ქართველი ჩოგბურთელი ნიკოლოზ ბასილაშვილი დღეს, 5 აგვისტოს მონრეალის მასტერსზე ასპარეზობას იწყებს. მისი მეტოქე სერბი დუშან ლაიოვიჩი იქნება, რომელიც ამჟამად მსოფლიოს 28-ე ჩოგანია და ნიკოლოზის არ იყოს, კარიერის საუკეთესო პერიოდი უდგას.
ნიკას სერბთან აქამდე 4 შეხვედრა აქვს გამართული და მეტოქის დამარცხება 3-ში მოახერხა. პირველად ბასილაშვილი და ლაიოვიჩი 2016 წელს ავსტრიაში, კიცბუელის 250-იანი კატეგორიის ტურნირის ნახევარფინალში შეხვდნენ. ნიკამ სერბის დამარცხება საკმაოდ იოლად მოახერხა - 6:3, 6:1.
შემდეგი მატჩი იმავე წელს გაიმართა. ბეიჯინგის შეჯიბრების საკვალიფიკაციო ეტაპზე საკმაოდ რთული შეხვედრა გამოვიდა. ნიკოლოზმა ლაიოვიჩის დამარცხება
3 სეტში მოახერხა - 6:7, 7:5, 6:4.
აღნიშნული ჩოგბურთელების მესამე დაპირისპირებაც დაძაბული გამოდგა. 2018 წელს ანტალიის შეჯიბრებაზე ბასილაშვილმა ისევ სამ სეტში მოახერხა გამარჯვება - 6:4, 2:6, 5:7.
ბასილაშვილი და ლაიოვიჩი ბოლოს ერთმანეთს 2018 წლის ივლისში შეხვდნენ. ეს თამაში ლაიოვიჩმა მოიგო ორ სეტში - 7:5, 6:2. სწორედ ამ შეხვედრის შემდეგ დაიწყო ნიკოლოზ ბასილაშვილის აღმასვლა და სწორედ მაშინ მოიგო ჰამბურგის ტურნირი.
ლაიოვიჩი წელს საკმაოდ კარგად თამაშობს. საკუთარი კარიერის საუკეთესო შედეგს მიაღწია და მონტე-კარლოს მასტერსის ფინალში გავიდა, სადაც ფაბიო ფონინისთან დამარცხდა. ასევე, გასულ თვეში მოიგო 250-იანი კატეგორიის ტურნირი ხორვატიაში.
აღსანიშნავია, რომ ორივე ეს შეჯიბრება თიხის კორტებზე იმართება და ლაიოვიჩიც განსაკუთრებულად სწორედ თიხის საფარზე თამაშობს. სწორედ თიხის საფარზე, როლან გაროსის მე-3 ტურში გაუმართა დიდი ბრძოლა ალეკსანდრ ზვერევს, რომელთანაც 5 სეტში დამარცხდა - 4:6, 2:6, 6:4, 6:1, 2:6.
ნიკოლოზი კი, ავსტრალიის ღია ჩემპიონატის შემდეგ საკმაოდ არასტაბილურად გამოდიოდა, თუმცა ჰამბურგში ძალიან კარგი ჩოგბურთი ითამაშა და ზედიზედ მეორედ მოიგო აღნიშნული შეჯიბრება. თან, აღსანიშნავია ისიც, რომ ნიკოლოზი ჰარდზე უკეთესად თამაშობს, რადგან მის აგრესიულ სტილს ეს საფარი ყველაზე მეტად შეეფერება.
თან, პლუს ამას, მონრეალის ტურნირზე ნიკოლოზს მხოლოდ ერთხელ აქვს ნათამაშები. 2017 წელს ამერიკელ ერნესტო ესკობეროსთან ორ სეტში დამარცხდა - 6:7, 4:6. ეს ნიშნავს, რომ დასაცავი ქულები ბასილაშვილს არ აქვს და 1 მატჩის მოგებაც კი სარეიტინგო ქულებს შემატებს. 1 მოგების შემთხვევაშიც შესაძლოა რეიტინგში დაწინაურდეს.
უშუალოდ შეხვედრას რაც შეეხება, ალბათ, იოლი მატჩი ნიკოლოზს არ ელის. ლაიოვიჩიც შემტევი ჩოგბურთელია, თუმცა განსაკუთრებულ თვისებებს არ ფლობს. ნიკოლოზის მსგავსად, ლაიოვიჩს კარგი ჩაწოდება არ აქვს, ამიტომ ბასილაშვილს მიღებაზე, შედარებით, უნდა გაუადვილდეს თამაში. სერბი არც გათამაშებებშია ძალიან ძლიერი და ჰარდის საფარზე დაცვაც უჭირს. ფავორიტი ნიკოლოზია და იმედია, მოახერხებს კიდეც გამარჯვებას.
საინტერესო ფაქტი გახლავთ ისიც, რომ განთესილებს შორის მხოლოდ ნიკოლოზ ბასილაშვილი და დომინიკ ტიმი (4) არიან ის ჩოგბურთელები, რომლებსაც მონრეალის მასტერსზე შეხვედრა არ მოუგიათ. ნიკოლოზისგან განსხვავებით, ავსტრიელმა 5 შეხვედრა ჩაატარა.
ბასილაშვილსა და ლაიოვიჩს შორის შეხვედრა დღეს, 5 აგვისტოს, თბილისის დროით 21:30 წუთზე არის ჩანიშნული.
რაც შეეხება მონრეალის მასტერსს, მისი საპრიზო ფონდი 5 701 945 დოლარი გახლავთ. გამარჯვებული 1 049 040 დოლარსა და 1000 სარეიტინგო ქულას მიიღებს. პირველი წრის დაძლევის შემთხვევაში კი ჩოგბურთელები 45 ქულასა და 36 830-ს გამოიმუშავებენ. ტურნირის მოქმედი ჩემპიონი რაფაელ ნადალია და ასპარეზობას მეორე წრიდან იწყებს.
უცნაური თასები - რატომ აქვს ბასილაშვილის ჰამბურგის ჯილდოს ასეთი დიზაინი? [PHOTO]
![პირველი ტიტული 2021 წლის შემდეგ - ბასილაშვილი სეულის ტურნირის ჩემპიონია! [VIDEO]](/pictures/image7/f7f913be9b90e25831c1617d82586db5.jpg "პირველი ტიტული 2021 წლის შემდეგ - ბასილაშვილი სეულის ტურნირის ჩემპიონია! [VIDEO]")
