თბილისში, საქართველოს პროფესიონალური კრივის კავშირისა და Boxing Group Promotion-ის ორგანიზებით, მორიგი სარეიტინგო ბრძოლები ჩატარდა. ღონისძიებას გლდანი-ნაძალადევის სპორტულმა ცენტრმა უმასპინძლა. ორთაბრძოლებში მონაწილეობა მიიღეს პროფესიონალმა მოკრივეებმა საქართველოს სხვადასხვა ქალაქის კრივის კლუბებიდან. მართალია, კრივი დიდ ინტერესს იწვევდა გულშემატკივრებში, თუმცა პანდემიის მიზეზით დაწესებული რეგულაციების გამო მათი დასწრება დარბაზში დაშვებული არ იყო. სამაგიეროდ, ყველას ჰქონდა შესაძლებლობა, დაპირისპირებები ონლაინ რეჟიმში, Boxing Group Promotion-ის "ფეისბუქის" ოფიციალურ გვერდზე ეხილა.გამორჩეული გამოდგა 62 კილოგრამ წონით კატეგორიაში მოასპარეზე მებრძოლის, გარდაბნელი აკაკი კაკრიაშვილის ასპარეზობა, რომელიც მხოლოდ მე-2 შეხვედრას ატარებდა პროფესიონალურ რინგზე.
კაკრიაშვილის
თამამად შეიძლება ითქვას, რომ ქართულ პროფესიულ კრივს პოტენციური ამომავალი ვარსკვლავი ჰყავს - ეს 21 წლის გიორგი უმეკაშვილია, რომელსაც გულშემატკივრები სოცქსელებში „რუისელ ტაისონადაც“ მოიხსენიებენ. გიორგი ნამდვილ გამანადგურებელ მანქანად ჩამოყალიბდა და დაუმარცხებელია. მის უძლიერეს დარტყმებს მეტოქეები ვერაფერს უპირისპირებენ. ამჯერად, საშუალო წონაში გამართულ ბრძოლაში, გიორგის მოწინააღმდეგე გამოცდილი თბილისელი მოკრივე გიორგი ზალიკალიანი იყო. შეხვედრამ სულ რამოდენიმე წამს გასტანა - „უმეკას“ პირველივე მძლავრი შეტევა ზალიკალიანის ღრმა ნოკაუტში ჩავარდნით დასრულდა. ეს უმეკაშვილის მე-6 პროფესიონალური ორთაბრძოლაა და ამ ექვსიდან მხოლოდ სულ პირველ, სადებიუტო ბრძოლაში გაუძლო მეტოქემ ყველა რაუნდი, დანარჩენ შეხვედრებში გიორგიმ ვადაზე ადრე მოამთავრა საქმე.
საინტერესო და უკიდურესად დაძაბული გამოდგა ორთაბრძოლა თბილისელ ნიკა გვაჯავასა და დუშელ ნიკა ბუქურს შორის. მოკრივეებმა შემართებით დაიწყეს შეხვედრა და რინგზე ვაჟკაცური კრივი გააჩაღეს. ბუქურის ახალგაზრდულ ჟინს, ძალასა და მონდომებას გვაჯავა გამოცდილებით, ტექნიკური მოქმედებებითა და კონტრშეტევებით ანეიტრალებდა. ბრძოლა გარდამავალი უპირატესობით წარიმართა, თუმცა საბოლოოდ ქულების დათვლის შედეგად მსაჯთა გადაწყვეტილებით გამარჯვება გვაჯავას მიენიჭა.
დანარჩენ ბრძოლებში დაფიქსირებული შედეგები ასეთია:
90+ კგ
დავით გოგიშვილი (ვარიანი) - არჩილ გიგოლაშვილი (თბილისი) - გაიმარჯვა გოგიშვილმა
73 კგ
ლუკა მეზურნიშვილი (თბილისი) - ვალერი გოჯიაშვილი (გურჯაანი) - გაიმარჯვა გოჯიაშვილმა
66 კგ
რატი მიგრიაული (ახალციხე) - დავით ბიძინაშვილი (გორი) - გაიმარჯვა მიგრიაულმა
66 კგ
ნიკა იუდოვი (ვარიანი) - ილია ვალიშვილი (გორი) - გაიმარჯვა იუდოვმა
73 კგ
ნიკა ბიგვავა (ანაკლია) - მერაბ ჭინჭარაული (დუშეთი) - გაიმარჯვა ბიგვავამ
76 კგ
პაატა ვარდუაშვილი (ვარიანი) - ფრიდონ ყაყიტაშვილი (გორი) - გაიმარჯვა ვარდუაშვილმა
65 კგ
გიორგი ბიბილური (გორი) - ანდრო ოთინაშვილი (გორი) - გაიმარჯვა ბიბილურმა
საქართველოს პროფესიონალური კრივის კავშირის პრეზიდენტის, გიორგი კანდელაკის თქმით, მიუხედავად ზაფხულის პერიოდისა, კრივის სარეიტინგო ორთაბრძოლების გამართვა კვლავ გაგრძელდება და მათი ჩატარების ადგილი შემდეგი თვიდან უკვე რეგიონებში გადაინაცვლებს.
წყარო: Boxing Group Promotion
