მსოფლიოს შვიდგზის ჩემპიონი ფორმულა 1-ში მიხაელ შუმახერი პარალიზებულია, უნარშეზღუდულთა ეტლით გადაადგილდება და მეხსიერებასა და მეტყველებასთან დაკავშირებული პრობლემები აქვს. ამის შესახებ პრესას ფორმულა 1-ის ყოფილმა პილოტმა, ფრანგმა ფილიპ სტრეიფმა აცნობა.
"შუმახერი შედარებით უკეთესადაა, თუმცა მას არ შეუძლია ლაპარაკი. ის პარალიზებულია და ეტლშია, აქვს პრობლემები მეხსიერებასა და მეტყველებასთან დაკავშირებით. იმედია, ოჯახურ გარემოში ის უფრო სწრაფად მოკეთდება, თუმცა ეს ყველაფერი ძალიან რთული იქნება", - აქვეყნებს სტრეიფის ნათქვამს F1i.com-ი.
სხვათა შორის, 1989 წელს სტრეიფი თავად მოყვა ავარიაში, რის შედეგადაც დაიზიანა ხერხემალი და ეტლსაა მიჯაჭვული.
შეგახსენებთ, რომ მიხაელ შუმახერმა თავის ტვინის მძიმე ტრავმა თხილამურებით სრიალისას შარშან, დეკემბრის ბოლოს მიიღო და თითქმის ნახევარი წლის განმავლობაში კომატოზურ მდგომარეობაში იმყოფებოდა.
