ნიკოლოზ ბასილაშვილი რეიტინგში ხუთი საფეხურით დაწინაურდა

ორშაბათს, ტრადიციულად, საჩოგბურთო რეიტინგები განახლდა. ცინცინატის "მასტერსზე" ორი მატჩის მოგებისა და მერვედფინალში გასვლის წყალობით, ქართველმა ჩოგბურთელმა ნიკოლოზ ბასილაშვილმა ხუთი ადგილის მოგება შეძლო და მე-60 პოზიციაზე გადავიდა.

შეგახსენებთ, რომ ნიკამ ცინცინატიში ხორვატ ბორნა ჩორიჩსა და ამერიკელ კრისტიან ჰარისონს აჯობა, რის შემდეგაც ორ სეტში დამარცხდა ასევე ამერიკელ ჯარედ დონალდსონთან.

რაც შეეხება ATP-ის კლასიფიკაციის პირველ ათეულს, აქ მნიშვნელოვანი ცვლილება მოხდა - მსოფლიოს ახალი პირველი ჩოგანი გახდა ესპანელი რაფაელ ნადალი, რომელმაც ეს სტატუსი ბრიტანელ ენდი მარეის წაართვა.

გარდა ამისა, ადგილები გაცვალეს ალექსანდრ ზვერევმა და მარინ ჩილიჩმა - გერმანელი ერთი საფეხურით ამაღლდა და მეექვსე ჩოგანია.

და კიდევ, ცინცინატში მოგების შემდეგ ბულგარელი გრიგორ დიმიტროვი ტოპ-ათეულში დაბრუნდა, ხოლო იქიდან გავარდა კანადელი მილოშ რაონიჩი.

ATP-ის კლასიფიკაციის TOP-10 ასე გამოიყურება:

1(2). რაფაელ ნადალი (ესპ) - 7 645
2(1). ენდი მარეი (ბრიტ) - 7 150
3(3). როჯერ ფედერერი (შვეიც) - 7 145
4(4). სტენ ვავრინკა (შვეიც) - 5 690
5(5). ნოვაკ ჯოკოვიჩი (სერ) - 5 325
6(7). ალესანდრ ზვერევი (გერ) - 4 470
7(6). მარინ ჩილიჩი (ხორ) - 4 155
8(8). დომინიკ ტიმი (ავსტრია) - 4 030
9(11). გრიგორ დიმიტროვი (ბულ) - 3 710
10(9). კეი ნიშიკორი (იაპ) - 3 195

(იბეჭდება მცირე ცვლილებით)
ყოველდღიური სპორტული გაზეთი "ლელო"