ფორმულა 1. ავსტრალიის გრანპრის შემდეგ: საინტერესო სტატისტიკა

დასრულდა მსოფლიოს ახალი ჩემპიონატის პირველი ეტაპი და ცნობილმა ექსპერტმა მიკელე მერლინომ შემოგვთავაზა რამდენიმე საგულისხმო სტატისტიკური მონაცემი...

- ლუის ჰემილტონი გახდა პირველი მრბოლელი ფორმულა 1-ის ისტორიაში, ვინც მელბურნში ოთხჯერ მოიპოვა პოული.

- "მერსედესმა" ზედიზედ მე-12 პოული მოიგო. გარდა ამისა, ეს იყო ზედიზედ მე-20 პოული "მერსედესის" ძრავებით აღჭურვილი მანქანებისთვის.

- ნიკო როსბერგმა ზედიზედ მეთორმეტე რბოლა დაიწყო სასტარტო ბილიკის პირველი რიგიდან. ზედიზედ მეცხრე რბოლაში "მერსედესის" პილოტები პირველ რიგში იდგნენ - ეს ფორმულა 1-ის ისტორიაში აბსოლუტური რეკორდია.

- "რედ ბულის" პილოტებს შორის კვალიფიკაციაში საუკეთესო დანიელ რიკარდო იყო, რომელმაც მეშვიდე ადგილი დაიკავა. ეს გუნდის უარესი შედეგია ავსტრალიის ტრასაზე 2008 წლის შემდეგ. ავსტრალიური ეტაპი ზედიზედ მე-20 იყო "რედ ბულისთვის" პოულის გარეშე.

- "მაკლარენის" ისტორიაში პირველად, გუნდის ორივე პილოტმა სასტარტო ბილიკის ბოლო რიგიდან აიღო სტარტი.

- ლუის ჰემილტონმა კარიერაში მეექვსე ჰეთ-თრიკი (პოული, მოგება, საუკეთესო წრე) შეასრულა. მან 34-ე რბოლა მოიგო ფორმულა 1-ში, რაც მეხუთე შედეგია ისტორიაში. მეოთხე ადგილზე მყოფ ფეტელს ბრიტანელი ხუთი მოგებით ჩამორჩება.

- ჰემილტონმა კარიერაში 21-ედ გაიარა რბოლაში საუკეთესო წრე, რითაც გაუთანაბრდა ფერნანდო ალონსოსა და გერჰარდ ბერგერს, რომლებიც შესაბამის რეიტინგში მე-11 ადგილზე არიან.

- ფორმულა 1-ში გატარებულ ცხრავე სეზონში ჰემილტონი მინიმუმ ერთი რბოლის მოგებას ახერხებდა. ასეთი შედეგი აქამდე არავის ჰქონია. მიხაელ შუმახერი 15 სხვადასხვა სეზონში იგებდა, მაგრამ ყველა ჩემპიონატში არ ჰქონია მინიმუმ ერთი გამარჯვება.

- ჰემილტონმა და როსბერგმა მე-12 დუბლი შეასრულეს და 30-ე გამარჯვება მოუტანეს "მერსედესს" ფორმულა 1-ში. მსგავსი დომინირება - ორივე მანქანის სტარტი პირველი რიგიდან, ორი საუკეთესო წრე, დუბლი და მთელი რბოლის განმავლობაში ლიდერობა - 37-ჯერ დაფიქსირდა ისტორიაში (917 გრანპრიში). გასულ წელს "მერსედესმა" ეს ორჯერ შეძლო - ბაჰრეინსა და იტალიაში.

- "მერსედესმა" ზედიზედ მერვე გამარჯვება მოიპოვა, რაც მეოთხე მაჩვენებელია ისტორიაში.

- სებასტიან ფეტელმა ზედიზედ 90-ე რბოლა ჩაატარა ავარიის გარეშე. მისი ბოლო ავარია, რამაც რბოლიდან გამოთიშვა გამოიწვია, 2010 წელს თურქეთში იყო. მაშინ გერმანელი თანაგუნდელ მარკ უებერს დაეჯახა.

- ფეტელმა შეწყვიტა "ფერარის" პოდიუმების გარეშე სერია, რომელიც უნგრეთის შარშანდელი გრანპრიდან გრძელდებოდა.

- ფელიპე ნასრმა არა მხოლოდ პირველი ქულები მოიპოვა ფორმულა 1-ში, არამედ საუკეთესო ბრაზილიელი დებიუტანტი გახდა - ის მეხუთე მივიდა ფინიშთან.

- მარკუს ერიქსონი პირველი შვედი გახდა, ვინც ქულები მოიპოვა 1989 წლის პორტუგალიის გრანპრის შემდეგ. მაშინ მესამე მივიდა ფინიშთან სტეფან იოჰანსონი.

- "ზაუბერმა" შეწყვიტა 19-რბოლიანი სერია, რომლის განმავლობაში ქულების დაგროვებას ვერ ახერხებდა.

- პირველად კიმი რაიკონენის "ფერარიში" დაბრუნების შემდეგ, ფინელმა ვერ დაასრულა რბოლა მექანიკური პრობლემების გამო.

ყოველდღიური სპორტული გაზეთი "ლელო"