სამკვირიანი პაუზის შემდეგ ფორმულა 1-ში მსოფლიოს ჩემპიონატი პირველი ევროპული ეტაპით განახლდება. ჯერჯერობით ჩემპიონობისთვისა და კონსტრუქტორთა თასისთვის ბრძოლაში არანაირი ინტრიგა არ არსებობს, მიუხედავად იმისა, რომ "ფერარი" ყველანაირად ცდილობს "მერსედესის" დაწევას. იტალიელები დიდ ფულს ხარჯავენ ამისთვის, მაგრამ ჯერ ვერ უთანაბრდებიან გერმანელებს.თავის მხრივ, "უილიამსიც" ჯერ ვერ ეწევა "სკუდერიას". ბრიტანელებს ბევრი პრობლემა დაუგროვდათ და უახლოეს უქმეებზე გამოჩნდება - შეძლეს თუ არა ამ პაუზის დროს მათი მოგვარება.
საერთო ჯამში, პირველმა ოთხმა ეტაპმა კარგად დაგვანახა ის, რას შეიძლება ველოდოთ ესპანეთში. მაგრამ ეს საერთო სურათია. სამი
პელოტონის შუაშიც გაუგებარი არაფერია. "რედ ბულსა" და "ტორო როსოს" ძრავების პრობლემები აქვთ, "ლოტუსსა" და "ფორს ინდიას" შასი აქვთ გამოსასწორებელი, კომპლექტში ყველაფერი კარგი აქვს მოკრძალებულ "ზაუბერს", ხოლო ამ სამეულთან მიახლოებას ცდილობს "მაკლარენი". სერიოზულ პროგრესს ელოდებიან "ლოტუსსა" და "ფორს ინდიაში". ორივე საჯინიბოს აქვს იმედი, რომ განახლებების შემდეგ "საშუალოების" ჯგუფს სათავეში ჩაუდგებიან.
რაც შეეხება უიმედო აუთსაიდერ "მანორს", მასთან დაკავშირებით ყველაფერი გარკვეულია. გუნდს ამ სეზონში ახალი შასი არ ექნება.
ეტაპის ინტრიგა
სამკვირიანი პაუზის შემდეგ ყველა ელოდება გარღვევას "ფერარისგან", "მერსედესთან" კონკურენციას და საჩემპიონო ბრძოლაში ინტრიგის აღდგენას. დღეისთვის ლუის ჰემილტონი ძალიან დიდი ნაბიჯებით მიდის ზედიზედ მეორე ტიტულისკენ და მხოლოდ "სკუდერიას" კარდინალური პროგრესი თუ შეცვლის ძალთა თანაფარდობას.იტალიელები დიდ თანხებს ხარჯავენ განახლებებზე. თან ახალ გულშემატკივრებსაც იძენენ, რადგან სპორტში დომინატორები არ უყვართ. აზიაში სარბოლო ტემპით "ფერარი" ძალიან ახლოს იყო "მერსედესთან". ვნახოთ, რა იქნება ევროპაში. ცხადია, რომ გერმანელები გულხელდაკრეფილნი არ იქნებოდნენ.
კიდევ ერთ ინტრიგას წარმოადგენს მეორე ლეგენდარული გუნდი. არაჩვეულებრივ პროგრესს აჩვენებს "მაკლარენი". "ჰონდას" ძრავა ყოველი რბოლის შემდეგ უმატებს სიმძლავრეს. ამ მხრივ, ესპანეთში მორიგი წინსვლა იგეგმება და ყველაზე თამამი პროგნოზისტები პირველი ქულებისთვის ბრძოლას წინასწარმეტყველებენ.
ბარსელონას ტრასა
სიგრძე: 4655 მ
წრეების რიცხვი: 66
რბოლის დისტანცია: 307,000 კმ
მოსახვევები: 16 (8 მარჯვენა, 8 მარცხენა)
DRS-ის ზონა: ორი
უგრძესი სწორი მონაკვეთი: 1310 მ
ტრასის რეკორდი: 1:21.670 (რაიკონენი, "ფერარი", 2008)
ყველაზე მეტი მოგება: 6 - მ. შუმახერი
უქმეების განრიგი
8 მაისი, 12:00 - I პრაქტიკა
8 მაისი, 14:00 - II პრაქტიკა
9 მაისი, 13:00 - III პრაქტიკა
9 მაისი, 16:00 - კვალიფიკაცია
10 მაისი, 16:00 - რბოლა
საერთო ჩათვლა
1. ჰემილტონი (მერსედესი) - 93
2. როსბერგი (მერსედესი) - 66
3. ფეტელი (ფერარი) - 65
4. რაიკონენი (ფერარი) - 42
5. მასა (უილიამსი) - 31
6. ბოტასი (უილიამსი) - 30
7. რიკარდო (რედ ბული) - 19
8. ნასრი (ზაუბერი) - 14
ყოველდღიური სპორტული გაზეთი "ლელო"
