შარშანდელმა ჩემპიონმა, პრეტორიის "ბლუ ბულზმა" სტუმრად, იოჰანესბურგში დაამარცხა "ლაიონზი" - 32:18. "ლურჯ ხარებს" გამარჯვება მგეზავმა იაკო პოთხიტერმა მოუტანა. მის ანგარიშზე ერთი ლელო, ორი გარდასახვა და ექვსი საჯარიმოა (27 ქულა). კიდევ ერთი ლელო პრეტორიელთაგან გარემარბმა გერხარდ ფან დერ ევერმა გაიტანა.
უნდა აღინიშნოს, რომ "ლომები" ამ მატჩში გაცილებით უკეთ გამოიყურებოდნენ, ვიდრე ზე 14-ის წლევანდელ გათამაშებაში. "ბლუ ბულზმა" მოიგო, მაგრამ ძალიან გაუჭირდა.
მერე "ბლუ ბულზის" მგეზავი ამუშავდა და მე-40 წუთიდან მოყოლებული, სამქულიანი ინტერვალებით ოთხი საჯარიმო გაიტანა - 25:5. აი, სწორედ აქ გატყდნენ "ლაიონზელები" და "ბლუ ბილზმა" წინა ტურში შინ "ჩიტაზტან" წაგების შემდეგ შელახული რეპუტაცა აღიდგინა.
მომდევნო, მეხუთე ტურში პრეტორიელები შინ მიიღებენ აუტსაიდერ "ლეოპარდსს". წესით, ამ მატჩში "ლურჯ ხარებს" პრემიალური ქულის მოპოვება არ უნდა გაუჭირდეთ.
ეჭვი არავის ეპარებოდა, რომ გათამაშების ჯერ კიდევ დაუმარცხებელი ლიდერი "ვესტერნ პროვანსი" ერთ-ერთ აუტსაიდერ "პუმასს" დიდი ანგარიშით დაამარცხებდა. "დასავლეთელებმა" შინ მეტოქეს შვიდი ლელო გაუტანეს და 54:13 მოუგეს.
გამარჯვებულთაგან ორ-ორი ლელო მესამეხაზელმა პიტერ ლავმა და გარემარბმა ხიო ეპლონმა გაიტანეს. აღსანიშნავია, რომ მგეზავმა ვილემ დე ფაალამ, რომელიც წინა ტურის მატჩში ფეხჩუბინობით გამოირჩა, ამჯერად შვიდი ლელოდნ მხოლოდ სამი გარდასახა, თუმცა სამი საჯარიმოს გატანაც მოახერხა.
მე-5 ტურში "ვესტერნ პროვანსი" სტუმრად ეთამაშება "გრიკასს" და ადვილი შესაძლებელია, პირველი მარცხიც იწვნიოს. გრიკასელებმა მეოთხე ტურში საგარეო მატჩში დაამარცხეს აუტსაიდერი "ლეოპარდსი" 41:27.
სტუმრებმა "ლეოპარდებს" ხუთი ლელო გაუტანეს. აქედან ორი გარემარბ ბიორნ ბესონის ანგარიშზეა. ყველაზე შედეგიანი კი "გრიკასის" მგეზავი პეტრუს ულიფიე იყო. მან ერთი ლელო, ხუთი გარდასახვა და ორი საჯარიმო გაიტანა (21 ქულა).
აღსანიშნავია, რომ "ლეოპარდსმა" საწყისი ნახევარი საათი მეტოქეს სერიოზული პრობლემები შეუქმნა. მეტიც, 33-ე წუთისთვის მასპინძლები 10:3-ს იგებდნენ. სწორედ ამის შემდეგ მოახერხეს გრიკასელებმა მატჩის სადავეების ხელში აღება და მეტოქეს დიდი ანგარიშით სძლიეს.
ყველაზე საინტერესო მაინც ლიდერთა ჯგუფის წარმომადგენლების "ჩიტაზისა" და "ნატალ შარქსის" დაპირისპირება გამოდგა. ჩიტაზელები, რომლებმაც პირველი ტაიმი 10:3 მოიგეს, საბოლოოდ დამარცხდნენ -13:25.
"ნატალ შარქსმა" მატჩის ბედის სათავისოდ შემობრუნება ბოლო ათ წუთში შეძლო. სტუმრებს გამარჯვება შუამარბმა პატრიკ ლამბიემ მოუტანა, რომელმაც ორი ლელო გაიტანა. ორივე თვითონვე გარდასახა. მანამდე კი ლამბიეს ორი საჯარიმოც ჰქონდა გატანილი (სულ 20 ქულა).
მომდევნო ტურში "ნატალ შარქსი" შინ "ლაიონზს" ეთამაშება. მატჩი საინტერესო უნდა გამოდგეს, რადგან "ლომები" ნელ-ნელა უმატებენ და მეტოქისთვის სერიოზული წინააღმდეგობის გაწევა ძალუძთ.
IV ტური
ლეოპარდსი-გრიკასი 27:41, ვესტერნ პროვანსი-პუმასი 54:13, ჩიტაზი-ნატალ შარქსი 13:25, ლაიონზი-ბლუ ბულზი 18:32
სატურნირო მდგომარეობა
1. ვესტერნ პროვანსი - 18 ქულა, 2. ნატალ შარქსი - 16, 3. გრიკასი - 15, 4. ბლუ ბულზი - 11, 5. ჩიტაზი - 9, 6. ლაიონზი - 6, 7. პუმასი - 5, 8. ლეოპარდსი - 2
V ტური
6 აგვისტო
ბლუ ბულზი-ლეოპარდსი, პუმასი-ჩიტაზი
7 აგვისტო
გრიაკასი-ვესტერნ პროვანსი, ნატალ შარქსი-ლაიონზი
