5 ფაქტი, რაც Tesla Model S-ის შესახებ აუცილებლად უნდა იცოდეთ

საკმარისია, ელექტრომობილი ახსენო, რომ დიდს თუ პატარას მაშინვე Tesla ახსენდება. ვინც ქუჩაში უხმო, მდიდრულ მანქანას დაინახავს, ჩერდება და ფიქრობს - Tesla! ამ ყველაფერს, ასე სრულყოფილად თვით ყველაზე ხმაურიანი Ferrari-ც კი ვერ ახერხებს.

ამერიკული ავტომწარმოებლის ყველაზე წარმატებული ელექტრომობილია Tesla Model S.

წარმოგიდგენთ 5 ფაქტს, რაც ამ ინოვაციური მანქანის შესახებ აუცილებლად უნდა იცოდეთ.

1. ელექტრომობილი, რომელმაც სტერეოტიპები დაამსხვრია
Model S ბიზნესკლასის სედანია, რომლითაც Tesla-მ 2012 წელს მასობრიობისკენ პირველი სერიოზული ნაბიჯი გადადგა. ეს არის ელექტრომობილი ერთი დამუხტვით გარბენის საუკეთესო რესურსით - ეკოლოგიური, პრესტიჟული და პოლიტკორექტული ავტომობილი, რომლის მფლობელი ყველგან და ყოველთვის ყურადღების ცენტრში ექცევა. რაც ყველაზე მთავარია, ერთი დამუხტვით Model S-ის რესურსი 250-დან 480 კილომეტრამდეა (გააჩნია ელემენტების ტევადობას). მისი გამოშვების შემდეგ Tesla-მ გაყიდვები არნახულად გაზარდა. Tesla Model S-მა უამრავი სტერეოტიპი დაამსხვრია და საავტომობილო მსოფლიო ფაქტობრივად თავდაყირა დააყენა.

2. ყველაზე შთამბეჭდავი ელექტრომობილი
სხვა არცერთი ავტომობილი არ გამოხატავს მობილურობის მომდევნო, მომავალ ეპოქას ისე, როგორც Tesla Model S. ეს არის მომავალი, ციფრული მაღალი საზოგადოების ავტომობილი, რომელიც, მიუხედავად იმისა, რომ სრულიად ელექტრულად დადის, ნამდვილი ბიზნესმონსტრია, რადგან დაუჯერებლად მძლავრიცაა. Tesla Model S ყველაზე შთამბეჭდავი ელექტრომობილია.

3. ლამბორგინიზე უკეთესი აჩქარება
Tesla Model S ერთ-ერთი ყველაზე კომფორტული და, რა თქმა უნდა, უხმაურო ელექტრომობილია. რაც ასევე მნიშვნელოვანია, მაღალი მაბრუნი მომენტი აქვს - მასში მთელი სიმძლავრე მყისიერად ხელმისავდომია. ამიტომაცაა, რომ ადგილიდან აჩქარებით ისეთ სუპერსპორტულ ავტომობილსაც კი აჯობა, როგორიცაა Lamborghini Aventador SV.

4. თითქმის არ საჭიროებს სერვისს
მომხმარებლისთვის განსაკუთრებით მნიშვნელოვანია, რომ Tesla Model S თითქმის არ საჭიროებს გეგმიურ სერვისს, რადგან მას დაახლოებით 90-ით ნაკლები დეტალი აქვს, ვიდრე შიგაწვისძრავიან ავტომობილებს. მაგალითად, არ აქვს გამონაბოლქვის სისტემა, სტარტერი, არც აალების სანთლები, არც გაგრილების სითხე... არ საჭიროებს ძრავის ზეთის და ზეთის ფილტრის გამოცვლას.



5. სრულყოფილი ავტომობილი ოჯახისთვის
Tesla Model S-ის მფლობელი არ არის დამოკიდებული საწვავის ფასებზე. თანაც, ერთი დამუხტვით 400-მდე კილომეტრის გავლა შეუძლია, რაც სეგმენტში აბსოლუტურად საუკეთესო შედეგია. შესაბამისად, სხვა ელექტრომობილებისგან განსხვავებით, Model S მხოლოდ ქალაქში გამოსაყენებელი ელექტრომობილი არ არის. ამ მანქანით თამამად გაემგზავრებით შორ მანძილზე. ვინც Tesla Model S-ს ფლობს, შეუძლია, თამამად იამაყოს იმით, რომ მგზავრობის დროს გარემოს არ აბინძურებს და ოდნავადაც არ აღელვებს საწვავის ფასები.

®