიარებით, კაკოვინმა შესანიშნავად ითამაშა. აი, რას წერს ყოველდღიური სარაგბო გაზეთი "მიდი ოლიმპიკი" ქართველი მორაგბის შესახებ:
"მატჩის წინ "ტულუზის" მთავარი მწვრთნელი ტყუილად არ
აქვე შეგახსენებთ, რომ ამავე გაზეთის ვერსიით, კაკოვინი სიმბოლურ ნაკრებში შევიდა და შერკინების საუკეთესო მარცხენა ბურჯად დაასახელეს. მაშინ ვასო "ბრივში" თამაშობდა, რომელსაც ხელი მოეცარა და მეორე დივიზიონში დაქვეითდა.
ვასილ კაკოვინს ტულუზში დავუკავშირდით. საუბარი სამწუხარო ახალი ამბით დაიწყო. წინა დღეს, ვარჯიშზე ფეხის კუნთი გაუწყვეტია და სამი კვირა ისევ უქმობა მოუწევს.
- ფატალურად არ მიმართლებს. სეზონებს შორის შესვენებისას საზარდულის ოპერაცია გავიკეთე. მკურნალობის პროცესმა კარგად ჩაიარა, ყველაფერი თითქოს წესრიგში იყო. ჩემპიონატის ერთ შეხვედრაში ვითამაშე კიდეც. გუშინ კი ვარჯიშზე იმავე საზარდულის ოდნავ ზემოთ კუნთი გამიწყდა. ექიმები მეუბნებიან, რომ ერთ კვირაში ვარჯიშის დაწყებას შევძლებ, სამი კვირის თავზე კი ვითამაშებ კიდეც.
- ძალიან სამწუხაროა. არადა, პირველი მატჩის შემდეგ, მიუხედავად იმისა, რომ მხოლოდ ერთი ტაიმი ითამაშეთ, პრესის შესანიშნავი შეფასება დაიმსახურეთ...
- დიახ, არა მარტო პრესა, მწვრთნელებიც ძალიან კმაყოფილები იყვნენ. ორი თვეა, არ მითამაშია და მაქსიმალურად მოვინდომე, რათა ჩემი შესაძლებლობები გამომევლინა. ამასთან ერთად, კარგი ის იყო, რომ დიდი ანგარიშით მოვიგეთ. თანაც ვიცოდი, რომ ერთ ტაიმს ვითამაშებდი.
მეორე ტაიმში სამხრეთაფრიკელმა ხუთრო სტენკამპმა შემცვალა. მომდევნო ტურშიც ასე უნდა ყოფილიყო. ძირითად შემადგენლობაში ისევ მე მაყენებდნენ, მაგრამ, სამწუხაროდ, სამი კვირის განმავლობაში ისევ მკურნალობა მომიწევს.
- ხუთრო სტენკამპი ახსენეთ, რომელიც თქვენი მთავარი კონკურენტია. როგორი ურთიერთობა გაქვთ მასთან და, საერთოდ, როგორები არიან ფრანგული გრანდის მორაგბეები?
- ჩვეულებრივი, ნორმალური ადამიანები არიან. სხვა გუნდების მოთამაშეებისგან განსხვავებით, ცოტა უფრო მეტად პროფესიონალურად უდგებიან საქმეს.
- აი, სწორედ ეგ მინდოდა მეკითხა. რით განსხვავდება ერთმანეთისაგან "ბრივი" და "ტულუზი"?
- როგორც უკვე ვთქვი, აქ უფრო პროფესიული მიდგომაა ყველაფრისადმი. მაგალითად, საკუთარ მოედანზე "ტულუზს" დიდი ხანია, არ წაუგია. ეს ამ კლუბის მიმართ უმთავრესი მოთხოვნაა. ამას ითხოვენ კლუბის ხელმძღვანელებიც და გუნდის ქომაგებიც. შინაურ კედლებში მარცხი "ტულუზისთვის" წარმოუდგენელი ამბავია. ამიტომ თამაშისთვის მზადება, ყველა დეტალი უმაღლეს პროფესიულ დონეზე განიხილება. თამაშისას ყველა ბოლომდე იხარჯება.
"ბრივში" ასე არ იყო. ყველა გამარჯვებისთვის შემართული არ გახლდათ. ბევრი ცდილობდა, მხოლოდ საკუთარი თავი წარმოეჩინა და გუნდი მოიგებდა თუ წააგებდა, არ ადარდებდათ. "ტულუზში" მოთამაშეთა უმრავლესობა 7-8 წელიწადია, ერთად იბრძვის სხვადასხვა შეჯიბრებაში და ამიტომ ერთი ოჯახივითაა გუნდი შეკრული.
- თქვენ, ალბათ, ჯერ არ ხართ მთლად ტულუზელი...
- ცხადია, არა, სულ რაღაც ერთ მატჩში ვითამაშე. აი, ერთი სეზონის შემდეგ კი სულ სხვა იქნება - მართლა ტულუზელად ვიგრძნობ თავს.
- "ტულუზში" კიდევ ერთი ქართველი, ჯაბა ბრეგვაძე ირიცხება...
- ჯაბამაც ოპერაცია გაიკეთა, ცოლიც მოიყვანა. ახლა კარგადაა, ვარჯიში უკვე დაიწყო და, სავარაუდოდ, ორ თვეში თამაშსაც შეძლებს.
- საქართველოს ნაკრების ვეტერანი, შერკინების კვაჭი აქვსენტი გიორგაძეც "ტულუზში" განაგრძობს კარიერას?
- დიახ, ოღონდ არა როგორც მოთამაშე, არამედ როგორც მწვრთნელი. მას "ტულუზის"' ყველა ასაკობრივ გუნდში შერკინების კვაჭების აღზრდა აბარია. ახალგაზრდა მორაგბეებსა და ბავშვებს ამ პოზიციაზე სათამაშოდ აუცილებელ უნარ-ჩვევებს უნერგავს.
- "ტულუზის" მიზანი, ცხადია, ისევ ჩემპიონობა იქნება, თუმცა სტარტზე ერთი მატჩი მაინც წააგეთ...
- ერთი თამაში წავაგეთ სტუმრად "ბიარიცთან". ჩვენმა დამრტყმელმა ხუთი საჯარიმო ვერ გაიტანა. ამ შაბათს ასევე სტუმრად ვეთამაშებით "პერპინიანს". აუცილებლად მოვუგებთ და თანაც დიდი ანგარიშით, ვინაიდან კატალონიელებს შერკინების ორივე ძირითადი ბურჯი ტრავმირებული ჰყავთ. ჩვენი მორკინალები ძალიან დაჩაგრავენ. ჰოდა, თუ "ტულუზმა" შერკინებაში უპირატესობა მოიპოვა, დამთავრდა, მისი შეჩერება შეუძლებელია.
- შარშანდელ ჩემპიონატში შერკინების საუკეთესო მარცხენა ბურჯად დაგასახელეს. არადა, საფრანგეთის ჩემპიონატში ძალიან ბევრი მაღალი დონის ბურჯები თამაშობენ...
- დიახ, ასე იყო, თუმცა აქ გასათვალისწინებელია ერთი დეტალი. სიმბოლურ ნაკრებს იმის მიხედვით ადგენენ, ვინ რამდენი ვარსკვლავი მიიღო. ანუ ყოველ ტურში თითოეული მორაგბის თამაშს ვარსკვლავებით აფასებენ. მე 18 ვარსკვლავი დამიგროვდა, რადგან ხშირად მიწევდა თამაში.
ჩემს თანაგუნდელ სამხრეთაფრიკელ სტენკამპს კი სულ შვიდჯერ მოუწია თამაში. ამიტომაც აღმოვჩნდი მასზე წინ, თორემ სტენკამპი ჩემზე მეტად გამოცდილია და რასაც ვუყურებ, ძალიან მაგარია. ის სამხრეთ აფრიკის ნაკრების ძირითადი შემადგენლობის მოთამაშე იყო. ეს კი შემთხვევით არ ხდება.
- ტულუზში საკმაოდ ძლიერი ფეხბურთის გუნდიც ჰყავთ. რომელი უფროა პოპულარული, რაგბი თუ ფეხბურთი? ქალაქი სარაგბოა თუ საფეხბურთო?
- ტულუზი სარაგბო ქალაქია. სიგიჟემდე უყვართ რაგბი, მორაგბეებს დიდ პატივს სცემენ. სადაც უნდა შეხვიდე, მაღაზიაში, ექიმთან სავადმყოფოში, საკონსულოში ვიზისთვის და ასე შემდეგ, ყველგან რიგს გვითმობენ.
ყოველი მოგებული მატჩის შემდეგ კი ქალაქში ზეიმი იმართება. ერთი სიტყვით, შესანიშნავი გარემოა.
აღარაფერს ვამბობ იმ პირობებზე, რაც ჩვენს კლუბს გააჩნია. აბსოლუტურად ყველაფერი აქვთ, შენ მხოლოდ ითამაშე. ახლა ახალ ბაზას აშენებენ, სადაც ყველა მორაგბეს ცალკე, თავისი მოსასვენებელი ოთახი ექნება. სავარჯიშო და დასასვენებელ სხვა პირობებზე აღარაფერს ვამბობ.
- ნოემბერში საქართველოს ეროვნულ ნაკრებს ორი ტესტმატჩი აქვს სათამაშო იაპონიისა და ფიჯის ნაკრებებთან. იმედია, კლუბისგან პრობლემა არ შეგექმნება...
- ამ თემაზე ამათთან ჯერ არ მილაპარაკია. თუ გამომიძახებენ, ცხადია, ჩამოვალ. ძალიან მინდა ნაკრებში ვითამაშო. თუმცა ისიც გასათვალისწინებელია, რა მდგომარეობაში ვიქნები ჯანმრთელობის მხრივ.
ტრავმები მომეძალა და ვნახოთ, რა იქნება. ისე, იაპონია და ფიჯი ძალიან ძლიერი გუნდებია, საინტერესო იქნება მათთან თამაში. თუ მოგება გვინდა, კარგად უნდა მოვემზადოთ.
ყოველდღიური სპორტული გაზეთი "ლელო"
