ლონდონში ფავორიტებად უნდა ჩავიდეთ

17 აპრილს 2012 წლის ლონდონის ოლიმპიადის პირველი სალიცენზიო ტურნირი იწყება, რომელიც 2012 წლის 17 ივნისამდე გასტანს. ამ პერიოდში ჩატარებული ტურებიდან 12 საუკეთესო შედეგი იქნება მხედველობაში მიღებული. გართულდა ლიცენზიის მოპოვება, რადგან საჭირო იქნება მსოფლიოს 16 საუკეთესოში მოხვედრა.

მძიმე სეზონი გველის, რამეთუ გაიზარდა ძლიერი წყვილების რაოდენობა და ამასთანავე ბევრად მეტი ქვეყანა იღებს სალიცენზიო ტურნირებში მონაწილეობას. წელსვე ქალთა და ვაჟთა ეროვნული ნაკრებები ითამაშებენ მსოფლიოს ჩემპიონატის ფინალში, რომელიც 13-19 ივნისს რომში გაიმართება. ეს უდიდესი ფორუმია და იმედია მასმედია სათანადოდ გააშუქებს ამ ჩემპიონატს. ერთ-ერთმა საკაბელო ტელევიზიამ გამოხატა დაინტერესება და შესაძლოა ქართველმა გულშემატკივარმა პირდაპირი ეთერითაც იხილოს რომის ბატალიები.

ჩვენი მთავარი ამოცანაა, რომ ყველა ტურში მივიღოთ მონაწილეობა. ორივე ნაკრებს ცნობილი ბრაზილიელი მწვრთნელები წვრთნიან და ისინი კმაყოფილები არიან ამ ეტაპზე ჩვენი მოთამაშეების მომზადების დონით.

"ლიცენზიის მოპოვების შემთხვევაში ორივე გუნდს აქვს შანსი ოლიმპიური მედლებისთვის იბრძოლოს. ჩვენ ფავორიტებად ჩავალთ ლონდონში, ვინაიდან წინა ოლიმპიური თამაშების ნახევარფინალისტები ვართ", - განაცხადა საქართველოს ფრენბურთის ფედერაციის პრეზიდენტმა ლევან ახვლედიანმა.






.