მაიამის "მასტერსი": მონსტრი სერენა

სერენა უილიამსმა 2015 წელს თავისი წაუგებელი სერია გააგრძელა. ამერიკელი ჩოგბურთელი ზედიზედ 21 მატჩია არ მარცხდება - შარშანდელი შემაჯამებელი ტურნირიდან მოყოლებული. ამ სერიის რიგით 21-ე მოგება ძალიან შთამბეჭდავი და დამაჯერებელი გამოვიდა. მსოფლიოს პირველმა ჩოგანმა, რომელმაც მაიამიში რამდენიმე რთული მატჩი გადაიტანა, გადამწყვეტ შეხვედრაში გაანადგურა ესპანელი კარლა სუარეს ნავარო.

ბრძოლა ამ მატჩში მხოლოდ საწყის ოთხ გეიმში ვნახეთ: მეტოქეებმა საკუთარი მოწოდებები შეინარჩუნეს და ანგარიში 2:2 იყო. ამის შემდეგ კი ერთი ჩოგბურთელის შოუ დაიწყო. სერენამ ზედიზედ 10 გეიმი აიღო და ამ დროის განმავლობაში 14 ქულა დათმო, აქედან მხოლოდ ხუთი მეორე სეტში - 6:2, 6:0.

შეხვედრა 56 წუთი გრძელდებოდა, რომლის დროსაც სერენამ 27 "ვინერსი" დააფიქსირა - საშუალოდ თითო ყოველ ორ წუთში.

სერენა უილიამსმა მერვედ მოიგო მაიამის ტურნირი. ის გახდა მეოთხე ჩოგბურთელი ისტორიაში, ვისაც ერთ კონკრეტულ ტურნირზე რვაჯერ (ან მეტჯერ) აქვს მოპოვებული მთავარი პრიზი. მანამდე ეს გააკეთეს კრის ევერტმა (8 - ჰილტონ ჰედი), მარტინა ნავრატილოვამ (12 - ჩიკაგო, 11 - ისტბურნი, 9 - დალასი, ვაშინგტონი, უიმბლდონი, 8 - ლოს ანჯელესი, WTA-ს ფინალი, ორლანდო) და შტეფი გრაფმა (9 - ბერლინი).

უილიამსი სათავეში ჩაუდგა WTA-ს საჩემპიონო რბოლას, კარლა სუარეს ნავარომ კი ფინალში გასვლის ხარჯზე კარიერაში პირველად შეაღწია კლასიფიკაციის ტოპ-ათეულში.

ქალები
1/4-ფინალი
სერენა უილიამსი (აშშ, 1)-კარლა სუარეს ნავარო (ესპ, 12) 6:2, 6:0.

ყოველდღიური სპორტული გაზეთი "ლელო"