გასულ უქმეებზე მონაკოში ავტოსპორტის საერთაშორისო ფედერაციამ ოფიციალურ ცერემონიაზე დააჯილდოვა 2010 წლის სეზონის ლაურეატები. ფორმულა 1-ის ისტორიაში ყველაზე ახალგაზრდა ჩემპიონმა სებასტიან ფეტელმა მისთვის განკუთვნილი პრიზი ფედერაციის პრეზიდენტისგან ჟან ტოდტისგან მიიღო.
ფორმულა 1-ის აღმასრულებელმა დირექტორმა ბერნი ექსლტოუნმა კონსტრუქტორთა თასი გადასცა "რედ ბულის" ხელმძღვანელს კრისტიან ჰორნერს. ფერნანდო ალონსომ ("ფერარი") და მარკ უებერმა ("რედ ბული") ასევე მიიღეს პრიზები საერთო ჩათვლაში მოპოვებული მეორე და მესამე ადგილებისთვის.
"ეს საოცარი საღამოა ჩემთვის და მთლიანად "რედ ბულისთვის", - განაცხადა ფეტელმა. - ძალიან აღელვებული ვარ საჩემპიონო თასის მიღების გამო.
მინდა მადლობა გადავუხადო "რედ ბულის" მთელ გუნდს და "რენოს" ძრავის სპეციალისტებს იმ თავდადებული შრომისთვის, რომლის შედეგი გახდა ჩვენი მანქანა. ვამაყობ ამ გამარჯვებით, რომელსაც ერთად მივაღწიეთ".
"რედ ბულისთვის" ეს სეზონი მართლაც დასამახსოვრებელი იყო. ორი საჩემპიონო ტიტულის გარდა, ავსტრიული საჯინიბოს პილოტებმა ჯამში 15 პოული მოიპოვეს, გარდა ამისა, ფეტელისა და უებერის ანგარიშზე 6 სწრაფი წრე მოდის.
თასები გადაეცათ ფედერაციის ეგიდით ჩატარებული სხვა სარბოლო სერიების გამარჯვებულებს: საბასტიან ლოები რალის ჩემპიონატში ტრიუმფისთვის დაჯილდოვდა - ფრანგმა 2010 წელს მეშვიდედ მოიგო სეზონი. პრიზები მიიღეს WTCC-ის ჩემპიონმა ივან მიულერმა, აგრეთვე GT1-ის პირველი ჩემპიონატის გამარჯვებულებმა - მიკაელ ბარტელსმა დ ანდრეა ბერტონლინიმ.
გარდა ამისა, მონაკოში გამართულ ცერემონიაზე დააჯილდოვეს საუკეთესო პრომოუტერი და საუკეთესო ტელეკომპანია. პრომოუტერების ნომინაციაში დააჯილდოვეს კორეის გრან-პრის ორგანიზატორები. ჩემპიონატის საუკეთესო გაშუქებისთვის პრიზი მიიღო ტელეკომპანია Abu Dhabi Media Company-მ.
