ბოლო რეპეტიცია უიმბლდონამდე

ამ კვირას მამაკაცთა და ქალთა ოთხ ტურნირს ჰოლანდიის ჰერტოგენბოში და ბრიტანეთის ისტბურნი მასპინძლობენ, რითაც სრულდება მზადება უიმბლდონისთვის.

ჰერტოგენბოში: ფერერმა ტიტული უნდა დაიცვას
მსოფლიოს მეოთხე ნომერი დავიდ ფერერი, რომელმაც ერთი კვირის წინ როლან გაროსზე ითამაშა, თავისი სადებიუტო ფინალი "დიდ სლემზე", ჰერტოგენბოშის კორტებზე შარშანდელი ტიტულის დასაცავად ბრუნდება. ესპანელის პირველი მეტოქე იქნება ბელგიელი ქსავიე მალისე, მეოთხედფინალში კი მისი სავარაუდო მოწინააღმდეგე შეიძლება გახდეს კვიპროსელი მარკოს ბაღდატისი.

ჰოლანდიაში მეორე ნომრად განთესილია შვეიცარიელი სტანისლას ვავრინკა, რომელიც ამ სეზონში ძალიან კარგად გამოდის. პირველ წრეში ის მასპინძელ იგორ

სისლინგს ხვდება.

Topshelf Open-ზე ასევე თამაშობენ ჯონ ისნერი, ბენუა პერი, ჟერემი შარდი, ვიქტორ ჰანესკუ, მიკაელ ლოდრა, რობინ ჰაასე...

* * *
ჰერტოგენბოშის ქალთა ტურნირში განთესვის პირველი ნომერი მიიღო 2011 წლის ჩემპიონმა რობერტა ვინჩიმ. პირველ წრეში იტალიელი კაია კანეპის წინააღმდეგ ითამაშებს. განთესილთა ტოპ-ოთხეულში ასევე მოხვდნენ დომინიკა ციბულკოვა, კარლა სუარეს ნავარო და კირსტენ ფლიპკენსი. ეს უკანასკნელი პირველ რაუნდში ფრანჩესკა სკიავონეს შეხვდება, რომელთანაც წააგო როლან გაროსის მეორე წრეში.

ამათ გარდა, Topshelf Open-ზე ტიტულისთვის იბრძოლებენ მონა ბარტელი, რომინა ოპრანდი, ურსულა რადვანსკა, კრისტინა მლადენოვიჩი, აგრეთვე ბალახის მოყვარული ცვეტანა პირონკოვა. აქვეა გასულ კვირას ბირმინგემის ტურნირის ტრიუმფატორი დანიელა ჰანტუხოვა.

ისტბურნი: თითქმის მთელი ელიტა
ისტბურნის ტურნირის ქალთა ბადეში ძალიან ძლიერი შემადგენლობა შეიკრიბა: ტურნირში მონაწილეობას მიიღებს WTA-ს რეიტინგის TOP15-ის ათი წარმომადგენელი, რომლებსაც სათავეში ჩაუდგება შარშანდელი უიმბლდონის ფინალისტი აგნიეშკა რადვანსკა. პოლონელი ჩოგბურთელი, რომელმაც ისტბურნში 2008 წელს გაიმარჯვა, პირველ წრეში კვალიფიკაციიდან გასულ რომელიმე ჩოგბურთელს შეხვდება.

ჩინელი ნა ლი, რომელიც მეორე ნომრად არის განთესილი, სტარტზე ფრანგ ალიზ კორნეს შეხვდება, გერმანელი ანჟელიკ კერბერის მეტოქე იქნება სორანა კირსტეა, პეტრა კვიტოვა კი მონიკა ნიკულესკუს დაუპირისპირდება. 2009 წლის ჩემპიონს კაროლინ ვოზნიაცკის განთესვის მეხუთე ნომერი აქვს. მან პირველ რაუნდში მეტოქედ ტამირა პაჩეკი მიიღო.

ტურნირში ასევე მონაწილეობას იღებენ 2011 წლის ჩემპიონი მარიონ ბარტოლი, ბრიტანული პუბლიკის საყვარელი მოთამაშეები - ლორა რობსონი და ჰიზერ უოტსონი, ლუსი საფაროვა და იანინა ვიკმაიერი.

* * *
ისტბურნის ტურნირის მამაკაცთა ნაწილში განთესვის პირველი ნომერი და მთავარი ფავორიტის სტატუსი მიიღო კანადელმა მილოშ რაონიჩმა. ის და აგრეთვე ჟილ სიმონი, ფილიპ კოლშრაიბერი და ხუან მონაკო მეორე წრიდან დაიწყებენ გამოსვლას. მეხუთე ნომრად განთესილი კევინ ანდერსონი პირველ რაუნდში გამოცდილ ფრანგს, ჟულიენ ბენეტოს შეხვდება, ხოლო ტურნირის მეექვსე ნომრის, ალექსანდრ დოლგოპოლოვის მეტოქე ესპანელი ფერნანდო ვერდასკო იქნება.

2011 წლის გამარჯვებული და შარშანდელი ფინალისტი, იტალიელი ანდრეას სეპი ტურნირის მეშვიდე ნომერია და კვალიფიკაციიდან ძირითად ბადეში მოხვედრილ რომელიმე მეტოქეს შეხვდება.

მთავარი პრიზისთვის ასევე იბრძოლებენ: ფაბიო ფონინი, ვიქტორ ტროიცკი, იარკო ნიემინენი, ფელისიანო ლოპესი, რადეკ შტეპანეკი, ბერნარდ ტომიჩი...

ყოველდღიური სპორტული გაზეთი "ლელო"

ასევე იხილეთ:
როჯერ ფედერერი ჯონ მაკინროის გვერდით