ფორმულა 1: ყველაფერი ბრაზილიის გრან პრის შესახებ

მსოფლიოს ჩემპიონატის მე-18 ეტაპის - ბრაზილიის გრან-პრის შემდეგ, ცნობილმა ექსპერტმა მიკელე მერლინომ გამოაქვეყნა რამდენიმე საინტერესო სტატისტიკური მონაცემი...

- ნიკო როსბერგმა კარიერაში 21-ე პოული მოიპოვა და ამ მაჩვენებლით ერთით ჩამორჩება ფერნანდო ალონსოს. ესპანელს ბოლო პოული სამი წლის წინ, გერმანიაში ჰქონდა. იქედან მოყოლებული, როსბერგმა 20 პოული მოიპოვა.

- "ინტერლაგუშში" როსბერგმა კარიერაში 39-ედ აიღო სტარტი პირველი რიგიდან და ამ მაჩვენებლით გაუთანაბრდა მსოფლიოს ორგზის ჩემპიონს მიკა ჰაკინენს.

- "მერსედესი" პირველი გუნდი გახდა ისტორიაში, რომელმაც ერთ სეზონში 14-ჯერ დაიკავა სასტარტო ბილიკის პირველი რიგი.

- ბრაზილიაში მე-20 სასტარტო პოზიცია - ყველაზე დაბალია ალონსოს კარიერაში. 2001 წელს, სადებიუტო გრან-პრიზე "მინარდის" რიგებში, ალონსომ მე-19 პოზიციიდან აიღო სტარტი.

- "მერსედესმა" ახალი რეკორდი დაამყარა. F1 W06 პირველი მანქანა გახდა ისტორიაში, რომელმაც სეზონში ხუთჯერ შეძლო დომინირება რბოლაში - დაიკავა სასტარტო ბილიკის პირველი რიგი, რბოლაში ორჯერ უჩვენა საუკეთესო წრე და დუბლი შეასრულა. წინა რეკორდი ეკუთვნოდა McLaren MP4-4-ს - ოთხი მსგავსი დომინირება 1988 წელს.

- Mercedes F1 W06-ს კიდევ ერთი სერიოზული მიღწევა ეკუთვნის - ამ მანქანის ანგარიშზეა 11 ჰეთ-თრიკი (პოული, მოგება და საუკეთესო წრე). ეს არის Ferrari 500-ის მოდელის რეკორდის გამეორება, მაგრამ ის დამყარებული იყო რამდენიმე წლის განმავლობაში - 1952-დან და 1956 წლამდე. "მერსედესს" კი ერთი წელი ეყო.

- ნიკო როსბერგმა მე-13 რბოლა მოიგო კარიერაში და გაუთანაბრდა საერთო სიაში 21-ე ადგილზე მყოფ ალბერტო ასკარისა და დევიდ კულტჰარდს. ახლა, ფორმულა 1-ის ისტორიაში მხოლოდ ერთი მრბოლელია, ვისაც როსბერგზე მეტი რბოლა აქვს მოგებული, მაგრამ არასოდეს ყოფილა ჩემპიონი - სტირლინგ მოსი 16 მოგებით.

- ლუის ჰემილტონი სეზონში მეთექვსმეტედ ავიდა პოდიუმზე. ბოლო ორ წელიწადში, ბრიტანელმა 37 რბოლიდან მხოლოდ ხუთჯერ ვერ შეაღწია სამეულში.

- "მერსედესმა" სეზონში მეთერთმეტედ შეასრულა დუბლი.

- სებასტიან ფეტელმა სეზონში მეშვიდედ დაიკავა მესამე ადგილი, რითაც მარკ უებერის 2011 წლის რეკორდი გაიმეორა.

- კიმი რაიკონენმა ზედიზედ მეათედ მოიპოვა ქულები ბრაზილიაში.

- მაქს ფერსტაპენი გახდა პირველი მრბოლელი "ტორო როსოს" ისტორიაში, ვინც ზედიზედ ექვს რბოლაში მოიპოვა ქულები. მან სებასტიან ფეტელის რეკორდი გააუმჯობესა (2008 წელს, ზედიზედ ხუთი შედეგიანი რბოლა).

ყოველდღიური სპორტული გაზეთი "ლელო"