"ტრასა მზად არის, ყველაფერი წესრიგშია, - დაადასტურა ბერნიმ. - გასულ თვეში არ მეგონა, რომ წელს კორეაში რბოლა გაიმართებოდა. რა თქმა უნდა,
ექლსტოუნი დარწმუნებულია, რომ რადგან ფორმულა 1 - მსოფლიოს ჩემპიონატია, მაშინ რბოლები პლანეტის სხვადასხვა კუთხეში უნდა გაიმართოს და ეტაპების გეოგრაფია უნდა გაფართოვდეს. ამასთან, ბერნი დაუნანებლად შეელევა ისტორიულ ტრასებს, მათ შორის ლეგენდარულ სპას. ეს იმ შემთხვევაში მოხდება, თუ ბელგიის მთავრობა ეროვნულ ეტაპს ფინანსურ დახმარებას არ გაუწევს.
"ბელგიის გრან-პრი აუცილებლად გაქრება კალენდრიდან, თუ მას მხარდაჭერას არ აღმოუჩენს ადგილობრივი მთავრობა. იგივე ისტორიაა ბრიტანეთის გრან-პრისთან დაკავშირებით. ყველაზე ცუდი ის არის, რომ ბრიტანეთის მთავრობამ უდიდესი თანხა დახარჯა მომავალი ოლიმპიადისთვის, რომელიც ორი კვირა გაგრძელდება და ერთ თვეში ყველას დაავიწყდება. ამას სჯობდა სილვერსტოუნისთვის დაეჭირათ მხარი და მისი მრავალი წლის განმავლობაში ჩატარების გარანტია მიეცათ. მით უმეტეს, რომ ოლიმპიადაზე ყველაზე საინტერესოა - გახსნისა და დახურვის ცერემონია. დანარჩენი - სისულელეა", - აცხადებს ბერნი.
2011 წლის კალენდარი უკვე 20 ეტაპისგან შედგება, რადგან მას დაემატა ინდოეთის გრან-პრი. 2012 წელს დაბრუნდება ამერიკის გრან-პრი, 2014 წელს ნავარაუდებია პირველი რუსული რბოლის ჩატარება. თუმცა ექლსტოუნმა ზუსტად ჩამოაყალიბა თავისი პოზიცია: "ვფიქრობ, მოვნახავთ გამოსავალს და ეტაპების რიცხვი ოცს არ გადასცილდება. სავარაუდოდ, სპასთან გამომშვიდობება მოგვიწევს. შესაძლოა, რომელიმე ეტაპის ორგანიზატორებმა აიღონ პაუზა, რადგან მათი რბოლა არ ამართლებს კომერციული თვალსაზრისით. კარგი მაგალითია - თურქეთი. მათ ბრწყინვალე ავტოდრომი ააშენეს, შესაძლოა, საუკეთესოც კი. მაგრამ იქაურ პუბლიკას ფორმულა 1-ის მიმართ განსაკუთრებული ინტერესი არ ამოძრავებთ".
თავის იუბილესთან დაკავშირებით ბერნიმ ასეთი რამ თქვა: "ვფიქრობ, იქამდე მივაღწევ. სინამდვილეში, ეს ყველაფერი სისულელეა. რა მნიშვნელობა აქვს თუ დღეს 79 წლის ვარ, ხვალ კი 80-ის გავხდები?! ეს ერთი და იგივეა. არც კი ვიცი, სად ვიქნები 29 ოქტომბერს. ალბათ, სადმე სამოგზაუროდ..."
როგორც ირკვევა, ექლსტოუნი ფორმულა 1-ის ხელმძღვანელობას კიდევ ათი წელი აპირებს, სანამ 90-ე დაბადების დღეს არ იზეიმებს.
"დიახ, ასე იქნება! - წამოიძახა ბერნიმ. - ვერ ვხედავ შეჩერების მიზეზს. საკუთარი საქმით ვარ დაკავებული და მისგან სიამოვნებას ვიღებ. გუშინდელი დღე კი წარსულში დარჩა. არ მაღელვებს ის, რაც გუშინ მოხდა".
ყოველდღიური სპორტული გაზეთი
"ლელო"
