საქართველომ ზაფხულის ახალგაზრდული ოლიმპიური ფესტივალის შემდეგ ზამთრის ფესტივალსაც გაუღო კარი - ბაკურიანი-2025 დღეს საზეიმოდ გაიხსნა.ევროპის ზამთრის XVII ახალგაზრდული ოლიმპიური ფესტივალის გახსნის ცერემონია ბაკურიანში, ეგრეთ წოდებულ 25-იანების პარკთან გაიმართა. ეს იყო მეტად საინტერესო, ქართული ფოლკლორით და ეფექტური სცენებით გაჯერებული სანახაობა.
აღიმართა საქართველოს სახელმწიფო დროშა, შესრულდა ქვეყნის ჰიმნი.
შედგა გახსნის ცერემონიის აუცილებელი ნაწილიც - დელეგაციათა აღლუმი, სადაც განსაკუთრებული ოვაციები, რა თქმა უნდა, საქართველოს წარმომადგენლებს ერგოთ.
ოლიმპიური ფესტივალის გახსნის საზეიმო ცერემონიაზე საქართველოს მედროშეები იყვნენ სამთო-მოთხილამურეები გიორგი ჯაფარიძე და ნელი უსტიმენკო.
ოლიმპიური ფესტივალის
ევროპის ზამთრის XVII ახალგაზრდული ოლიმპიური ფესტივალი გახსნილად გამოაცხადა საქართველოს პრეზიდენტმა მიხეილ ყაველაშვილმა, რასაც ევროპის ოლიმპიური კომიტეტების დროშის შემოსვლა და შემდგომ მისი აღმართვა მოჰყვა.
წესისამებრ, ფიცი დადეს ათლეტებმა, მწვრთნელებმა და მსაჯებმა.
სტუმრებმა იხილეს რომიდან ჩამოტანილი მშვიდობის ცეცხლის მოგზაურობის ამსახველი კადრები, პარკში მისი შემოსვლა და ცერემონიის კულმინაცია - ცეცხლის დანთების ცერემონია.
გახსნის საზეიმო ცერემონიალს ესწრებოდნენ საქართველოს ეროვნული ოლიმპიური კომიტეტის, სპორტის სამინისტროს, სპორტული ფედერაციების ხელმძღვანელები, ოლიმპიური ჩემპიონები, ევროპის ოლიმპიური კომიტეტების აღმასრულებელი საბჭოს წევრები, შესაბამისი ევროპული სპორტული ფედერაციების წარმომადგენლები და სხვა ოფიციალური პირები, ვეტერანი სპორტსმენები, გულშემატკივრები.
„გახსნის ცერემონია ფესტივალის მნიშვნელოვანი ნაწილია. გვინდოდა ჩვენი სტუმრებისთვის და ფართო ტელეაუდიტორიისთვის ემოციური, დასამახსოვრებელი სანახაობა წარგვედგინა და ეს ამოცანა, ვფიქრობ, წარმატებით შევასრულეთ. ამის შესახებ თავიანთი მაღალი შეფასებები ევროპის ოლიმპიური კომიტეტების ხელმძღვანელებმაც გაგვიზიარეს. მჯერა, რომ ასევე წარმატებული იქნება თითოეული საფესტივალო დღეც“ - აღნიშნა სეოკ-ის პრეზიდენტმა ლერი ხაბელოვმა.
ოლიმპიურ ფესტივალში მედლები სპორტის 8 სახეობაში (სამთო თხილამურობა, ბიათლონი, თავისუფალი სრიალი, ფიგურული ციგურაობა, ყინულის ჰოკეი, შორტ ტრეკი, თხილამურებით რბოლა, სნოუბორდი) გათამაშდება. ფესტივალში მონაწილეობას მიიღებს 45 ქვეყნის 14-დან 18 წლამდე 1000-მდე სპორტსმენი.
საქართველო სპორტის სამ სახეობაში (ფიგურული ციგურაობა, სამთო თხილამურობა და ბიათლონი) 8 სპორტსმენით იქნება წარმოდგენილი.
წყარო: საქართველოს ეროვნული ოლიმპიური კომიტეტი
