გუშინ გლდანში ჯემალ ცერცვაძის სახელობის ხელბურთის სპორტ-კომპლექსში საქართველოსMეროვნული ჩემპიონატის მე-3 წრის ბოლო შეხვედრები დასრულდა. პირველობაში მონაწილე 6 გუნდიდან გორის ხელბურთელებმა ფინანსური პრობლემების გამო მონაწილეობა ვერ მიიღეს. კონკურსგარეშე ტურნირში მეექვსე გუნდად მონაწილეობდა აზერბაიჯანის ახალგაზრდული ნაკრები.
მესამე ტურში ლიდერობა არავის დაუთმო ბოლო წლების გამარჯვებულმა “თბილისისა” და აგრარული უნივერსიტეტის გაერთიანებულმა გუნდმა. 18 ქულით მეორე ადგილი დაიკავეს ქუთაისელმა ხელბურთელებმა, თსუ-მ და “ქარიშხალამ” 13-12 ქულით მე-3 და მე-4 ადგილები გაინაწილეს, მე-5 ადგილს დასჯერდა “ბათუმი” – 11 ქულით. ტურნირში კონკურსგარეშე მონაწილე აზერბაიჯანელებმა მხოლოდ 7 ქულა მოაგროვეს.
- სამწუხაროდ, საქართველოს ჩემპიონატის მესამე ტურში გორის გუნდმა უსახსრობის გამო ვერ იასპარეზა. უმთავრესი მიზეზი, რის გამოც მათ ტურნირში მონაწილეობა ვერ მიიღეს, საჭირო თანხის არქონა იყო. სამწუხაროდ, გორში შესაბამისი სახსრები ვერ გამოინახა.
- აზერბაიჯანის ახალგაზრდული ნაკრები საქართველოს პირველობაზე როგორ მოხვდა?
- აზერბაიჯანის ხელბურთის ფედერაციასთან მჭიდრო კავშირები გვაქვს. როდესაც მათ გაიგეს, რომ გორის გუნდი უფულობის გამო ტურნირს გამოეთიშა, პირველობაში მონაწილეობის მიღების თხოვნით მოგვმართეს. მათი ნაკრები მონაწილეობას დარჩენილ ორ ტურშიც მიიღებს.
- საქართველოს პირველობას ხელბურთის ფედერაცია თავად ხელმძღვანელობდა?
- ტურნირში მონაწილე გუნდების მიღება, მათი დაბინავება, კვება - ყველაფერი საქართველოს ხელბურთის ფედერაციამ უზრუნველჰყო.
- თუმცა, ქართული ხელბურთს ნამდვილად არ ულხინს.
- იმის მიუხედავად, რომ ხელბურთი საქართველოში დიდ გასაჭირშია, სასიკეთო ძვრებიცაა.
- წარმატებისთვის საჭიროა ნიჭიერი თაობა. ამ ხრივ რა მდგომარეობა?
- ცუდი ისაა, რომ საქართველოს ჩემპიონატში მონაწილეობენ პატარა ასაკის ხელბურთელები, 17-18 წლის ბიჭები, არადა ჩემპიონატი მოწიფული ხელბურთელებით უნდა შეივსოს.
- სკოლებში სპორტის გაკვეთილების შეტანა ხელბურთის პოპულარიზაციას ხელს შეუწყობს?
- განათლების სამინისტროს მიერ შემუშავებული პროექტი, ქართული ხელბურთის გამოცოცხლებას ხელს შეუწყობს. საქართველოს მაშტაბით 200-მდე სკოლამ არჩევანი ხელბურთზე გააკეთა. გუნდები აღმოსავლეთ და დასავლეთ ზონად დაყოფილ ჯგუფებში გადანაწილდებიან და ტურნირში ჩაებმებიან.
- ეს სიახლე ნიჭიერი თაობების გამოვლენას შეძლებს?
- დიდი იმედი მაქვს, რომ ასეც იქნება. მთავარია, თაობებს შორის ჩავარდნა არ მოხდეს. სასურველი შედეგის მისაღწევად საჭიროა ქართულ ხელბურთში მოწიფული ასაკის ვაჟები, თავისი საქმის პროფესიონალები მონაწილეობდნენ. ნაკრების მოთამაშეთა უმეტესობა ლეგიონერია, თუმცა ნაკრების წევრები საქართველოს პირველობაშიც ასპარეზობენ. ლეგიონერები, როგორც პროფესიონალები წლის განმავლობაში ადგილობრივ ხელბურთელებისგან განსხვავებით გაცილებით მეტ შეხვედრებს მართავენ.
- სეზონის განმავლობაში 25 შეხვედრა ხელბურთელისთვის ცოტა არაა?
- 25 მატჩი ხუთი წრის ფარგლებში იმართება, რა თქმა უნდა, ცოტაა. იმისათვის, რომ ძლიერი ტურნირი გვქონდეს საჭიროა 50 შეხვედრის ჩატარება.
- პირველობის ლიდერი გუნდები საერთაშორისო ტურნირებზეც ასპარეზობენ?
- საქართველოს პირველობაზე გამარჯვებული გუნდი ევროპის ჩემპიონთა თასის საკვალიფიკაციო ეტაპის შეხვედრებში ჩაებმება. მეორე ადგილოსანი თასების თასებზე იასპარეზებს, ხოლო მესამე ადგილოსანი ევროპის საერთაშორისო ფედერაციის თასზე. ბოლო წლების შედეგებს თუ გადავხედავთ, სამწუხაროდ, ჩვენი ხელბურთელები საერთაშორისო ტურნირებს პირველივე წრეში ეთიშებიან, რადგან მეტოქეებს გაცილებით დიდი გამოცდილება აქვთ.
თ მ წ ფ ქ
1. სსაუ/თბილისი 15 15 0 0 30
2. ქუთაისი 15 9 6 0 18
3. თსუ 15 5 8 2 13
4. ქარიშხალა 15 6 9 0 12
5. ბათუმი 15 4 8 3 11
სალომე ხარატიშვილი
