უკვე გაუწყეთ, რომ ქართველი ჩოგბურთელები - ანა ტატიშვილი და მარგარიტა ჩახნაშვილი 2012 წლის ლონდონის ოლიმპიურ თამაშებში იასპარეზებენ. ორივემ ჩვენებურმა საერთაშორისო ტურნირებზე მორიგი შეხვედრები გამართა. ჩახნაშვილი რომის 25-ათასიან შეჯიბრებაში სცდის ძალებს. იგი მე-6 ნომრადაა განთესილი. პირველ წრეში მაკამ ბერძენი მარია საკარი დაამარცხა - 7:5, 6:2.
მეორეში ტურნირზე "ველური ბარათით" დაშვებულ მასპინძელს - ანგელიკა მორატელის დააყრევინა ფარ-ხმალი 6:4, 6:3. მეოთხედფინალში იგი ისევ აპენინელს - მე-3 ნომრად განთესილ ნასტასია ბურნეტს დაუპირისპირდება, რომელმაც თანამემამულე ანასტასია გრიმალსკას აჯობა - 2:6, 7:5, 6:3.
უიმბლდონის ტურნირზე პირველი
27 ივნისს იტალიელ ფლავია პენეტას მძლეველ კამილა ჯორჯის (იტალია) შეხვდა. ეს უკანასკნელი ქალთა საერთაშორისო საჩოგბურთო ასოციაციის რეიტინგში 145-ე ადგილზეა, ტატიშვილი - 73-ზე. 72 საფეხურით დაბლა დგომამ ხელი ვერ შეუშალა ჯორჯის, წარმატებისთვის მიეღწია - ტატიშვილი მან ორ სეტში დაამარცხა - 6:3, 6:1.
საფრანგეთის 25-ათასიან საერთაშორისო ტურნირში თამაშობს სოფიო შაფათავა. პირველ წრეში ქართველი ჩოგბურთელი ბულგარელ ალექსანდრინა ნაიდენოვას დანებდა - 2:6, 3:6, სამაგიეროდ, წყვილებში აიღო რევანში: სოფიომ ბელარუს პოლინა პეხოვასთან ერთად ნაიდენოვას და არგენტინელ ვანესა ფურლანეტოს დუეტს 7:6, 6:3 აჯობა, მეოთხედფინალში კი მარია ანდრეა გარდენასი (ვენესუელა) და ევა ფერნანდესი (ესპანეთი) დაჯაბნა - 6:3, 6:1. ნახევარფინალში შაფათავა და პეხოვა აგენტინელებთან - მაილენ აუროუსთან და მარია ირიგოენთან გაარკვევენ ურთიერთობას.
ყოველდღიური სპორტული გაზეთი "ლელო"
