ციციპასის დეიდა ლეგენდარულ ჩოგბურთელს ღიად დაუპირისპირდა

"ვფიქრობ, ეს წინასწარ დაგეგმილი ამბავი იყო. ენდიმ იცოდა, რომ შეეძლო სტეფანოსის გაღიზიანება. ის გამოცდილი ჩოგბურთელია, მას ხომ უკან ამდენწლიანი კარიერა მოსდევს... ენდის მოგება ძალიან უნდოდა, რადგან ეს მისთვის ერთ-ერთი ბოლო შანსი გახლდათ, რათა კარი გამოეჯახუნებინა და ისე წასულიყო საჩოგბურთო სამყაროდან, მისი კარიერა ხომ დასასრულს დღითი დღე უახლოვდება... თუმცა მისმა ამ საქციელმა შოკში ჩამაგდო, მამაკაცები ასე არ იქცევიან.

ის მოტივირებული არა სამართლიანობით, არამედ გამაღიზიანებლობით გახლდათ. სტეფანოსმა შესვენება აიღო და საპირფარეშოში გავიდა. მინდა გითხრათ, რომ ვისაც ჩოგბურთის ელემენტარული წესები გაეგება, ეცოდინება, რომ რამდენიმეწუთიანი შესვენების მოთხოვნა სრულიად დასაშვებია. ის უკან არაფრით ხელში არ დაბრუნებულა, არც არაფერი მიუღია და არც არანაირი წესი არ დაურღვევია.

ახლა ბევრი ფიქრობს და განიცდის, რომ ეს ამბავი ციციპასს გააღიზიანებს და მასზე ცუდად იმოქმედებს, თუმცა, სიმართლე გითხრათ, ასე არაა. ის ჭკვიანი ბიჭია, ყველაფერი ირონიით მიიღო, მას დაბადებიდან ვიცნობ და ეჭვი არ მეპარება, რომ მის ირგვლივ ახლა ყველაფერი მშვენივრადაა, მაგრამ, რა თქმა უნდა, ის ფაქტი, რომ ტურნირის მიმდინარეობისას მისი სიმშვიდის არევასა და ტკივილის მიყენებას ცდილობენ, კონცენტრაციაში ხელს უშლის. მე დავდივარ სხვადასხვა ტურნირზე და მესმის განსხვავებული საუბარი. ისინი უბრალოდ ვერ აღიარებენ, რომ საბერძნეთს ასეთი დიდებული ჩოგბურთელი და ჩემპიონი ჰყავს.