ჩოგბურთი და ფული: ვინ იქნება პირველი 100-მილიონიანი?

მსოფლიოს პირველი ჩოგანი, "დიდი სლემის" ტურნირების 10-გზის გამარჯვებული ნოვაკ ჯოკოვიჩი და "დიდი სლემის" ტურნირების 17-გზის ჩემპიონი როჯერ ფედერერი 2016 წლის სეზონში კიდევ ერთი საინტერესო ფაქტორის გამო იქნებიან კონკურენტები.

ორივეს შეუძლია გახდეს პირველი ჩოგბურთელი ისტორიაში, ვინც კარიერაში 100 მილიონ დოლარს გამოიმუშავებს.

დღეისთვის, ჯოკოვიჩის მიერ კორტზე გამომუშავებული თანხის ოდენობა 94 მილიონი დოლარია, ფედერერისა - 97.3 მილიონი. იმ შემთხვევაში, თუ შვეიცარიელი მოიგებს ავსტრალიის ღია პირველობას, უკვე იანვარში შეიძლება გახდეს 100 მილიონის მფლობელი, რადგან ამ ტურნირზე გამარჯვებულს 3 მილიონზე მეტი ეკუთვნის.

შედარებისთვის, დიადმა ავსტრალიელმა როდ ლეივერმა კორტზე 1.5 მილიონი დოლარი გამოიმუშავა, ჯონ მაკინროიმ - 12.5 მილიონი, პიტ სამპრასმა - 43 მილიონი. ჯოკოვიჩმა კი მარტო 2015 წელს მიიღო 21.5 მილიონი დოლარის ოდენობის საპრიზო თანხა. სერბი გახდა პირველი ჩოგბურთელი, ვინც 20 მილიონ დოლარს გადააჭარბა.

თუმცა ამერიკული გამოცემა Forbes-ის მონაცემებით, სარეკლამო და სპონსორული ხელშეკრულებების გათვალისწინებით, 2015 წელს ყველაზე მეტი თანხა როჯერ ფედერერმა მიიღო - 58 მილიონი. სპორტსმენთა საერთო სიაში შვეიცარიელი მეხუთეა. ჯოკოვიჩი კი მე-13 ადგილს იკავებს - 31 მილიონი დოლარი.

კარიერაში მიღებული ჰონორარების მიხედვით მესამეა ესპანელი რაფაელ ნადალი - 75 მილიონი, მეოთხე - ბრიტანელი ენდი მარეი (42.5 მილიონი).

ქალებს შორის უკონკურენციოა მსოფლიოს პირველი ჩოგანი სერენა უილიამსი - 74 მილიონი დოლარი კარიერის განმავლობაში.

(იბეჭდება მცირე ცვლილებით)
ყოველდღიური სპორტული გაზეთი "ლელო"