მარიამ ბოლქვაძემ შარმ ელ შეიხის ტურნირში ერთეულებშიც მოიგო და წყვილებშიც

31 მარტს, ეგვიპტურ შარმ ელ შეიხში ჩოგბურთელ ქალთა 10.000-იან საერთაშორისო ტურნირზე თბილისელი მარიამ ბოლქვაძე ორჯერ გავიდა კორტზე და ორჯერვე გამარჯვებულმა დატოვა სარბიელი.

ერთეულთა თანრიგის მეორე წრეში მე-5 ნომრად განთესილმა ჩვენებურმა ვალერია პოგრებნიაკი (რუსეთი) დაამარცხა იოლად - 6:2, 6:0 და მეოთხედფინალში ტაივანელი ბანიავი თამჩავაიტის მძლეველ (7:6, 7:5) ნასტია კოლართან (სლოვენია) გაარკვევს ურთიერთობას.

არადა, ბოლქვაძე წყვილებში სწორედ სლოვენიელთან არის შეამხანაგებული და განთესვით მეორე ნომერი აქვთ. სტარტზე კადარისა (რუმინეთი) და ნიუკის (შვედეთი) დამარცხების შემდეგ ქართულ-სლოვენიურმა დუეტმა ანა მარია პროკაჩი (იტალია) და ალექსანდრა ვალტერსი (ავსტრალია) ჩამოიშორა გზიდან - 6:0, 6:2.

მარიამი და ნასტია ნახევარფინალში მელისა იფიდჟენისა და მარგარიტა სკრიაბინას (ორივე-რუსეთი) ტანდემთან გაარკვევენ ურთიერთობას. ამ უკანასკნელმა ასპარეზობის მეოთხე ნომერ ბრიტანელებს - მანიშა ფოსტერსა და ფრანჩესკა სტეფანსონს აჯობა - 4:6, 6:3, 12:10.

31 მარტს ისრაელის ჩელენჯტურნირში (საპრიზო ფონდი 125.000 დოლარი) ჩაება ალექსანდრე მეტრეველი, რომელიც სტარტზევე დამარცხდა სლოვენიელ ბლაჟ როლასთან - 1:6, 4:6 და შეჯიბრებას გამოეთიშა.

(იბეჭდება მცირე ცვლილებით)
ყოველდღიური სპორტული გაზეთი "ლელო"