მსოფლიოს მეოთხე ჩოგანი, ესპანელი დავიდ ფერერი ვერ შეძლებს გრუნტის სეზონის პირველ მასტერსში მონაწილეობის მიღებას. ეს ტურნირი მონტე კარლოში გაიმართება.31 წლის ჩოგბურთელმა ბარძაყის ტრავმა ჯერ კიდევ მაიამის მასტერსის დროს მიიღო და დაზიანების დროულად განკურნება ვერ შეძლო, - იტყობინება ესპანური გამოცემა "მარკა". ძირითად ბადეში ესპანელის ადგილს ხორვატი ივან დოდიგი დაიკავებს.
შესაბამისად, ახლა დანამდვილებით შეიძლება იმის თქმა, რომ ATP-ის რეიტინგის ტოპ-ხუთეულიდან მონაკოში მხოლოდ ორ მოთამაშეს ვიხილავთ - ბრიტანელ ენდი მარეის (მე-2 ნომერი) და ესპანელ რაფაელ ნადალს (5), რომელიც ტურნირის მოქმედი ჩემპიონია. ჯერჯერობით
ამასობაში მონაკოს მასტერსის რვაგზის ჩემპიონმა რაფაელ ნადალმა უკვე დაიწყო მზადება მომავალი ტურნირისთვის და ჟურნალისტებს თავისი ჯანმრთელობის მდგომარეობის შესახებ უამბო.
"დაძაბული საწვრთნელი სესიის შემდეგ ვიგრძენი, რომ მუხლი იმაზე მეტად მტკიოდა, ვიდრე ველოდი. ამასთან, უნდა აღვნიშნო, რომ ჩემს მდგომარეობაში შეინიშნება დადებითი დინამიკა. წინ მაქვს ტურნირები მონტე კარლოსა და ბარსელონაში. იმის შესახებ, თუ სად ვითამაშებ მონაკოს შემდეგ, პასუხის გაცემა ჯერ არ შემიძლია.
მეცხრე გამარჯვება მონტე კარლოში? ყოველთვის მოგება არ გამოდის. წელს ჩემს აქტივშია გამარჯვებები აკაპულკოში, სან პაულუსა და ინდიან უელსში. თავიდანვე შემიძლია გითხრათ, რომ ბრაზილიაში გამოსვლის დროს თავს გაცილებით ცუდად ვგრძნობდი, თუმცა იქიდან მოყოლებული, ძალიან მოვუმატე, განსაკუთრებით, კორტზე გადაადგილებისა და მოკლე გარბენების მხრივ", - ამბობს ნადალი.
შეგახსენებთ, რომ მონტე კარლოს ტურნირი 14-21 აპრილს გაიმართება.
ყოველდღიური სპორტული გაზეთი "ლელო"
ასევე იხილეთ:
სავარაუდოდ, მონტე კარლოში ნოვაკ ჯოკოვიჩი ვერ ითამაშებს
