არასტაბილურობა, იმედგაცრუება და ბრწყინვალე მატჩები - ეს სამი სიტყვა ნიკოლოზ ბასილაშვილის გასულ სეზონს მთლიანად გამოხატავს.ქართველს უფრო მეტი შეეძლო, თუმცა მან სეზონი მსოფლიო რეიტინგის 26-ე ნომრად დაასრულა და ეს ცუდი შედეგი ნამდვილად არაა.
ჩვენებურს ჰქონდა შეხვედრები, სადაც აშკარა ფავორიტი იყო და უნდა მოეგო, თუმცა, სამწუხაროდ, აშკარად გამოიკვეთა ტენდენცია, რომ მას პირველ ნომრად თამაში უჭირს.
ნიკოლოზი თავს კორტზე კომფორტულად უფრო მეტად მაშინ გრძნობს, როდესაც აუტსაიდერია და არანაირი წნეხი არ აწუხებს.
ნიკამ არაერთხელ აღნიშნა, რომ მთავარ მწვრთნელ იან დე ვიტთან ერთად აქვს
დასახული მიზანი, რომელსაც დიდ სლემებზე რაც შეიძლება შორს გასვლა ჰქვია. სამწუხაროდ, მან მაქსიმუმი წელს მხოლოდ ავსტრალიის ღია პირველობასა და Us Openze-ზე დააფიქსირა, სადაც მესამე წრეში გააღწია.
იგრძნობა, რომ მას უფრო მეტი შეუძლია, თუმცა შეხვედრის მიმდინარეობისას ქართველს ჩავარდნა ეწყება, რითიც მეტოქე სარგებლობს და მატჩსაც სათავისოდ იტოვებს.
"ფორჰენდიდან" ბრწყინვალე დარტყმებს უაზრო შეცდომები ცვლის, რაც ხაზს უსვამს იმას, რომ ბასილაშვილი არასტაბილურია და თამაშის ერთ დონეზე დალაგება ესაჭიროება.
მიუხედავად ყველაფრისა, მან წელს ერთი ტიტული მაინც დაისაკუთრა. ჰამბურგში ის უძლეველია და ამ გერმანულ ტურნირზე მას აშკარად მეორე სუნთქვა ეხსნება.
მარტო გასულ წელს პაბლო კუევასთან სასწაული ტაი-ბრეიკის მოგება და წელს კორტების მასპინძელ ალექსანდრ ზვერევთან სამსეტიანი ომის მოგების გახსენება რად ღირს.
ნიკოლოზ ბასილაშვილი ალეკსანდრ ზვერევთან ტაი-ბრეიკში დამარცხდა [VIDEO]
ზვერევი: ბასილაშვილთან თამაშისას შენ ვერაფერს აკონტროლებ, ის ტურში ყველაზე აგრესიული ჩოგბურთელია
ბასილაშვილის თამაშში უდიდეს მინუსად კვლავ ცუდი ჩაწოდება და ბადესთან თამაში რჩება. გადამწყვეტ მომენტებში ის აშკარად ნერვიულობს და ვერ ახერხებს, მოწოდებით ისეთი კომფორტული სიტუაცია შეიქმნას, რომლითაც ქულას მოიგებს.
ცალკე აღნიშვნის ღირსია ორმაგი შეცდომები, რომლებიც მთელ მის კარიერას დაჰყვება. ალბათ, ეს დიდწილად იმ ტრავმის ბრალია, რომელიც მას ქრონიკულად აწუხებს. ქართველმა უკვე აღნიშნა, რომ მხარზე ოპერაციის გაკეთებას აპირებს, რათა ჩაწოდება გააუმჯობესოს.
აქვე ცალკე ბადესთან არადამაჯერებელ თამაშზეც ვთქვათ. ამ კომპონენტის გამოსწორებას ნიკოლოზი წყვილებში ასპარეზობით ცდილობს, თუმცა ჯერჯერობით ამას დიდი შედეგი არ მოაქვს.
ის უმეტესობა ტურნირზე მოლდოველ რადუ ალბოტთან ერთად იყო შეამხანაგებული და ამ დუეტმა რამდენიმე სენსაციაც გამოაცხო. საინტერესოა, რომ მიმდინარე წლის მაისში ნიკამ კარიერული რეკორდი დააფიქსირა, როდესაც მსოფლიო რეიტინგში მე-16 პოზიციას იკავებდა.
წლის ბოლოს მისი რეიტინგული ვარდნა კი იმან გამოიწვია, რომ შანხაის ტურნირზე ქულები ვერ დაიცვა, რადგან გასულ წელს ჩემპიონობა მოიპოვა და ახლა მესამე წრიდან გამოვარდა.
მომდევნო სეზონი ჩვენებურისთვის გაცილებით უკეთესი უნდა გამოდგეს და წესით, რეიტინგში წინ სერიოზულად უნდა წაიწიოს.
მას ბევრი ქულა არ აქვს დასაცავი და თუ დიდ სლემებზეც მოახერხებს წარმატებით თამაშს, შესაძლოა, სულაც ათეულში ვიხილოთ.
ფაქტი ერთია, ნიკა ყოველ თამაშზე მაქსიმუმს იღებს. მან საქართველო ბევრჯერ ასახელა და ბასილაშვილმა არაერთხელ აღნიშნა, რომ თავისი ქვეყანა ძალიან უყვარს და თავს ყველაზე კომფორტულად სამშობლოში გრძნობს.
ჩვენ ისღა დაგვრჩენია, 2020 წლის იანვარს დაველოდოთ, როდესაც ბასილაშვილისთვის ახალი საჩოგბურთო სეზონი დაიწყება და მსაჯის კოშკურიდან ხშირად გავიგოთ ფრაზა - Game, Set, Match Basilashvili.
![პირველი ტიტული 2021 წლის შემდეგ - ბასილაშვილი სეულის ტურნირის ჩემპიონია! [VIDEO]](/pictures/image7/f7f913be9b90e25831c1617d82586db5.jpg "პირველი ტიტული 2021 წლის შემდეგ - ბასილაშვილი სეულის ტურნირის ჩემპიონია! [VIDEO]")
